تالدىقورعاندا «تابليعي جاماات» ءدىني قوزعالىسىنىڭ مۇشەلەرىنە قاتىستى سوت ۇكىمى شىقتى
قازاقستاندا بۇل ۇيىمنىڭ قىزمەتىنە 2013 - جىلدىڭ ناۋرىز ايىندا استانا قالاسىنداعى سارى ارقا اۋداندىق سوتىمەن تىيىم سالىنعان.
سوتتالۋشىلار ءبىزدىڭ ەلىمىزدە تىيىم سالىنعان ءدىني قوزعالىستىڭ بەس ۇستانۋشىسى بولدى. قىلمىستىق ءىس ماتەريالدارىنان ولاردىڭ ءبىلىم الۋ ءۇشىن بانگلادەشتەگى ءدىني سەميناريلەرگە تالاي رەت بارعاندارى، سونداي-اق قوعام بەلسەندىلەرىنىڭ ءبىرىنىڭ ۇيىنە ءجيى جينالىپ، وندا ەكسترەميستىك سيپاتتاعى ۇراندار ايتىپ، ادامداردىڭ ءداستۇرلى ەمەس جورالار مەن ءمىناجاتقا ۇيرەتىلگەنى ايتىلعان.
«سوتتالۋشىلار قازاقستاندا تىيىم سالىنعان «تابليعي جاماات» ۇيىمىنىڭ قىزمەتىنە قاتىسۋ ارقىلى ق ر ق ك-نىڭ 337-بابىنىڭ 2-ءبولىمىن بۇزعان. تەرگەۋشىلەر ولاردىڭ كىنالارىن دالەلدەدى. ىستە كوپتەگەن كۋاگەرلەرلىڭ تۇسىنىكتەمەلەرى، فونوگراممالار، اۋديو جانە بەينەجازبالار بار. سوتتان ولارعا جالپى رەجىمدەگى كولونيادا جازاسىن وتەۋمەن ەكى جىل مەرزىمگە باس بوستاندىعىنان ايىرۋ جازاسىن بەرۋدى سۇرايمىن»، - دەپ ايىپتاۋ قورىتىندىسىن وقىدى پروكۋرور گۇلشات ازاماتوۆا.
تالدىقورعان قالالىق سوتىنىڭ سۋدياسى سارا جاڭبىربايەۆا سوت ۇكىمىن جاريالادى. سوتتالۋشىلار ءبىر جىل التى ايدان باستاپ ءبىر جىل سەگىز ايعا دەيىن باس بوستاندىعىنان ايىرۋمەن جالپى رەجىمدەگى كولونيادا جازاسىن وتەيتىن بولدى.
سوتتالعان ازاماتتاردىڭ ءبىرىنىڭ اناسى: «وسىنداي بالانى تاربيەلەگەنىم ءۇشىن ۇيالامىن. ءتورت بالاسى بار بولسا دا، وسى جىلدار بويى ول ەشقايدا جۇمىس ىستەمەدى. ۇيىنە ءوزى سياقتى جۇمىسسىزداردى جينادى، ولاردىڭ دا وتباسىلارى بار. سولاردىڭ ءبارىن كىم اسىرادى دەپ ويلايسىز؟»، دەدى نالىپ.
