الماتى مەن قىتاي ءوزارا ىنتىماقتاستىقتى نىعايتۋعا مۇددەلى

 كەزدەسۋ بارىسىندا قالا اكىمى ق ح ر باس كونسۋلىن الماتىداعى ديپلوماتيالىق ميسسياسىنىڭ باستالۋىمەن قۇتتىقتاپ، سوڭعى جىلدارى الماتى مەن قىتاي اراسىنداعى ىنتىماقتاستىقتىڭ ەلەۋلى تۇردە دامىپ جاتقاندىعىن اتاپ ءوتتى.

 بۇعان ق ح ر ءتوراعاسى شي جينپيڭنىڭ قازاقستانعا جانە الماتى قالاسىنا جاساعان رەسمي ءىسساپارى جانە سونداي- اق قىتايدىڭ ءبىرقاتار ايماقتارىنىڭ باسشىلارىمەن جانە قىتايلىق كومپانيالاردىڭ وكىلدەرىمەن ارادا بولعان كەزدەسۋلەر وڭ اسەرىن تيگىزدى. 2014 - جىلدىڭ قاڭتار- قاراشا ايلارىندا الماتى مەن ق ح ر اراسىنداعى تاۋاراينالىمى 345,8 ميلليون ا ق ش دولارىن قۇرادى. بۇل قازاقستان مەن قىتاي اراسىنداعى مەملەكەت ارالىق تاۋاراينالىمىنىڭ تورتتەن ءبىرى دەگەن ءسوز. قازىرگى تاڭدا وڭتۇستىك استانادا 45 بىرلەسكەن قازاقستاندىق- قىتايلىق كاسىپورىن جانە قىتاي كاپيتالىنىڭ قاتىسۋىمەن 134 كاسىپورىن جۇمىس ىستەيدى.

«ەكى ەلدىڭ باسشىلارى - نۇرسۇلتان نازاربايەۆ پەن شي جينپيڭنىڭ ارقاسىندا قازاقستان مەن قىتايدىڭ ءوزارا قارىم- قاتىناسى نىعايا تۇسۋدە. مەن وتكەن جىلى الماتىنىڭ قىتايلىق تۋىستاس قالاسى - ءۇرىمجىنىڭ مەرى يلحام سابىردى، حۇبىي پروۆينتسياسى پارتيا كوميتەتىنىڭ حاتشىسى لي حۋنچجۋندى قابىلداعان ەدىم. سونىمەن قاتار، جيلين، جياڭسۋ پروۆينتسيالارى، شاڭحاي، چۇڭشين، داليان جانە باسقا دا قالالار الماتىمەن ىنتىماقتاستىق ورناتۋعا مۇددەلىلىك تانىتىپ وتىر»، - دەدى احمەتجان ەسىموۆ.

ءوز كەزەگىندە چجان ۆەي الماتى مەن قىتايدىڭ ساۋدا- ەكونوميكا، مادەنيەت، عىلىم، ءبىلىم جانە باسقا دا سالالاردا ءوزارا قارىم- قاتىناسى جوعارى دەڭگەيگە كوتەرىلگەندىگىن اتاپ ءوتتى.

«الماتى - تابيعاتى عاجاپ، اسەم دە زامانۋي قالا. الماتى مەن قىتايدىڭ ءوزارا ءتيىمدى ىنتىماقتاستىقتى دامىتۋدا الەۋەتى وتە جوعارى»، - دەدى ءسوز سوڭىندا چجان ۆەي.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى