قاپشاعايدا «جەڭىسكە قۇرمەت» مارافون-اكسياسىنا قاتىسۋشىلار جەڭىس جالاۋشاسىن قابىلداپ الدى - فوتو
الماتى وبلىسىنداعى قاپشاعاي گارنيزونىنىڭ اسكەري قىزمەتشىلەرى ەرتەڭ جەڭىس جالاۋشاسىن 40- وتار اسكەري بازاسىنا جونەلتەدى.
سالتاناتتى شارانى اشقان قاپشاعاي گارنيزونىنىڭ باستىعى پودپولكوۆنيك ماقسۇت ۇسەيىنوۆ ۇلى جەڭىستىڭ 70 جىلدىعى مەن ەلباسى - جوعارعى باس قولباسشى ن. ءا. نازاربايەۆتىڭ باستاماسىمەن جاريالانعان ارداگەرلەر جىلىن مەرەكەلەۋ اياسىنداعى اكسيانىڭ ماڭىزىن ەرەكشە اتاپ ءوتتى.
«جەڭىس جالاۋشاسىن قابىلداپ الۋ ءبىز ءۇشىن ۇلكەن قۇرمەت. ەكىنشى دۇنيەجۇزىلىك سوعىستاعى جاۋىنگەرلەردىڭ ەرلىگى اسكەري قىزمەتشىلەر ءۇشىن وتان الدىنداعى بورىشىن وتەۋدە ءارقاشان ۇلگى بولىپ قالا بەرمەك»، - دەدى ول.
ەستەرىڭىزگە سالا كەتەيىك، «جەڭىسكە قۇرمەت» اكسياسى شەڭبەرىندە ەلىمىزدە شوعىرلانعان اسكەري بولىمدەرگە جەڭىس جالاۋشاسىن تاپسىرۋ ەستافەتاسى وتۋدە.
شارا قورىتىندىسىندا بۇل جالاۋشا 15 - قاڭتاردا كەڭەس وداعىنىڭ باتىرى، حالىق قاھارمانى، ارميا گەنەرالى ساعادات نۇرماعامبەتوۆ اتىنداعى «جاس ۇلان» رەسپۋبليكالىق مەكتەبىنە تاپسىرىلاتىن بولادى.
