قازاقستاننىڭ سىرتقى ىستەر مينيسترلىگى ۆەنەسۋەلانى استانادا تولىققاندى جۇمىس ىستەيتىن ەلشىلىك اشۋعا شاقىرادى

ءسوز اراسىندا سىرتقى ىستەر ءمينيسترى 2012-جىلى قازاقستاندا ۆەنەسۋەلانىڭ ديپلوماتيالىق ميسسياسى اشىلعانىن اتاپ ءوتتى.

«ءبىز سونداي-اق ۆەنەسۋەلانى استانادا تولىققاندى جۇمىس ىستەيتىن ەلشىلىك اشۋعا شاقىرامىز. بۇل قادام ەڭ الدىمەن ساۋدا-ەكونوميكالىق سالاداعى ىنتىماقتاستىقتىڭ دامۋىنا قوسىمشا سەرپىن بەرەر ەدى»، - دەدى ە. ىدىرىسوۆ.

كەزدەسۋ بارىسىندا ىسكەرلىك ىنتىماقتاستىقتى دامىتۋعا سەرپىن بەرۋ ءۇشىن ۆەنەسۋەلانىڭ كاسىپكەرلەرىن قازاقستانعا شاقىرۋ تۋرالى ماسەلە دە تالقىلانعان. ءمينيستردىڭ پايىمىنشا، بۇنداي شارا قوس مەملەكەتتىڭ ىسكەر توپتارى اراسىندا تىكەلەي بايلانىس ورناتۋعا، سونداي-اق ناقتى ۋاعدالاستىقتارعا قول جەتكىزۋگە مۇمكىندىك اشادى.

بۇدان بولەك، كەزدەسۋ بارىسىندا ەۋرازيالىق ەكونوميكالىق وداق اياسىنداعى، سونداي-اق دۇنيەجۇزىلىك ساۋدا ۇيىمىنا قوسىلۋدى كوزدەپ وتىرعان قازاقستاننىڭ ساۋدا-ينۆەستيتسيالىق مۇمكىندىكتەرى تۋرالى اڭگىمە وربىگەن. بۇل رەتتە مينيستر ە. ىدىرىسوۆ ارىپتەسىن ەۋرازيالىق ەكونوميكالىق وداق پەن ورتالىق ازيا نارىعىنا جول تابۋ ءۇشىن قازاقستاندى قولايلى ءارى لايىقتى الاڭ رەتىندە پايدالانۋعا بولاتىنىن اتاپ ءوتتى.

كەلىسسوزدەردىڭ قورىتىندىسىنا وراي، قازاقستان مەن ۆەنەسۋەلانىڭ سىرتقى ىستەر مينيسترلىكتەرى اراسىندا ساياسي كونسۋلتاتسيالار تۋرالى مەموراندۋمعا قول قويىلدى. بۇل قۇجات ىنتىماقتاستىقتىڭ باسىم جانە ءوزارا ءتيىمدى سالالارىن انىقتاۋداعى قوسىمشا قۇرالعا اينالادى. مينيستر ەرلان ىدىرىسوۆتىڭ ايتۋىنشا، ساياسي كونسۋلتاتسيالار جونىندەگى مەموراندۋم ەكى ەلدىڭ قارىم-قاتىناسىن تەرەڭدەتە ءتۇسۋ ءۇشىن جوسپارلار قۇرىپ، وعان قولجەتكىزۋ ءۇشىن ءوز سەپتىگىن تيگىزبەك.

«قازاقستان مەن ۆەنەسۋەلا كوپجاقتى فورماتتا بەلسەندى ءوزارا ءىس-قيمىل ورناتىپ وتىر. قازاقستان 2017-2018-جىلدارى ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەسى جانە «ەكسپو-2017» حالىقارالىق كورمەسىن وتكىزۋگە ۇمىتكەر رەتىندە ەلىمىزدىڭ كانديداتۋراسىن قولداعانى ءۇشىن ۆەنەسۋەلاعا العىس بىلدىرەدى»، - دەدى ە. ىدىرىسوۆ.

اۆتور: قانات مامەتقازى ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى