كالاچي اۋىلىنىڭ تۇرعىنى قالاي ۇيقىعا كەتكەنىن اڭگىمەلەپ بەردى
بۇكىل ەلدى دۇرلىكتىرگەن اۋرۋدىڭ سەبەبىن ماماندار ءالى كۇنگە دەيىن انىقتاي الماي وتىر.
اياق استىنان مىزعىپ كەتۋدەن ابدەن قورقىپ قالعان تۇرعىندار بىرتىندەپ كوشىپ جاتىر. كالاچيدە وتىز جىلدان استام ءومىر سۇرگەن ۆاسيلي سيۋپكا سەلينوگراد اۋدانىنا قاراستى اقمول اۋىلىنا قونىس اۋدارماقشى.
قاريا بەلگىسىز ىندەت جايلاعان اۋىلداعى جاعداي مەن ءوزىنىڭ قالاي «ۇيقىعا كەتكەنىن» اڭگىمەلەپ بەردى.
«مەن تولىق ۇيىقتاپ كەتكەن جوقپىن. ءوزىمدى ناشار سەزىنگەندىكتەن، ۋاقىتىندا دارىگەرگە قارالدىم. ەكى كۇن ەم قابىلداۋعا بىرەۋدىڭ كومەگىمەن بارسام، ءۇشىنشى كۇنى ءوزىم جەتتىم. ال بۇل ەكى كۇندە نە بولعانى مۇلدەم ەسىمدە جوق. اۋرۋحاناعا كىم، قالاي جەتكىزگەنىن بىلمەيمىن. ءبىراق، كەيبىرەۋلەر سياقتى مۇلدەم ەسىمنەن تانعان جوقپىن»، - دەيدى ۆاسيلي سيۋپكا.
كالاچي سەلوسى تۇرعىنىنىڭ ايتۋىنشا، اركىم ءار ءتۇرلى «ۇيىقتايدى». كەي ادامدار ەس جيعاننان كەيىن وزدەرىن ۇستاي الماعاندىقتان، ءدارى ەگۋ ءۇشىن ولاردى ءتىپتى بايلاپ قويۋعا تۋرا كەلگەن. كەيبىرىنىڭ دەرتى دەندەپ، ەلەستەر كورىنگەن.
«ۇيقى اۋرۋىنىڭ» سەبەبىن اركىم تۇرلىشە جورىپ ءجۇر. بىرەۋلەر قىتايدان جەتكىزىلەتىن ازىق-تۇلىكتەن دەيدى. ءبىراق، ءبىز اۋىلدا تۇرامىز عوي، ءبارى تابيعي ازىق. ەندى بىرەۋلەر كوپ جىلداردان بەرگى سوزىلمالى اۋرۋلار سەبەپ بولۋى مۇمكىن دەيدى. ءۇش جاسار بالادا قانداي دەرت بولۋى مۇمكىن؟ ءبىزدىڭ بايقاعانىمىز، ادامدار كوپ ارالاسقان جاعدايدا، «ۇيقى اۋرۋى» دەندەي تۇسەدى. ال ءبىز دالادا تازا اۋادا كوپ ارالاسامىز. العاشقى جاعداي ناۋرىزدا بولدى، مەرەكەنى ادەتتەگىدەي دالادا اتاپ وتتىك. وسىدان كەيىن ادامدار «ۇيىقتاي باستادى».
ال 20 - جەلتوقساننان باستاپ تۇرعىندار كۇندە قالعىپ كەتەتىن بولدى»، - دەپ ەسكە الدى كالاچي تۇرعىنى.
اياق استىنان مىزعىپ كەتۋدەن ابدەن قورقىپ قالعان كالاچي تۇرعىندارىنىڭ كوپشىلىگى ىندەت جايلاعان اۋىلدان كوشپەك نيەتتە. ويتكەنى، جامان اۋرۋدىڭ سەبەبىن ماماندار ءالى كۇنگە دەيىن انىقتاي الماي وتىر.
«بىردەن مۇنداي شەشىم قابىلداۋ وڭاي ەمەس. مەن كالاچي سەلوسىندا 33 جىل ءومىر ءسۇردىم. سوندىقتان، ارينە، باسقا جەرگە كوشۋ قيىن. ەكىنشى جاعىنان، ادامدار بەلگىسىزدىكتەن قورقادى. باسپانا، جۇمىس كەرەك. دەگەنمەن، ۇيىقتاپ قالعان تۇرعىندار كوشۋ مۇمكىندىگىن قاراستىرىپ جاتىر. الداعى ۋاقىتتا مەملەكەت بىزگە باسپانا الۋعا قارجىلاي قولداۋ كورسەتسە يگى بولار ەدى. ايتالىق، پاتەر باعاسىنىڭ جارتىسىن مەملەكەت وتەسە، قالعانىن ءوزىم تولەيمىن. ءوز باسپانام بولسا، ەش قيىندىقسىز كوشىپ كەلەر ەدىم. ارينە، اۋداندا بوس تۇرعىن ءۇي قورى جوق ەكەنىن تۇسىنەمىز. ءبىراق، باسپانامىزدى، شارۋاشىلىعىمىزدى تاستاپ، ءبىر چەمودانمەن كوشۋ قورقىنىشتى. بىزگە كەلىمسەك مارتەبەسىن بەرەدى دەگەن ۇمىتتەمىز. تۇرعىنداردىڭ ەش كەپىلدىكسىز باسقا جاققا كوشۋگە باتىلى جەتپەي وتىر»، - دەپ اڭگىمەسىن جالعاستىردى ول.
ۆاسيلي سيۋپكا سەلينوگراد اۋدانىنا قاراستى اقمول اۋىلىنا كوشىپ كەلمەك. وعان «اقمولا فەنيكس» كاسىپورنىندا جۇمىس ۇسىنعان. ءارى قىزمەتتىك باسپانا دا بەرىلىپ وتىر.
«مەن بۇل اۋىلعا ءۇش كۇن بۇرىن كەلدىم. اۋدان اكىمىمەن وتكەن كەزدەسۋدەن كەيىن مەنى شاقىردى. قىزمەتتىك باسپانا بەردى، تەك كوممۋنالدىق قىزمەتتەر ءۇشىن تولەيمىن. ايەلىم ءالى كالاچي سەلوسىندا، مەن قازىر دەمالىستا بولعاندىقتان، جاعدايدى كورىپ قايتۋعا كەلدىم. بالالارىم بارلىعى ءوسىپ-جەتتى، بولەك تۇرادى. مەنى جۇمىسقا شاقىرىپ وتىرعان كاسىپورىنداردىڭ باسشىلارى ءبارى جاقسى بولادى دەپ سەندىردى»، - دەپ اڭگىمەسىن تۇيىندەدى كالاچي اۋىلىنىڭ تۇرعىنى.
ايتا كەتەيىك، بۇگىن اقمولا وبلىسىنىڭ اكىمى سەرگەي كۋلاگين «ۇيقى اۋرۋى» جايلاعان كالاچي سەلوسىنان بالالى-شاعالى وتباسىلار مامىر ايىنا دەيىن تولىق كوشىرىلەتىنىن ءمالىم ەتتى. ونىڭ ايتۋىنشا، دەرجاۆينسك سەلوسىنداعى بۇرىنعى اسكەري قالاشىقتاعى ەكى ءۇيدى قالپىنا كەلتىرۋ جوسپارلانىپ وتىر. بۇدان بولەك، كالاچي تۇرعىندارى ءۇشىن تاعى ءبىر ءۇي اۋدان ورتالىعى ەسىلدە سالىنادى.
ايىمگۇل ابىلەۆا
BNews.kz
