بالاسى ءۇشىن بۇيرەگىن بەردى
وتباسىنداعى ءتورت بالانىڭ كىشىسى قاناعات بەس جاسىنان باستاپ اۋىرا باستايدى. دارىگەرلەر كىشكەنتاي قاناعاتقا «تۋا ءبىتتى ءبىر بۇيرەگى جوق» دەگەن دياگنوز قويىپ، باقىلاۋعا الادى. قاناعاتقا بۇيرەكتىڭ قىزمەتىن اتقاراتىن جاساندى تۇتىكشە قويىلادى. ءاربىر التى ساعات سايىن جاساندى تۇتىكشە ارقىلى دەنەگە قاجەتتى ءدارى جىبەرىلىپ تۇرادى. باۋىر ەتى بالاسىنىڭ وسىنداي حالىنە الاڭداعان اتا-انا اقتوبە مەن استانانىڭ اراسىن جول قىلىپ، قالايدا قىزىنىڭ ساۋىعىپ كەتۋىنىڭ امالدارىن ىزدەدى.
قاناعاتتىڭ اتا-اناسى بەركىن مەن كامشاتقا دارىگەرلەردىڭ سوڭعى كەڭەسى - «بالاڭىزدى بۇل دەرتتەن تەك ترانسپلانتاتسيا عانا قۇتقارادى. ياعني، ساۋ ادامنىڭ بۇيرەگىن سالۋ كەرەك». مۇنى ەستىگەن بەركىن ءوزىنىڭ ءبىر بۇيرەگىن بەرۋگە كەلىسىمىن بەرەدى. وتباسىندا وتاعاسى بەركىن جۇمىسسىز. كامشات - قۇيلىس اۋىلىنداعى دارىگەرلىك امبۋلاتوريادا مەيىربيكە. ءبىر وتباسىندا ءبىر ءوزى عانا جۇمىس جاسايتىن كامشات بالاسىن ەمدەتۋ ءۇشىن نەسيە دە الدى.
سوندا دا، «قىسقا ءجىپ كۇرمەۋگە كەلمەگەن» سوڭ، وبلىس ورتالىعىنان شىعاتىن «دياپازون» گازەتى ارقىلى جومارت جانداردان كومەك سۇرايدى. حابارلاسىپ، كومەك قولىن سوزعاندار بولدى.
ءسويتىپ، وتكەن جىلدىڭ 26- اقپانىندا قاناعات پەن اكەسى بەركىنگە استانا قالاسىنداعى «انا مەن بالا ۇلتتىق عىلىمي ورتالىعى» كلينيكاسىندا ترانسپلانتاتسيالىق وتا جاسالدى. استانالىق بىلىكتى دارىگەرلەردىڭ ارقاسىندا وتا ءساتتى شىقتى. وتادان كەيىن ءبىر اي دارىگەرلەردىڭ باقىلاۋىندا بولعان قاناعات ءوزىنىڭ تۋعان اۋىلىنا، دوستارىنا ناۋرىز ايىندا كەلدى. مامان دارىگەرلەردىڭ قاتاڭ باقىلاۋىنداعى قاناعات قازىرگى كۇنى وبلىس ورتالىعىندا تۇرىپ جاتىر.
اقتوبە قالاسىندا ۇيدەن ءبىلىم الىپ جاتقان قاناعات جۋىردا قىسقا كانيكۋلعا ءوزىنىڭ تۋعان اۋىلى قۇيلىسقا كەلدى. «ەندىگى ماقساتىم - ساباعىمدى جاقسى وقىپ، اتا-انامنىڭ ءۇمىتىن اقتاۋ. وسكەندە دارىگەر بولۋدى قالايمىن»، - دەيدى ول.
