جۇيكەنى ساقتاۋدىڭ جەتى جولى
ءيا، ارينە، مۇنىڭ برلىعى دا وڭاي ەمەس. ءبىراق ومىرلىك ەنەرگيامىزدى جەپ قوياتىن باسقا دا سەبەپتەر بار ەكەن. سولاردىڭ بىرنەشەۋىن قاراستىرىپ، الدىن الۋعا تىرىسايىق.
ءۇنجىرعاڭ ءتۇسىپ، كوڭىل- كۇيدىڭ بولماۋى اسقازاننىڭ ناشار جۇمىس ىستەۋىنىڭ بەلگىسى عانا ەمەس، يممۋنيتەت السىزدىگىنەن تۋىندايتىن باسقا دا اۋرۋلاردىڭ كورىنىسى. پسيحولوگتاردىڭ ايتۋىنشا، ەگەر ءسىز ۇنەمى شارشاپ جۇرەتىن بولساڭىز، مۇنى ءوز كۇشىڭىزبەن جەڭە الاسىز. شىن مانىندە ادام بارىنەن بۇرىن ءوزىنىڭ الدەبىر قۇبىلىستارعا دەگەن قارىم- قاتىناسىنان شارشايدى. دەمەك، ەڭ باستىسى - قازىر ەستىگەن اقپاراتتىڭ جاقسى جاعىن ۇستاپ قالۋدى ەسكەرگەن ءجون. ماسەلەن، تاڭەرتەڭ تەلەديداردا بۇگىننەن باستاپ كۇن سۋىتادى دەگەندى ەستىسەڭىز، بىردەن رەنجىپ قويا بەرۋدىڭ ورنىنا، جۋىردا عانا العان جاڭا ەتىكتى تاعى ءبىر كيىپ شىعۋ مۇمكىندىگى تۋدى، دەگەن سياقتى تيتتەي دە بولسا نارسەمەن ءوزىڭىزدى قۋانتۋعا تىرىسىڭىز. ويتكەنى، ەگەر اۋا رايى بۇزىلاتىن بولسا، ءبارىبىر بىزدەن سۇرامايدى. دەمەك، ءسىزدىڭ رەنجىگەنىڭىز وزىڭىزگە عانا زيان اكەلەدى. ال جۇيكە جاسۋشالارى قايتا قالپىنا كەلمەيدى.
تۇڭعيىققا شىن مانىندە باتىپ بارا جاتقان ادام ءوز ءومىرىنىڭ ناقتى باعاسىن بەرە الادى. ياعني، بۇرىن كوڭىلىڭىز تولمايتىن نارسەلەردىڭ ءبارى ءسىزدىڭ باتىپ بارا جاتقان كەزىڭىزدە تۇك تە ەمەس بولىپ كورىنەدى. ونىڭ ۇستىنە «باسقا تۇسسە، باسپاقشىل» دەمەكشى، ەگەر باسىڭىزعا بۇدان دا قيىن جاعداي تۋىنداسا دا كوتەرەتىنىڭىز انىق. سوندىقتان، وسى ومىرگە «like» بەلگىسىن قويۋدى ۇمىتپاڭىز.
1 ماسەلە: وزاتتىق سيندرومى
جۇيكە توزۋىنا باستايتىن ەڭ ءبىرىنشى جول - كەمەلەدىككە ۇمتىلۋ. جان- جاعىمىزدان بيزنەستە جولى بولعان، اياق استىنان بايىپ كەتكەن، وتباسىندا باقىتتى جاندار تۋرلى كوپ ەستيمىز. بىلاي قاراعاندا بۇلار وتە جاقسى اقپاراتتار بولعانىمەن جانە مۇنداي جاڭالىققا قۋانعانىمىزبەن، سانامىزدىڭ تۇكپىرىندە جۇيكەگە اسەر ەتەتىندىگى انىقتالعان. ياعني، ءبىز دە بەيسانالى تۇردە وزات بولۋعا تىرىسىپ، ويشا ءوز الدىمىزعا ەڭسەرە الماس ماقساتتار قويىپ الامىز. ول ادامدى قاتتى شارشاتادى. جانە نە ءۇشىن شارشاپ جۇرگەنىمىزدى ۇقپاي قالامىز. بۇل جەردە دە ءوزىڭىزدىڭ جاقسى جاعىڭىزدى قاراستىرۋ كەرەك. ماسەلەن، ءسىز اياق استىنان جۇلدىز بولىپ شىعا كەلگەن اكتەردى كورسەڭىز، ءسىز دە ءوز ءىسىڭىزدىڭ مامانى ەكەنىڭىزدى ەسكە الىڭىز. نەمەسە جولىڭىز بولعان جاعىڭىزدى ويلاۋعا تىرىسىڭىز. ەڭ ماڭىزدىسى - ءوزىڭىزدى ءوزىڭىز كەشىرە الۋىڭىز كەرەك. جانە ءوزىڭىزدىڭ جەكە تۇلعا ەكەنىڭىزدى، بىرەۋلەردىڭ ويىنان شىعۋعا ءتيىس ويىنشىق ەمەس ەكەنىڭىزدى ەسكە الىڭىز.
2 ماسەلە: قىزعانىش
بۇل ءسىزدىڭ بويىڭىزداعى ەنەگريانى جوعالتاتىن ەڭ جامان نارسە. بىرەۋلەردىڭ شىققان شىڭىن قىزعانۋ، كورە الماۋ، اياعىندى ءوزىڭىزدى كىنالاۋ بولىپ شىعادى. «وي سونى قويشى، مەن ودان دا كۇشتىمىن» دەپ ويلاۋدىڭ استارىندا ءبارىبىر، «مەن نەگە ونداي بولا المادىم» دەگەن وي جاتادى.
نەگىزى قىزعانىشتىڭ ەمى جوق. ەگەر تۋمىسىنان قىزعانشاق ادام بولساڭىز، ماسەلەنى شەشۋ قيىنداۋ. سوندا دا، ونەر تۋىندىسىنان، تابيعات سۇلۋلىعىنان ءلاززات الۋعا تالپىنىپ كورىڭىز. ءسىز قىزىعىپ، قىزعانىپ وتىرعان ادامنىڭ دا قولى جەتپەگەن نارسەلەر بار ەكەنىن ويلاڭىز.
3 ماسەلە: وزىنە وزىنە دەگەن سەنىمسىزدىك
بوسقا جۇيكە توزدىرۋدىڭ تاعى ءبىر جولى - ەلدىڭ ءسىز تۋرالى نە ويلايتىنىنا باس قاتىرۋ جانە ولارعا جاعۋعا تىرىسۋ. بۇكىل ەلگە بىردەي جاعۋ ەشقاشان مۇمكىن ەمەس. ءسىز شىنىمەن جاقسى ادام بولۋىڭىز دا مۇمكىن. الايدا اركىمنىڭ تالعامى ءارتۇرلى. بازبىرەۋلەرگە ءبارىبىر جاقپايسىز. سوندىقتان بۇل دا بوسقا جۇيكە توزدىرۋ.
شىندىعىنا كەلگەندە، ءسىزدىڭ جەتىستىكتەرىڭىز بەن قۇلدىراۋلارىڭىز ەشكىمدى دە قىزىقتىرمايدى. جانە ءسىز تۋرالى ويلاعان ويىن دا، ايتقان ءسوزىن دە سالدەن سوڭ ۇمىتىپ كەتەدى. ءسىز دە ءسويتىڭىز. ەسەسىنە جۇيكەڭىز ورنىندا.
4 ماسەلە: ازعا قاناعات ەتە بىلمەۋ
قازىرگى قوعامدا «مۇمكىن ەمەس نارسە جوق» دەگەن پىكىر ەتەك الدى. بۇل دۇرىس ەمەس. ەشكىم دە ءوز مۇكىندىگىنەن ارتىق جاساي المايدى. قولدا باردىڭ قادىرىن ءبىلىپ، باعالاي ءبىلىڭىز. باستىق بولماعان ادامنىڭ بوستاندىعى وزىندە ەكەنىن ويلاڭىز. جانتالاسىپ جان باعىپ جۇرگەن بىزدەردەن گورى تاۋ بوكتەرىندە تازا اۋا جۇتىپ اتپەن سەرۋەندەپ، قوي باققان اتا- بابامىزدىڭ بىزدەن گورى باقىتتىراق بولعانىن ويلاڭىز.
5 ماسەلە: ۇنەمى ساقتانىپ ءجۇرۋ
جۇيكەڭىزدى ۇنەمى الدەنەدەن قورقىپ، قاۋىپتىڭ الدىن الىپ، ساقتىق جاساپ ءجۇرۋ دە جەپ قويادى. بىرەۋدلەر ماتەريالدىق قۇندىلىقتارىن قالاي ساقتاپ قالۋدى ويلاسا، بىرەۋلەر قالاي كوبەيتۋدى ويلايدى. قالاي دەسەڭىز دە ماڭدايعا جازعانى بولادى. ءبارىنىڭ الدىن الۋ مۇمكىن ەمەس. ءومىر ءوز دەگەنىن ىستەپ وزگەرىپ وتىرادى. سوندىقتان، ۇنەمى «قاتىپ» ءجۇرۋدىڭ قاجەتى جوق.
6 ماسەلە: ساراڭدىق
ىشكى قورعانىس كۇشىن ساراڭدىق تا السىرەتەدى. بۇل جەردە اڭگىمە ۇنەمى «بىرەۋ مەنى ساتىپ كەتۋى، الداپ كەتۋى، سازعا وتىرعىزىپ كەتۋى مۇمكىن» دەپ كۇدىكتەنىپ، ءوز كۇشىن، ەڭبەگىن، اقشاسىن قورقا- قورقا جۇمسايتىن ادامدار تۋرالى بولىپ وتىر. «نە ەكسەڭ - سونى وراسىڭ» ، «بەرەگەن قولىم - الاعان» دەگەن ماقالداردى ەسكە الىڭىز. «شىعىن شىقپاي، كىرىس تە كىرمەيدى» . دەمەك بۇل جولى دا جۇيكەنى توزدىرىپ، قاتتى «تىرىسۋدىڭ» قاجەتى شامالى.
7 ماسەلە: سەلقوستىق
ءبىر قىزىعى، سەلقوستىق تا جۇيكەڭىزدى توزدىرادى. كەز كەلگەن ارەكەتتىڭ 5 بولىگى بار: ماقسات، جوسپار، ورىنداۋ، باقىلاۋ جانە ىشتەي باعالاۋ. وسى بەسەۋىنىڭ بىرەۋىن جاساي الماعان ادام پسيحولوگيالىق جاعىنان كۇيزەلىسكە ۇشىرايدى. ءبىر ىسكە كىرىسكەندە ماقساتسىز بولسا نەمەسە جوسپارى قۇرىلماسا، بولماسا وسىنىڭ ءبارىنىڭ باعاسىن وزگە بىرەۋ بەرەتىن بولسا، قيىن ارينە.
سوندىقتان جۇيكەنى قالپىندا ساقتاۋ ءۇشىن، بارىنە بىردەي قولدى ءبىر سىلتەۋگە دە بولمايدى.
«الاش ايناسى»
