قازاق ونەرىنىڭ ساڭلاقتارى: ساۋلە جانپەيىسوۆا
جامبىل وبلىسى، سارىسۋ اۋدانى، جايىلما اۋىلىنداعى ماياتاس ەلدى مەكەنىندە 1966 - جىلعى 14 - تامىزدا دۇنيەگە كەلگەن. ول العاش رەت ساحناعا 2 - سىنىپتا وقىپ جۇرگەن كەزىندە شىعىپ، «ءانشى قىز» اتاندى.
رەسپۋبليكالىق ەسترادا- سيرك ونەرى ستۋدياسىنداعى قازاقستاننىڭ حالىق ءارتىسى عاريفوللا قۇرمانعاليەۆتىڭ باتىس ءان ءداستۇرى بويىنشا كلاسىنا ءىلىندى. 1992 - جىلى ءال- فارابي اتىنداعى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن ءتامامدايدى. ونەر جولىندا ءجۇرىپ ۇلتتىق كونسەرۆاتورياعا قابىلدانادى. 1997 - جىلى كونسەرۆاتورياداعى وقۋىن اياقتاعان سوڭ، ساۋلە «قازاقكونتسەرت» بىرلەستىگىندە كاسىبي انشىلىكتى باستادى. پاريجدىڭ «يۋنەسكو» زالىندا كونتسەرت اتقارىلعاندا ساۋلە وعان قاتىستى. ونى فرانسۋزدار وتە جاقسى قابىلدادى. ساۋلەنىڭ 20 جىلدىق شىعارماشىلىق كەشىندە اسانالى ءاشىموۆ: «ساۋلە - ءۇش ءجۇزدىڭ ءانشىسى» ، - دەپ باعا بەردى. 2005 - جىلدىڭ مامىر ايىنىڭ 17- جۇلدىزىندا اباي اتىنداعى ق م ا و ب تەاترى زالىندا ساۋلە جانپەيىسوۆانىڭ « ءان - امانات» اتتى شىعارماشىلىق كەشى ءوتتى. كەشتە قاراقات ءابدىلدا قىزى، ايگۇل قوسانوۆا، ەلميرا جاڭابەرگەنوۆا، ارداق يساتايەۆا، ايگۇل ماقاشيەۆا انمەن شاشۋ شاشتى.
ۇزاق جىلدار ىزدەنىسى ناتيجەسىندە 2010 - جىلى «قازاق پروزاسىنداعى ءانشى- اقىندار بەينەسى» تاقىرىبىندا كانديداتتىق عىلىمي ديسسەرتاتسياسىن قورعادى. كوپتەگەن عىلىمي- تانىمدىق ماقالالاردىڭ جانە «اۋەن- سىر» اتتى كىتاپتىڭ اۆتورى.
2004 - جىلى «ءان- ابىز» اتتى ءوزىنىڭ ۇستازىمەن بولعان سوڭعى كەزدەسۋىنەن سپەكتاكل سەناريىن دايىنداپ، كورەرمەنگە رەجيسسەر ب. اتابايەۆ ساحنالاۋىمەن ۇسىندى. جاڭا باعىتتا جاسالعان وسى ساحنالىق قويىلىمدا ساۋلە باستى رولدە ويناپ، كوپشىلىكتىڭ جوعارى باعاسىنا يە بولدى.
سەگىز قىرلى ونەرلى جان 2006 - جىلى ۇلتتىق تەلەارنادا اۆتورلىق «بۇل ءاندى بىلەسىز بە؟ » تەلەجوباسىندا جۇرگىزۋشى رەتىندە جاڭا قىرىمەن تانىلدى. اتىراۋداعى مۋزىكا اكادەمياسىنان ورالىپ، قۇرمانعازى اتىنداعى كونسەرۆاتوريانىڭ ءان كافەدراسىن باسقارادى. ونىڭ شاكىرتتەرى: ايگۇل قوسانوۆا، بەرىك ءجۇسىپوۆ، ەلميرا جاڭابەرگەنوۆا، ارنۇر كوشەنەيەۆ، ماڭعىستاۋ جىرلارىن اكەلگەن ەلدوس ەمىل، اتىراۋلىق ت. قۇتتىمۇراتوۆ، اقتوبەدەن ايگۇل ەلشىبايەۆا، ىرىستى سۇلەيمەنوۆ، ءومىرقۇل اينيازوۆ.
بۇگىنگى تاڭدا جامبىل وبلىستىق فيلارمونيانىڭ ديرەكتورى قىزمەتىن اتقارادى.
