ادىلەت مينيسترلىگى قىمىز بەن شۇباتتى قورعاۋ ماسەلەسىنە تۇسىنىكتەمە بەردى

 اتالعان ۆەدومستۆو تاراتقان مالىمەتكە قاراعاندا، سوڭعى ۋاقىتتا ادىلەت مينيسترلىگىنىڭ اتىنا ءداستۇرلى مادەني قۇندىلىقتاردى، مىسالى قىمىز، شۇبات تۇرىندەگى ءداستۇرلى قازاق سۋسىندارىن قورعاۋ جانە وسى ماسەلە قۇزىرەتىنە جاتاتىن ۋاكىلەتتى ورگان تۋرالى ماسەلەگە تۇسىنىكتەمە بەرۋ تۋرالى بىرنەشە ءوتىنىش كەلىپ تۇسكەن.

وسىعان بايلانىستى كەلەسىگە نازار اۋدارعىمىز كەلەدى. وسى ماسەلەنى قاراۋ كەزىندە قازاقستان رەسپۋبليكاسى ادىلەت مينيسترلىگىنىڭ جانە قازاقستان رەسپۋبليكاسى مادەنيەت جانە سپورت مينيسترلىگىنىڭ قۇزىرەتىن ناقتى اجىراتۋ قاجەت.

«ادىلەت مينيسترلىگى ءداستۇرلى بىلىمدەر مەن داعدىلاردان ايرىقشالاناتىن قازىرگى زامانعى جاعدايلاردا ونەركاسىپتىك ءوندىرىس تەحنولوگياسىنا پاتەنتتەردى تىركەۋگە جانە بەرۋگە جاۋاپ بەرەدى. مىسالى، قىمىزدى ونەركاسىپتىك دايىنداۋ تاسىلدەرىنە 24 پاتەنت، شۇباتتى ونەركاسىپتىك دايىنداۋ تاسىلدەرىنە - 17 پاتەنت بەرىلدى»، - دەلىنگەن ۆەدومستۆو حابارلاماسىندا.

ونەرتابىسقا پاتەنت بەرۋ ءۇشىن پاتەنت قابىلەتتىلىگى، جاڭالىق جاعدايلارى تەكسەرىلەدى. ءداستۇرلى بىلىمدەردىڭ (ءونىم نەمەسە ولاردى شىعارۋ ءتاسىلى) ەشقانداي نىسانى جاڭالىققا تەكسەرۋدەن وتە المايدى.

وسىلايشا، ونەركاسىپتىك ءوندىرىس تەحنولوگياسىنا پاتەنتتەر بەرۋ ولاردىڭ قۇقىق يەلەنۋشىلەرىنە ءداستۇرلى ونىمدەرگە جانە سۋسىندارعا وزگە دە ءداستۇرلى بۇيىمدارعا قۇقىقتار بەرمەيدى.

ولاردى پايدالانۋ جانە قورعاۋ ماسەلەسى مادەنيەت سالاسىنداعى زاڭنامامەن رەتتەلەدى.

اتاپ ايتقاندا، «مادەنيەت تۋرالى» زاڭنىڭ 7-بابىنا سايكەس مادەنيەت جانە سپورت مينيسترلىگىنىڭ قۇزىرەتىنە داستۇرلەردى، سالتتاردى، تىلدەردى جانە ولارمەن بايلانىستى بىلىمدەر مەن داعدىلاردى قوسا العاندا، ۇلتتىق ماتەريالدىق ەمەس مادەني مۇرانى قورعاۋ جانە دامىتۋ ماسەلەلەرى جاتادى.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى