ءسابينا التىنبەكوۆا: ايگىلىلىك بۇل - ءومىردىڭ سىناعى ءارى سىيى
ءسابينانىڭ «حالىقتىڭ سۇيىكتىسى - 2014» ۇلتتىق بايقاۋىندا «جىل جاڭالىعى» نوميناتسياسى بويىنشا لاۋرەات اتانۋى دا كەزدەيسوقتىق ەمەس.. .
جاقىندا شەتەلدىكتەر ءسۇيسىنىپ جۇرگەن ۆولەيبولشى ارۋىمىزبەن تىلدەسىپ، تانىمالدىلىقتىڭ پايداسى مەن زيانى جونىندە ءسوز قوزعاپ ەدىك.
- بىلتىر ايەلدەر اراسىنداعى قازاقستان ۇلتتىق قۇراماسى تاۋەلسىز جاس مەملەكەتىمىزدىڭ تاريحىندا ءبىرىنشى رەت وليمپيادا ويىندارىنىڭ باعدارلاماسىنا كىرەتىن سپورت تۇرلەرى ىشىندە الەم چەمپيوناتىنىڭ ەكىنشى كەزەڭىنە شىقتى. ءسىزدىڭ ويىڭىزشا، بۇل كەزدەيسوق ناتيجە مە، الدە، لايىقتى كورسەتكىش پە؟
- ارينە، بۇل - ءبىزدىڭ قۇرامانىڭ ورنەكتى ويىندارىنىڭ لايىقتى كورسەتكىشى. مۇنىڭ ارتىندا شۇمەكتەتىپ توككەن تەر مەن كۇندەلىكتى كوپ ساعاتتى ەڭبەك تۇر. ءبىزدىڭ قۇراما مۇنداي كورسەتكىشكە ۇزاق جاتتىعىپ ءجۇرىپ جەتتى. قىزدار ايانعان جوق. بۇگىنگى تاڭدا ءبىزدىڭ قۇراما - الەمدەگى ەڭ تاجىريبەلى كوماندالاردىڭ ءبىرى. ءبىراق بۇل ءبىزدىڭ جەتىستىگىمىزدىڭ شەگى ەمەس. قازاقستان قۇراماسى الداعى ۋاقىتتاردا بۇدان دا جوعارى ناتيجەلەرگە قول جەتكىزۋى كەرەك دەپ ويلايمىن. بۇل رەتتە، ەلىمىزدىڭ جاس ۆولەيبولشىلارىن دايىنداۋ ىسىنە كوپ كوڭىل ءبولۋىمىز كەرەك. جاڭا بۋىن ەرتەڭ- اق قۇراما ساپىنداعى قىزداردىڭ ورىندارىن باسادى. ءوز كەزەگىندە، ەل ۆولەيبولىنىڭ باسشىلارى دا ءىزباسارلار تاربيەلۋ ىسىنە دەن قويىپ وتىر.
- ءسىزدىڭ ەڭ سۇيىكتى ويىنشىڭىز، بىلايشا ايتقاندا، ءپىر تۇتار تۇلعاڭىز كىم؟
- ۆولەيبول ويناي باستاعاننان- اق مەنىڭ ەڭ سۇيىكتى ويىنشىم قازاقستان ۇلتتىق قۇراماسىنىڭ بىرنەشە جىلعى كاپيتانى ەلەنا پاۆلوۆا بولدى. ءالى دە سولاي، ءارى سولاي بولىپ قالا بەرەدى دە. ول الەمدەگى ەڭ ۇزدىك ۆولەيبولشى قىزداردىڭ ءبىرى بولدى. ال قازىرگى ونەر كورسەتىپ جۇرگەن قىزداردىڭ ىشىندە رەسەي قۇراماسىنىڭ كوشباسشىسى ەكاتەرينا گاموۆانىڭ ويىنى ۇنايدى.
- نەگە وسى ۆولەيبولدى تاڭدادىڭىز؟
- باسىندا مەنى باسكەتبول سەكتسياسىنا شاقىرعان. ءبىراق ماعان سپورتتىڭ بۇل ءتۇرى اسا ۇنامادى. ارتىنان ۆولەيبولدى كورى قالىپ، ماعان كەرەگى وسى ەكەنىن سەزدىم. ءارى قاتەلەسپەپپىن.
- ۆولەيبولدى كوبىنەسە ناعىز زياتكەرلىك سپورت ءتۇرى دەپ اتايدى. شىنىمەن دە، بۇل شەكتەن تىس قوزعالىستى، سەرپىندى شاحمات سەكىلدى. تەك ءتورتبۇرىشتى الاڭداعىلار - زىر قاعىپ جۇگىرگەن ادامداردىڭ وزدەرى. شالت قيمىلدار جاساپ، شاپشاڭدىق تانىتىپ قانا قويماي، قاس- قاعىم ساتتە ۇتىمدى شەشىم قابىلداي ءبىلۋ كەرەك. ءسىز مۇنىمەن كەلسىسەسىز بە؟
- تۋرا سولاي. مۇنىمەن تولىقتاي كەلىسەمىن. شىنىمەن دە، ۆولەيبول ەڭ شاپشاڭ ويىنداردىڭ ءبىرى، مۇندا جىلدام ويناۋمەن قاتار تەز ويلاۋ دا قاجەت. تەز شەشىم قابىلداپ، ونى جۇزەگە اسىرا ءبىلۋ - ءسىزدىڭ ويىن الاڭىنداعى بولاشاعىڭىزعا تىكەلەي بايلانىستى.
- ال جاعاجاي ۆولەيبولىنا قالاي قارايسىز؟ بۇل سپورت سىزگە ۇناي ما؟
- ماعان ۆولەيبول ءوزىنىڭ كلاسسيكالىق ۇلگىسىندە كوبىرەك ۇنايدى. ويتكەنى وندا كوماندا بار، ەموتسيا بۇرق- بۇرق قايناپ جاتادى، قىزىعى مەن شىجىعى مول. ءبىر سوزبەن ايتقاندا، كلاسسيكالىق ۆولەيبولدا ءبارى، ءبارى، ءبارى بار.
- وتكەن جىلى ءسىزدىڭ ءناپ- نازىك يىعىڭىزعا تۇسكەن ادام تاڭعالارلىق تانىمالدىق جايىندا سۇراماي كەتە المايمىن. مۇنى ءسىز جانە ءسىزدىڭ جاقىندارىڭىز قالاي باستارىڭىزدان كەشىرىپ جاتىرسىزدار. الداعى ۋاقىتتا وسى ايگىلىلىگىڭىزدى قالاي يگىلىگىڭىزگە جاراتپاقسىز؟
- بۇل تانىمالدىقتىڭ وزىندىك پايداسى دا بار. مەن تەك سپورتتىق تۇرعىدا ايتىپ وتىرمىن. ماسەلەن، ماعان ءارتۇرلى شەت ەلدەردىڭ كلۋبتارى نازار اۋدارا باستادى. بۇل جامان ەمەس، ارينە. ال ايگىلىلىك جونىندە ايتار بولساق، بۇل - ءومىردىڭ سىناعى دا، سىيى دا. ەكەۋى قاتار. ەڭ باستىسى، شەت ەلدىكتەر ءبىزدىڭ ەل تۋرالى كوبىرەك بىلەتىن بولادى. مەن ىلعي دا ايتىپ ءجۇرمىن، مىسالى، ازيادا ءبارى دە ءبىزدىڭ كوك بايراعىمىزبەن سۋرەتكە ءتۇسىپ، ءبىزدىڭ قۇرامانى قولداپ وتىرادى.
- ال ەگەر شەتەلدىك ازۋلى كلۋبتاردان ۇسىنىس ءتۇسىپ، وزدەرىندە ويناۋعا شاقىرسا، نە ىستەيسىز؟
- نەسى بار؟ كوپشىلىكە تانىمال شەتەلدىك كلۋبتاردا ءبىر- ەكى جىل ويناپ، تاجىريبە جيناپ، ءوزىمنىڭ شەبەرلىگىمدى شىڭداي تۇسسەم، نەسى ايىپ؟ ! بۇل الداعى ۋاقىتتا مەنىڭ وتاندىق ۆولەيبولدىڭ دامۋى مەن جەتىلە تۇسۋىنە جانە ونى جاڭا ساپالى دەڭگەيگە كوتەرۋگە قوسقان ۇلەسىم بولادى.
- شىنىڭىزدى ايتىڭىزشى، كومانداداعى باسقا قىزدار ءسىزدىڭ ايگىلىلىگىڭىزگە قىزىعا قاراپ، ىشتەي بولسا دا، قىزعانباي ما؟
- (اقىرىن جىميىپ) ەندى، بار ازداعان ونداي.. .
- قازاقستان سپورت جۋرناليستيكاسىنىڭ دەڭگەيىنە قانداي باعا بەرەر ەدىڭىز؟
- ماعان قانداي دا ءبىر قورىتىندى شىعارىپ، ءوز پىكىرىممەن عانا كوزقاراسىمدى ءبىلدىرۋ - قيىنداۋ. ايتسە دە، جاسوسپىرىمدەر قۇراماسىنىڭ وكىلى رەتىندە، جۋرناليستەرگە جاستار سپورتىنىڭ پروبلەمالارىنا دا كوڭىل اۋدارىپ وتىرۋ ارتىق بولماس ەدى دەپ ويلايمىن.
اۆتور: ءىلياس وماروۆ، استانا
«الاش ايناسى»
