قاتونقاراعايدا قار بارىسى تۇڭعىش رەت سۋرەتكە ءتۇسىرىلدى
مامانداردىڭ ايتۋىنشا، التاي تاۋلارىنداعى بارىستى سۋرەتكە ءتۇسىرۋ بۇرىن- سوڭدى مۇمكىن بولماپتى.
قاتونقاراعاي ۇلتتىق پاركىنىڭ اۋماعىنداعى فوتو تۇزاققا جاز ماۋسىمىندا تاۋتەكە، ەلىك، قاسقىر، قوياندار ۇنەمى تۇسەتىن. بىلتىر قاراشانىڭ اياعىنا قاراي ارشاتىنىڭ ورمانشىلارى رەيد كەزىندە 900 مەتردەي جەردە كەتىپ بارا جاتقان بارىستى سۋرەتكە ءتۇسىرىپ العان ەكەن. ءبىراق ول فوتوسۋرەت ساپاسىز شىققان. وسىدان سوڭ زوولوگيا ينستيتۋتى ماماندارى جۇمىلا جۇمىسقا كىرىسەدى. ناتيجەسىندە وسى جولى ارشاتى اۋىلىنىڭ ماڭايىنداعى قورالى دەگەن جەردە قۇرىلعان فوتو تۇزاققا انىق تۇسكەن.
قۇرىلعى بارىستى سۋرەتكە ەكى رەت تارتىپ ۇلگەرگەن. سۋرەت وتكەن جىلى جەلتوقساننىڭ 11 ىندە تۇسىرىلگەن. قاتونقاراعاي مەملەكەتتىك ۇلتتىق تابيعي پاركىنىڭ جانۋارلاردى قورعاۋ جانە ءوسىرۋ ءبولىمىنىڭ باسشىسى ەرىك قاسىموۆتىڭ ايتۋىنشا، قورالى جاقتا كەمى ءۇش- ءتورت بارىس بار.
ەرىك قاسىموۆ، قاتونقاراعاي مەملەكەتتىك ۇلتتىق تابيعي پاركىنىڭ ءبولىم باسشىسى:
- بۇرىن قار بارىسى مەكەندەيتىن بولعان. ۇلكەندەر ايتىپ جۇرەتىن، اڭشىلار مەن مالشىلار دا كورگەن. ءبىراق ناقتى دالەل بولعان جوق. 2014 - جىلعى 14 - جەلتوقساندا فوتوتۇزاققا تۇسكەن قار بارىسى بۇل كۇمانىمىزدى جوققا شىعارىپ وتىر. ياعني ۇلتتىق پارك اۋماعىندا قار بارىسى مەكەندەيدى دەگەن ءسوز.
سوڭعى ساناق مالىمەتتەرى بويىنشا ۇلتتىق پارك اۋماعىندا 10 دانا قار بارىسى مەكەندەيدى. قار بارىسى - قازاقستاندا جانە ورتالىق ازياداعى تاۋلاردا، سولتۇستىك ءۇندىستان، پاكىستان، بايكال، تيبەت وڭىرلەرىن مەكەندەيتىن مىسىق تۇقىمداس اڭ. دەنەسىنىڭ ۇزىندىعى 125-135 س م. قۇيرىعىنىڭ ۇزىندىعى 90-100 س م. بيىكتىگى 60 س م، ال سالماعى 30-40 كەلى.
www.24.kz
