سەرگەي كۋلاگين وزىنە دەيىنگى شەنەۋنىكتەر جاساعان بىلىقتاردى اشىق اشكەرەلەدى
وبلىس باسشىسى استانا ىرگەسىندەگى اۋىلداردى دامىتۋعا بولىنگەن قىرۋار قارجى يگەرىلمەگەن، 38 جوبا مۇلدەم جۇزەگە اسپاعان دەپ اشۋعا ءمىندى. بۇرىنعى شەندىلەر ءتىپتى قۇرىلىس جۇرگىزىپ باستارىن اۋىرتپ، تەك تەندەر وتكىزىپ الىپ تايىپ تۇرعان دەدى كۋلاگين.
بۇل مەكتەپتى كىم سالدى؟ مۇنىڭ قانداي جاعدايدا ەكەنىن قاراڭىزدارشى؟ قوياندى مەكتەبىنىڭ دە كۇيى وڭىپ تۇرعان جوق.
استانا ىرگەسىندەگى ايماقتاردى دامىتۋعا ارنالعان جيىنعا كەلگەن شەندىلەردىڭ بۇگىن كوڭىلى كوتەرىڭكى بولدى. وبلىس اكىمى سەرگەي كۋلاگينگە ەلوردا توڭىرەگىن وسىلاي وزگەرتەمىز دەپ، قاعاز جۇزىندەگى ادەمى جوبالارىمەن دە تانىستىردى. كورمەنى ءبىر شولىپ شىققان وبلىس باسشىسى جيىندى سىرەسكەن باياندامادان ەمەس، يگەرىلمەگەن ميللياردتاردان باستادى.
بولاشاقتا ءوزى جاۋاپتى بولعىسى كەلمەدى مە، كۋلاگين وزىنە دەيىنگى شەنەۋنىكتەردىڭ بىلىقتارىن اياماي اشكەرەلەدى. بيۋجەتتەن 54 ميلليارد تەڭگە بولىنگەن، ءبىراق، ءۇش جىل ىشىندە جۇزەگە اسۋى ءتيىس 88 جوبانىڭ 38 ءى مۇلدەم ىسكە قوسىلماعان.
ياعني، مەكتەپتەر مەن بالاباقشالار سالىنباعان، جولدار جوندەلمەگەن، سۋ، ەلەكتر جەلىلەرى تارتىلماعان. شەنەۋنىكتەر تەك تەندەردى وتكىزىپ الىپ تايىپ تۇرعان، قازىر ەشكىمدى تابۋ مۇمكىن ەمەس. ال مەملەكەتتىڭ قىراۋار قارجىسىنا سالىنعان نىسانداردىڭ بىردە بىرەۋى ءوز ۋاقىتىندا پايدالانۋعا بەرىلمەگەنى ءوزى الدىنا، ازىردەن قيراپ جاتىر ەكەن.
ماسەلەن، قوياندىداعى سول كەزدە وبلىس اكىمى بولعان قايرات قوجامجاروۆ شاشۋ شاشىپ اشقان مەكتەپتىڭ سالىنعانىنا ءبىر جارىم جىل عانا وتكەن، ال قازىر ەدەنى سىنىپ جاتىر. ەندى بۇل نىسانداردى جوندەۋگە قايتادان اقشا بولۋگە تۋرا كەلەدى دەدى كۋلاگين.
«بۇل مەكتەپتى كىم سالدى؟ مۇنىڭ قانداي جاعدايدا ەكەنىن قاراڭىزدارشى؟ قوياندى مەكتەبىنىڭ دە كۇيى وڭىپ تۇرعان جوق. ال بۇعان قانشاما اقشا ءبولىندى؟»، - دەدى اشۋعا بۋلىققان اكىم.
مەملەكەت قىرۋار قارجى بولگەنىمەن، تەندەر وتكىزگەننەن وزگە تۇك بىتىرمەگەن شەندىلەردىڭ كەسىرىنەن استانا توڭىرەگى تۇك دامىماعان. «ادەمى عيماراتتارعا تولى ەلوردادان 19 شاقىرىم شىقساڭ، تۋرا 19- عاسىرعا تاپ بولعانداي اسەردە بولامىن»، - دەدى كۋلاگين.
سوندىقتان بۇدان بىلاي شەنەۋنىكتەردىڭ بارلىعى ءاربىر جوبانىڭ جۇزەگە اسۋىن قاداعالايتىن بولدى. ال قوسىمشا قارجى سۇرايتىن، ساپاسىز قۇرىلىس جۇرگىزەتىن كومپانيالار مۇلدەم شەتتەتىلمەك. ال بۇل جۇمىستاردى جاڭا اكىمدەردىڭ ەشكىمنەن قورىقپاي جۇرگىزۋىنە كۋلاگيننىڭ ءوزى قولداۋ كورسەتەمىن دەدى.
وبلىستاعى جۇمىستاردىڭ ورىندالۋىن وبلىس اكىمى تىكەلەي باقىلاۋىندا ۇستايتىنىن جانە بۇرىنعىداي بىلىقتاردىڭ بولمايتىنىنا ۋادە بەردى. ۇيقى اۋرۋىنا شالدىققان كالاچي اۋىلىن مامىر ايىنا دەيىن تۇگەلدەي كوشىرۋدى دە اكىمدەر ازىردەن قولعا الدى. ال بۇرىنعى اي سايىن تەندەر وتكىزىپ الىپ، اۋىسىپ كەتكەن شەنەۋنىكتەردى ەشكىم جازالامايتىن سياقتى.
وسىلايشا، اقمولا وبلىسىنىڭ اكىمى سەرگەي كۋلاگين بۇدان بىلاي تەك تەمىردەي ءتارتىپ بولۋى كەرەك دەپ تۇيىندەدى. اكمىدەر مەن قۇرىلىس كومپانياسى باسشىلارىنا بۇگىنگى جيىن جىل باسىنداعى كەلىسىم ەكەنى ايتىلدى. بۇدان بىلاي ولاردان قاتاڭ سۇرانىس بولماق. كۋلاگيننىڭ جاڭا كومانداسىنىڭ جۇمىسى الداعى ۋاقىتتىڭ ەنشىسىندە.
nur.kz
