ەكى قازاق فۋتبولشىسى «الەم قۇراماسىندا» وينايدى

Al Kass International Cup تۋرنيرى - جىل سايىن وتەتىن ءداستۇرلى دودا. بيىل دوحادا 5-15- اقپان ارالىعىندا وتەدى. وسى تۋرنيردە دوداعا تۇسەتىن كاتاردىڭ Aspire International («ەسپاير ينتەرنەيشنل») دەگەن كومانداسىنىڭ ساپىندا ەكى قازاقتىڭ بالاسى وينايتىن بولادى. ولار - رامازان ورازوۆ («قايرات») جانە ورالحان ومىرتايەۆ («شاحتەر») . ەكەۋى دە - 16 جاستا.

قازاقستان فۋتبول فەدەراتسياسىنىڭ باسپا ءسوز قىزمەتى «ەسپاير ينتەرنەيشنل» كومانداسىنىڭ ساپىندا الەمنىڭ كوپتەگەن ەلدەرىنىڭ فۋتبولشىلارى ونەر كورسەتەتىندىگىن، بۇل كوماندا الەم قۇراماسى بولىپ سانالاتىندىعىن مالىمدەگەن.

سودان سوڭ وسى قۇرامانىڭ ساپىنا نەلىكتەن رامازان ورازوۆ پەن ورالحان ومىرتايەۆتىڭ ىلىككەندەرىنە توقتالىپ وتكەن. قازاقستان فۋتبول فەدەراتسياسىنىڭ باسپا ءسوز قىزمەتىنىڭ مالىمدەۋىنشە، بۇل ەكى فۋتبولشى 1998-جىلعا دەيىنگى قازاقستان بىرىنشىلىگىندە ەرەكشە كوزگە تۇسكەن.

ماسەلەن، وسى بىرىنشىلىكتىڭ ءاربىر تۋرىنان كەيىن بارلىق كوماندالاردىڭ باپكەرلەرى ق ف ف بالالار مەن جاسوسپىرىمدەر فۋتبولى بولىمىنە ءوز باياندامالارىن ۇسىنىپ، ءوز تۇجىرىمدارى بويىنشا ءار تۋردىڭ ۇزدىك قۇراماسى ۇلگىسىن ۇسىنىپ وتىرعان. سوندا وسى ەكى فۋتبولشىنىڭ ەسىمدەرى بارىنەن كوپ اتالىپتى.

بۇگىن رامازان ورازوۆ پەن ورالحان ومىرتايەۆ كاتارعا اتتانادى. سول جاقتا الەم قۇراماسىمەن اتالعان تۋرنيرگە دايىندالىپ، جاتتىعۋ جۇمىستارىنا قاتىساتىن كورىنەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى