تۇركيانىڭ الەمدىك ەكونوميكاداعى ورنى ەكى ساتىعا تومەندەدى

ەكونوميكالىق جانە ىسكەرلىك زەرتتەۋ ورتالىعى (CEBR) جىل سايىن جاريالايتىن «الەمدىك ەكونوميكانىڭ رەيتينگتىك كەستەسىندە» وسى كۇنگە دەيىن قارىشتاپ دامىپ كەلگەن تۇركيا 17-ورىننان 19-عا ىعىسىپ، جالپى العاندا ەكى ساتىعا تومەندەدى.

ونىڭ سەبەبىن ماماندار ۇلتتىق ۆاليۋتانىڭ قۇنسىزدانۋى مەن سىرتقى ساۋدا اينالىمىنىڭ ازايۋىمەن ءتۇسىندىردى. الايدا ەكونوميكاداعى بۇل وزگەرىستەر قاراپايىم حالىقتىڭ تابىسىنا قانشالىقتى اسەر ەتتى، ىشكى نارىق ودان زارداپ شەكتى مە؟ وتكەن جىل تۇركيا ءۇشىن وڭاي بولمادى. ەلدە ەكى بىردەي ءىرى سايلاۋ ءوتىپ، بۇقارا حالىق ساياسي پارتيالاردىڭ تارتىسىنا كۋا بولدى.

ازاماتتىق ۇستانىم مەن ساياسي كوزقاراس ىشكى الاۋىزدىقتى قوزدىراتىنىن كىم بىلگەن؟ ! ونىڭ ۇستىنە تاياۋ شىعىستاعى تىنىشسىزدىق، كورشى ەلدەردەگى دۇربەلەڭ دە تۇركياعا سالقىنىن تيگىزبەي قويمادى. ناتيجەسىندە ۇلتتىق تابىس 827 ميلليارد ا ق ش دوللارىنان 767 ميللياردقا دەيىن تومەندەدى. 2014 -جىلى تۇرىك ليراسىنىڭ دوللارعا شاققانداعى باعامىنىڭ تومەندەۋى تۇركيانىڭ الەمدىك ەكونوميكاداعى ورنىن ەكى ساتىعا ىعىستىردى.

 ەندى رەسمي انكارانىڭ 2023 - جىلى دۇنيەجۇزىندەگى ۇزدىك ەكونوميكانىڭ وندىعىنا كىرۋ جونىندەگى ستراتەگيالىق جوسپارى ۇزارۋى مۇمكىن دەپ ەسەپتەيدى ساراپشى- ەكونوميستەر. ال ەلدىڭ ەكونوميكا ءمينيسترى نيحات زەيبەكچي وتكەن جىلدى قورىتىندىلاي كەلە، سيريا مەن يراكتاعى سوعىس جانە باتىس ەلدەرى مەن رەسەي اراسىنداعى ەكونوميكالىق سانكسيالار تۇركيانىڭ سىرتقى ساۋدا اينالىمىنا كەرى اسەر ەتكەنىن مالىمدەدى.

تۇركيادا بىلتىر ينفلياتسيا 8,17 پايىزدى قۇرادى. ستاتيستيكالىق ينستيتۋتتىڭ جاريالاعان مالىمەتى بويىنشا ەڭ كوپ جىلدىق ءوسىم قوناق ءۇي بيزنەسى مەن ازىق- تۇلىكتە بايقالعان. ەڭ كەمى 13 پايىزعا قىمباتتاعان تۇتىنىم تاۋارلارى قاراپايىم حالىقتىڭ قالتاسىنا اجەپتەۋىر سالماق سالدى. 2014 - جىلى تۇركيانىڭ ەكسپورتى 157 ميلليارد 800 ميلليون دوللارعا جەتتى. بۇل الەمنىڭ سىرتقى ساۋدا اينالىمىنىڭ 0.83 پايىزىن قۇرايدى. ال بيىل تۇرىك بيلىگى بۇل كورسەتكىشتى 1 پايىزعا دەيىن جەتكىزىپ، الەمدىك ساۋدا- ساتتىقتاعى ۇلەسىن ارتتىرۋدى جوسپارلاۋدا.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى