تالعات مۇسابايەۆ: ءبىز بايقوڭىردان رەسەيدىڭ كەتكەنىن قالامايمىز

«ءبىزدىڭ ەلىمىز ءىرى عارىش دەرجاۆاسىنا اينالۋدى كوزدەپ وتىر. ءبىز رەسەيمەن بىرگە، ءتىپتى، كەيدە ولاردان بۇرىن زىمىراندار ۇشىرۋدى ماقسات ەتتىك. ارينە، قازاقستاندا سانالى تۇردە ويلايتىن كەز كەلگەن ادام، ونىڭ ىشىندە مەن دە بارمىن، رەسەيدىڭ بايقوڭىردان كەتپەگەنىن قالايدى»، - دەدى مۇسابايەۆ.

ول قازاقستان مەن رەسەيدىڭ ارىپتەس ءارى وداقتاس ەكەنىن، ال مۇنداي دەڭگەيدەگى مەملەكەتارالىق قاتىناستا ستراتەگيالىق ارىپتەستىكتىڭ مىقتى بولۋى تيىستىگىن العا تارتادى.

«ەگەر كۇندەردىڭ كۇنى رەسەي بايقوڭىردان كەتپەك بولسا، ءبىز عارىش ايلاعىنىڭ جۇمىسىن توقتاتقانىن قالامايمىز. ءبىز عارىش ايلاعىنىڭ جۇمىسى ودان ءارى جاندانا ءتۇسۋى ءۇشىن بار كۇشىمىزدى سالامىز. ءبىراق تاعى دا قايتالاپ ايتامىن، ءبىز رەسەيدىڭ بايقوڭىردا ماڭگىگە قالعانىن تىلەيمىز»، - دەدى ۇلتتىق عارىش اگەنتتىگىنىڭ ءتوراعاسى تالعات مۇسابايەۆ.

سونداي-اق، مۇسابايەۆ جالعا الۋ باعاسىنىڭ وزگەرۋ-وزگەرمەۋى تۋرالى دا ايتتى.

«بۇل سۇراقتى ءبىز تالقىلاعان ەمەسپىز. كەزىندە نۇرسۇلتان نازاربايەۆ پەن بوريس ەلتسين كەلىسىپ كەتكەن $115 ميلليون ءالى كۇنگە دەيىن ءوز كۇشىندە. سودان بەرى جالعا الۋ باعاسىن وزگەرتۋ تۋرالى اڭگىمە بولعان ەمەس. ارينە، وسىدان 20 جىل بۇرىنعى $115 ميلليون مەن قازىرگى باعانى سالىستىرا المايسىڭ. الايدا، مەنىڭشە وسى دۇرىس. بىزدە جالعا الۋ باعاسىن وزگەرتۋ ەشقاشان ماڭىزدى تاقىرىپ بولعان ەمەس»، - دەدى ءتوراعا مۇسابايەۆ.

بىرنەشە رەت قازاق جەرىنە قۇلاعان رەسەيلىك «پروتون» زىمىران تاسىعىشى تۋرالى دا تالعات مۇسابايەۆ ءوز ويىن ءبىلدىردى.

«پروتون» تۋرالى سۇراق قازىر قوعامدا قىزۋ تالقىلانۋدا. بىزدە ءتىپتى انتيگەپتيلدىك ۇيىمدار پايدا بولدى. قازاقستانداعى رەسەي ەلشىلىگىنىڭ الدىندا ادامداردىڭ قارسىلىق كورسەتكەنىن قاشان كورىپ ەدىڭىز؟ ءبىز رەسەيدىڭ جاقىن ارادا پروتوننان باس تارتا المايتىنىن تۇسىنەمىز. ۇشىرا بەرسىن! ءبىراق قۇلاماسىنشى!»، - دەيدى تالعات مۇسابايەۆ.

nur.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى