اتىراۋداعى تاماق ونەركاسىبى ءوڭىردى ازىق- تۇلىكپەن تولىقتاي قامتيدى
مەملەكەت كومەگىنە سۇيەنگەن بيزنەسمەندەر تاماق ءونىمىنىڭ ساپاسىن ارتتىرا وتىرىپ، تۇتىنۋشى كوڭىلىنەن شىعۋدى ماقسات ەتۋدە. ناتيجەسىندە كەشەندى تاماق ونەركاسىپتەرى قۇرىلىپ، كلاستەرلىك جۇيەدە جۇمىس جاساۋدا. ازىق- تۇلىكتىڭ الۋان ءتۇرىن وندىرۋگە ماماندانعان بۇل كومپانيا 5 باعىتتا جۇمىس جاسايدى.
مۇندا نان- توقاش ونىمدەرى، تازا اۋىز سۋ، ەت- قۇتى كومبيناتى ونەركاسىپتەرى تۇرعىندار قاجەتىن وتەۋدە. جانە كوكونىس پەن باۋ باقشا داقىلدارىن ساقتاۋعا ارنالعان سىيىمدىلىعى 5 مىڭ توننالىق قويما بار. بۇل ناۋبايحانادا تاۋلىگىنە 3 مىڭ دانادان استام ءونىم دايىندالادى. ونىڭ ىشىندە 40 تان استام نان- توقاش تۇرلەرى مەن كونديتەرلىك ونىمدەر جەرگىلىكتى نارىقتان ءوز تۇتىنۋشىسىن تاپقان.
ءامينا اقدىراشيەۆا، ءونىدىرىس مەنەدجەرى:
- ءبىزدىڭ ماقسات - وبلىس تۇرعىندارىنا ارزان دا ساپالى ءونىم ۇسىنۋ. سونىمەن قاتار سىرتتان تاسىمالدانىپ كەلگەن كونديتەر ونىمدەرىنە باسەكەلەس بولۋ. وسىلايشا مۇنايلى وڭىردە ازىق- تۇلىك بەلدەۋىن قالىپتاستىرۋ. بۇل - ەلباسىنىڭ تاپسىرماسى.
كلاستەرلىك جۇيەنىڭ تاعى ءبىر سالاسى - 5-19 ليترلىك ىدىستارعا قۇيىلعان تازا اۋىز سۋ ءوندىرىسى. «جىلىنا 10 ميلليون ليتر سۋ تازالايتىن قوندىرعىنىڭ ءونىمى وبلىس تۇرعىندارىنىڭ جان باسىنا شاققاندا 800 ليتردەن كەلەدى»، - دەيدى ماماندار. وسى زامانعى وزىق تەحنولوگياعا نەگىزدەلگەن ءوندىرىس جۇمىسشىلارىنىڭ باسىم بولىگى جەرگىلىكتى تۇرعىندار.
اقىلبەك تىنشىموۆ، ونەركاسىپتىڭ باس مامانى:
- 2010 - جىلى بۇل قوندىرعىلاردى قىتايدان ساتىپ اكەلدىك. ىسكە قوستىق. جانە جەرگىلىكتى ادامداردى جۇمىسقا الىپ، ۇيرەتتىك. سىيىمدىلىعى 5 مىڭ توننالىق قويماداعى ديقان ونىمدەرى وڭىردە جۇمىس جاساپ جاتقان مۇناي كومپانيالارىنىڭ تاپسىرىسىن قاناعاتتاندىرۋعا ارنالعان. ال ارتىلعانى قالا بازارلارىنا شىعارىلادى. وسى قويمادا قازىر 200 توننا كارتوپ، 300 توننا ءسابىز جانە 250 توننا پياز ساقتالىپ تۇر. ەندى ازىق- تۇلىك باعدارلاماسى بويىنشا ارزان باعامەن وبلىس بازارلارىنا ساتۋدامىز.
جەرگىلىكتى جەردە دايىندالعان ساپالى تاۋارلارعا سۇرانىس تا جوعارى. ءونىم جەرگىلىكتى جەردەن ونگەندىكتەن، باعاسى سىرتتان تاسىمالداناتىن تاۋارلارعا قاراعاندا اناعۇرلىم ارزان. بۇل كاسىپ يەلەرىنە دە، تۇتىنۋشىعا دا ءتيىمدى. وسىنى ەسكەرگەن بيزنەس وكىلدەرى كەلەشەكتە ءوندىرىس كولەمىن ۇلعايتىپ، كورشى وبلىستاردىڭ نارىعىندا دا باقتارىن سىناپ كورۋدى مەجەلەپ وتىر.
