قادىردىڭ جازعان ولەڭدەرىنىڭ ىشىندە ءالى جارىق كورمەگەندەرى كوپ - ورازاقىن اسقار
«قادىر مەنىڭ قالامداس قۇرداسىم ەدى. ول: «مەن تۋرالى جازسىن» - دەپ مەنى ارتىنا قالدىرىپ كەتكەن سياقتى. قادىردىڭ ادەبيەتكە سىڭىرگەن ەڭبەگى ۇشان- تەڭىز. ول ەڭ الدىمەن بالالار تۋرالى جازدى. ال بالالار تۋرالى جازۋ وتە قيىن! قادىر بۇل سىننان سۇرىنبەي ءوتتى. كەيىن ادەبيەتتىڭ بارلىق سالاسىندا قالام تەربەدى. كوزى تىرىسىندە 18 تومى جارىق كوردى. ءبىراق، قادىردىڭ جازعان دۇنيەلەرىنىڭ ءالى جارىق كورمەي جاتقاندارى قانشاما! ول كەم دەگەندە 40 تومنان اسۋى مۇمكىن. ويتكەنى، قادىر «مەنىڭ اۋدارمالارىمنىڭ ءوزى 20 توم بولادى» - دەيتىن. شىنىندا سولاي ەدى. ول تالاي ەلدىڭ اقىندارىن قازاقشا جىرلاتتى. ەگەر قادىردىڭ جازعان شىعارمالارىن باسقا تىلدەرگە اۋدارار بولسا، ول دۇنيەجۇزىلىك دارەجەدەگى اقىن بولارى اقيقات»، - دەدى بەلگىلى اقىن ورازاقىن اسقار.
قادىر مىرزا ءالىنىڭ وتە ەڭبەكقور اقىن بولعانى جۇرت اۋزىندا اڭىز بولىپ ايتىلاتىنى بەلگىلى. مۇنى ورازاقىن اسقار دا راستادى.
«قادىر وتە ءونىمدى جازدى. باسقا اقىندار قالامساپپەن، جازۋ ماشينكاسىندا نەمەسە كومپيۋتەردە جازسا، ول كادىمگى قارىنداشپەن جازاتىن. «ويتكەنى وتە ىڭعايلى، تۇرىپ تا، وتىرىپ تا، جاتىپ تا جازا بەرەمىن»، - دەيتىن ول. ونىڭ ادەبيەتتىڭ ءار ءتۇرلى سالالارىنا ارناپ جازعان، جىپپەن بۋىلعان، ءالى جارىق كورمەي، تەڭ- تەڭ بولىپ قاتتالعان قولجازبالارىن ءوز كوزىممەن كورگەنمىن»، - دەدى ورازاقىن اسقار.
بۇگىنگى كەشتە قازاقستانعا بەلگىلى ەسترادا جۇلدىزدارى قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ سۇيەمەلدەۋىمەن قادىر مىرزا ءالىنىڭ ولەڭىنە جازىلعان اندەردى شىرقاپ، جينالعان جۇرتشىلىقتىڭ ريزاشىلىعىنا بولەندى.
سونىمەن قاتار، كەش اياسىندا ۇلتتىق كىتاپحانادا قادىر مىرزا ءالىنىڭ ءومىرى مەن شىعارمالارىنا ارنالعان «زەردەلى جىردىڭ زەرگەرى» اتتى كىتاپ كورمەسى ۇيىمداستىرىلدى.
