جاڭا جىلدى شەتەلدە قارسى الۋشىلار كوبەيگەن

ءتىپتى، جاڭاجىلدىق ساپارلارعا ساياحاتشىلار بيلەتتەردى جارتى جىل بۇرىن ساتىپ الا باستايدى. قىسقى سۋىقتىڭ ورنىنا ىستىق اۋا رايى، قاردىڭ ورنىنا جاعاجايداعى قۇم.

ءدال وسىنداي كورىنىستى جاڭا جىل مەرەكەسىندە وتانداستارىمىزدىڭ ءبىرقاتارى كورىپ، شەتەلدە اۋناپ- قۋناپ قايتتى. ارينە، قالتاسى كوتەرەتىندەر.

استانا قالاسىنىڭ تۇرعىنى اينۇر مۇقانوۆا جاڭا جىلدى مالايزيادا قارسى العان. ونىڭ ايتۋىنشا، مەرەكەنى قارى مەن شىرشاسى جوق ەلدە قارسى الۋ -  بالا كۇنگى ارمانى. سارى ارقانىڭ قاھارلى قىسىنان ءبىراز كۇنگى دەمالىسىن ىستىق جاقتا دوستارىمەن وتكىزىپ، سەرگىپ قايتىپتى.

ءارى دەمالىس قۇنى دا اسا قىمبات بولماعانىن ايتادى.

اينۇر مۇقانوۆا، قالا تۇرعىنى:

- استانادا ءوزىڭىز بىلەتىندەي وتە سۋىق. سوندىقتان جىلى جاققا بارىپ، دەمالىپ كورۋدى ءجون كوردىم. بىلاي ساناپ كورسەك، نەگىزى قىمبات ەمەس. ەكى جەتىدە 5 جۇلدىزدى قوناق ءۇي، ەكسكۋرسيا، تاماعى بار. سوندىقتان قىمباتقا تۇسپەدى.

تۋريستىك كومپانيا وكىلدەرىنىڭ ايتۋىنشا، جاڭاجىلدىق ساپارلارعا بيلەتتەر جارتى جىل بۇرىن ساتىلا باستاعان. ال جەلتوقساننىڭ ورتاسىندا بيلەت تاپپاي سابىلعاندار قاراسى كوبەيگەن. تەك استانا، الماتى جانە شىمكەنت قالالارىنان وسى كۇندەرى 8 مىڭعا جۋىق تۋريست دەمالۋعا اتتانعان. جەر ءجانناتى جەتىسۋ، اسقار شىڭدى التاي، ەمدىك قاسيەتى مول الاكول، سۋى بالداي، ءشوبى شۇيگىن باياناۋىل، اۋاسى ءشاربات قارقارالى. ءبىزدىڭ ەلدەگى وسى ىسپەتتى كورىكتى جەرلەردى ايتىپ تاۋىسا المايسىڭ. الايدا وتانداستارىمىزدىڭ كوبى شەتەلدە دەمالعاندى ءجون كورەدى. جازيرا جانكينا، تۋريستىك كومپانيانىڭ ديرەكتورى:

- جاڭا جىلدا قازاقستاندىقتار كوبىندە جىلى جاققا بارىپ، جاعاجايدا جاتىپ دەمالعاندى ءجون كورەدى. قازىر ول جاقتارعا تىكەلەي باعىتتار اشىلعان. اسىرەسە قىس مەزگىلىندە وتباسىمەن شەتەلگە اتتاناتىندار كوپ.

قازاقستاندىقتار ءجيى باراتىن گوا ارالدارىندا 7-8 كۇن دەمالۋ قۇنى ءبىر ادامعا ورتا ەسەپپەن 1200 ا ق ش دوللارى كولەمىندە. ال جاڭا جىلدى مالايزيادا قارسى العىڭىز كەلسە، 1500 ا ق ش دوللارى كەرەك. قىتايدىڭ حاينان ارالىنا ساپارىڭىز 1600 ا ق ش دوللارىنا تۇسەدى ەكەن.

جازيرا جانكينا، تۋريستىك كومپانيا ديرەكتورى:

- قىس مەزگىلىندە جىلى جاققا بيلەتتەر قۇنى قىمباتتاي تۇسەدى. دەگەنمەن قالتاسى كوتەرەتىندەر باعاسىن سۇراپ باس قاتىرىپ جاتپايدى. ءوز باسىم شەتەلدە دەمالعاندى ءجون كورسەم دە، وتاندىق ءتۋريزمنىڭ قارقىندى دامىعانىن قالايمىن. ول ءۇشىن بىزگە ۋاقىت كەرەك. قازىر قالتاڭدا اقشاڭ بولسا، قايدا بارىپ دەمالام دەسەڭ دە ەركىڭ. بۇگىندە التى قۇرلىقتىڭ قاي بۇرىشىنا دا ساياحاتتاۋ قيىن ەمەس. قالتالىلاردى بىلاي قويعاندا، قازىر تۇرمىسى ورتاشا قاراپايىم وتباسىلاردىڭ ءوزى دەمالىستارىن شەتەلدە وتكىزگەندى قالايدى.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى