نۇرلان نۇرسەيىت: «دوللارسىزداندىرۋ» ەكونوميكانىڭ تۇراقتى وسىمىنە اكەلەدى
«دوللارسىزداندىرۋ» حالىق اراسىندا تەڭگەنىڭ بەدەلىن ارتتىرۋ ءۇشىن جاسالىپ جاتىر. ەگەر ول ءساتتى جۇزەگە اسسا، ۇلتتىق بانك - تەڭگە ەميسسياسىنىڭ قوسىمشا مۇمكىندىگىنە، بانكتەر - ارزان تەڭگە رەسۋرستارىنا، كاسىپورىندار سالىستىرمالى تۇردە ارزان نەسيەگە قول جەتكىزەدى. قاراپايىم حالىققا باستى تيىمدىلىگى، ۇلتتىق ۆاليۋتا كۋرسى نىعايا تۇسەدى. ىشكى نارىقتا شەتەل ۆاليۋتاسىن پايدالانۋ قاجەتتىلىگى ازايادى. بۇل ۆاليۋتالىق تاۋەكەلدەردىڭ الدىن الۋعا كومەكتەسەدى. ءوز كەزەگىندە ول ۇلتتىق ەكونوميكانىڭ تۇراقتى وسىمىنە اكەلەدى»، - دەدى نۇرلان نۇرسەيىت.
ماماننىڭ پىكىرىنشە، دوللارسىزداندىرۋ تۇراقتى ەكونوميكالىق وسىمگە نەگىزدەلمەسە، ينۆەستورلارعا سەنىم تۋعىزبايدى.
«بىزدە ەكونوميكالىق ءوسىمنىڭ نەگىزگى درايۆەرى مۇناي بولسا، ول باعانىڭ قۇلدىراۋىنا بايلانىستى بۇل فۋنكسيانى اتقارۋدى دوعاردى. ال، باسقا درايۆەردى مەن ازىرگە كورىپ تۇرعان جوقپىن. وسىنداي جاعدايدا دوللارسىزداندىرۋ اكىمشىلىك رەسۋرستارعا نەگىزدەلەدى. ال، قانشالىقتى ءتيىمدى بولادى، ونى ۋاقىت كورسەتەدى»، - دەپ قورىتىندىلادى ول.
سونىمەن قاتار، ساراپشى وزگە ەلدەرمەن ساۋدا جاساۋدى ۇلتتىق ۆاليۋتاعا كوشىرۋگە قاتىستى ءوز ويىن بىلدىرە كەتتى. ونىڭ ويىنشا مۇنداي قادام دوللارعا دەگەن سۇرانىستى ازايتادى.
«مەن ونى قۇپتايمىن. ول ۇلتتىق ۆاليۋتالارعا دەگەن سۇرانىستى ارتتىرادى. بۇل ەۋروپالىق وداق ەلدەرىنىڭ اراسىندا باسىندا ۇلكەن تيىمدىلىگىن كورسەتتى. ءبىراق، ول شارا ءوزارا ءبىر- ءبىرىن تولىقتىراتىن ەلدەردە، ەكونوميكالىق ءوسىمى ءبىر دارەجەدەگى ەلدەردە مۇمكىن. سوندىقتان، بۇل جاعدايدا كەدەندىك وداق ەلدەرى اراسىنداعى وندىرىستىك كووپەراتسيا، ءوزارا تىعىز ىنتىماقتاستىق تۇيتكىلدىڭ شەشىمى بولا الادى»، - دەپ قورىتىندىلادى ول.
