رەسەيدىڭ ورتالىق بانكى قازاقستانعا اعىلاتىن كاپيتالعا شەكتەۋ قويدى

بۇل جونىندە ورتالىق بانك ءتوراعاسىنىڭ ورىنباسارى دميتري سكوبەلكين كوممەرتسيالىق نەسيە بەرۋشى مەكەمەلەرگە جولداعان حاتىندا بايانداعان دەپ حابارلايدى الماتى ارناسى.

رەسەي بانكتەرى يمپورتتىق تاۋارلاردى راسىمدەۋدە قازاقستاندىق كومپانيالارمەن جاسالعان ءار كەلىسىم-شارتتى ءجىتى قاداعالايتىن بولادى.

فەدەرالدى سالىق قىزمەتىنىڭ سايتى ارقىلى، ەكى ەل اراسىندا جاسالعان تاۋار قۇجاتتارىن تەكسەرۋ قۇقىعىنا دا يە. كوڭىلگە كۇدىك ۇيالاتقان كليەنتتەردىڭ وپەراتسيالارىن توقتاتىپ، شوتتارىن جابۋعا دا قاۋقارلى.

«رەسەي فەدەراتسياسى مەن قازاقستان اراسىنداعى قارجىلىق جاعداي داۋ تۋعىزار ماسەلەگە اينالار دەگەن ويدا ەمەسپىن. بۇل ءبىر جاعىنان، رۋبلگە دەگەن قىسىمدى ازايتسا، ەكىنشى جاعىنان بۇل كاپيتالعا ۋاقىتشا پانا بولا الادى»، - دەدى FIBO Group ساراپشىسى رومان شيەۆچەنكو.

رەسەي ورتالىق بانكىنىڭ حابارلاۋىنشا، سوڭعى ۋاقىتتا كەدەندىك وداق اياسىندا تاۋاردى راسىمدەۋ ءبىرشاما وڭتايلاندىرىلعان. ناتيجەسىندە شەكارا اسىپ، سىرتتان كەلگەن تاۋار-كولىكتىڭ جۇك قۇجاتتارىن قابىلداۋ بارىسىندا، كولەڭكەلى بيزنەستىڭ كوسەگەسى كوگەرۋدە.

ىرگەلەس مەملەكەتتىڭ باس بانكى تەڭگەنى جىلىستاۋ ۇدەرىسىن دە سىنعا العان. وزگە كەدەندىك وداققا مۇشە بەلارۋستىڭ وزىندە جالعان يمپورتتىق تاۋار ماسەلەسى قازاقستانداعىداي شاش ەتەكتەن ەمەس كورىنەدى.

«رەسەي بانكىنىڭ تۇرعىسىنان قاراعاندا، بۇل ارينە دۇرىس ەمەس. ارادا سەرىكتەستىك پەن ەۋرووداققا بايلانىستى كەلىسىم-شارتتى جوققا شىعارۋعا بولمايدى. كاپيتالدىڭ مەملەكەتتەر اراسىندا ەمىن-ەركىن قوزعالۋىن قانداي دا بانك رەتتەي المايدى»، - دەدى كەدەندىك بروكەرلەر قاۋىمداستىعىنىڭ ءتوراعاسى گەننادي شەستاكوۆ.

رەسەي بانكتەرىنىڭ زارە-قۇتى قاشقانى سونشالىق، تىپتەن قازاقستاندىق يمپورتەر كاسىپكەرلەرگە قىزمەت كورسەتۋدەن باس تارتۋدا. تەك ءىرى كومپانيالارمەن ۇزاق جىلداردان بەرى جۇمىس ىستەپ جۇرگەن مەملەكەتتىك بانكتەر عانا بەلىن بەكەم بۋىپ وتىرعان جايى بار.

nur.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى