اقتاۋدا بەسىككە بايلانعان بالانىڭ اكەسى سوت الدىندا جاۋاپ بەردى
ەسكە سالا كەتەيىك، بەسىككە بايلانعان بالانى دارىگەر ءبىر جەكە ءۇيدىڭ الدىنان تاۋىپ العان بولاتىن. ول بەسىككە تاڭىلىپ، كۇن استىندا قالعان. بالا الدىمەن اۋرۋحاناعا جاتقىزىلىپ، كەيىن سابيلەر ۇيىنە تاپسىرىلدى.
بالانىڭ اكەسى سوتتا ءوز كىناسىن مويىندادى. مامانداردىڭ ايتۋىنشا، ەگەر ونىڭ كىناسى دالەلدەنسە ول «بالالار ءومىرى مەن دەنساۋلىعى قاۋىپسىزدىگىن قامتاماسىز ەتۋ جونىندەگى مىندەتتەردى تيىسىنشە ورىنداماۋ» بابى بويىنشا ەكى جىلعا باس بوستاندىعىنان ايىرىلۋى مۇمكىن. بۇعان دەيىن تۋعاندارى بەسىككە بايلاپ تاستاعان بەكنۇر مىرزانىڭ دەنساۋلىعى جاقسارىپ كەلە جاتقانى حابارلانعان بولاتىن. ونىڭ تاستاپ كەتكەن اناسى دا ورالدى. ول بالاسىنا ۇنەمى بارىپ تۇرادى.
ايتا كەتەيىك، بۇعان دەيىن پوليتسەيلەر جابىرلەنگەن بالانىڭ وگەي اپكەلەرىنىڭ فيزيكالىق جانە پسيحيكالىق دەنساۋلىعىن باعالاۋدى تالاپ ەتكەن بولاتىن. «ەگەر تەكسەرۋ بارىسىندا ولارعا دا دۇرىس كۇتىم كورسەتىلمەيتىنى انىقتالسا، ولاردىڭ كەيىنگى ومىرىنە قاتىستى ماسەلە كوتەرىلەتىن بولادى»، - دەپ مالىمدەدى قۇقىق قورعاۋ ورگانى ماماندارى.
ەسكە سالا كەتەيىك، اقتاۋدا بۇلشىقەتى قيسايعان، باسىندا قاندى ىسىگى، قۇيرىعىندا ويىق جاراقاتى بار بالا اۋرۋحاناعا تۇسكەن ەدى. كەيىن ونىڭ سال اۋرۋىنىڭ جەڭىل فورماسىنا شالدىققانى بەلگىلى بولدى. پوليتسيا بالانىڭ تۋىستارىنىڭ ارەكەتىنەن قىلمىس قۇرامىن تاپپادى، ءبىراق كەيىن اكەسى «اتا-انالار مەن باسقا دا زاڭدى وكىلدەردىڭ بالا تاربيەلەۋ جونىندەگى مىندەتتەمەلەردى ورىنداماۋى» بابى بويىنشا اكىمشىلىك جاۋاپكەرشىلىككە تارتىلدى. بالانىڭ جاعدايى جەرگىلىكتى فەلدشەرلەردىڭ ءبىرىنىڭ ارقاسىندا جاريا بولدى، جۋىردا ونىڭ وسى اقپارات ءۇشىن جۇمىستان شىعارىلعالى جاتقانى حابارلاندى. ءبىراق كەيىن بۇل اقپارات راستالمادى.
tengrinews.kz
