شەتەلدە ءبىلىم الۋدىڭ جاڭا مۇمكىندىكتەرى اشىلادى

جىل قورىتىندىسىن شىعارعان ق ر ءبىلىم جانە عىلىم مينيسترلىگىنىڭ مالىمەتىنشە، جوعارى بىلىكتى كادرلاردى شەتەلدە وقىتۋدىڭ جاڭا مۇمكىندىكتەرى تۋىپ وتىر. قازىر «بولاشاق» باعدارلاماسى تۇلەكتەرى ەش قيىندىقسىز كەز كەلگەن شەتەلدىڭ وزىق وقۋ ورىندارىندا ءوز بىلىمدەرىن ماگيستراتۋرا مەن دوكتارانتۋرادا جالعاستىرۋدا. جوعارعى وقۋ ورىندارىنىڭ باسەكەگە قابىلەتتىلىگىن انىقتايتىن ەڭ بەدەلدى QS رەيتينگى بويىنشا قازاقستاننىڭ 9 ۋنيۆەرسيتەتى الەمدەگى ەڭ ۇزدىك جوعارى وقۋ ورىندارىنىڭ قاتارىنا ەندى.

ءاسيما بيمەندينا، ق ر پارلامەنتى ءماجىلىسىنىڭ دەپۋتاتى: - ەلباسى «نۇرلى جول» جولداۋىندا 10 جوعارى وقۋ ورنىنا ەرەكشە كوڭىل ءبولىپ، ماتەريالدىق جاعداي جاساۋ كەرەك ەكەندىگىن ايتتى. ءبىز دامىعان 30 ەلدىڭ قاتارىنا كىرەمىز دەسەك، حالىقارالىق ستاندارتقا ساي بولۋىمىز كەرەك. سوندىقتان ءبىزدىڭ بالالار ەڭ بەلگىلى جوعارى وقۋ ورىندارىندا دا ءبىلىم الۋى كەرەك. 2014-جىلدىڭ تاعى ءبىر جەتىستىگى پولشا، فرانسيا مەملەكەتتەرىمەن ءبىلىم سالاسىندا ۇكىمەت ارالىق دەڭگەيدەگى كەلىسىم-شارتتارعا قول قويىلدى.

اقەركە ابىلايحان، ق ر بعم دەپارتامەنت ديرەكتورىنىڭ ورىنباسارى: - مىسالى، فرانسيادا ءبىلىم الۋ ءۇشىن ءبىزدىڭ ورتا مەكتەپتەردى بىتىرگەن تۇلەكتەردىڭ ورتا ءبىلىم تۋرالى اتتەستاتى جەتكىلىكتى، ياعني ەكى مەملەكەت اراسىندا ورتا ءبىلىم تۋرالى قۇجاتتاردى بىردەن تانۋ تۋرالى جۇمىستار جۇرگىزىلدى. پولشا مەملەكەتىمەن ماماندار الماسۋ، ستۋدەنتەرگە ستيپەنديا بەرۋ جونىندەگى كەلىسىم-شارتقا قول قويىلدى. ۆەنگرياعا وسى ەل ۇكىمەتىنىڭ ستيپەندياسىمەن 40 وقۋشى العاش رەت ىرىكتەلىپ جىبەرىلدى. سونداي-اق 2014-جىلى بايقوڭىر قالاسىنداعى 6 مەكتەپ پەن 1 بالاباقشانى قازاقستاننىڭ ءبىلىم بەرۋ جۇيەسىنە وتكىزۋ تۋرالى كەلىسىمگە قول قويىلدى.

ولار بۇعان دەيىن رەسەيلىك ءبىلىم بەرۋ سالاسىنا قاراستى بولىپ كەلگەن. كەلەسى جىلدان باستاپ بۇل وقۋ ورىندارى قازاقستاندىق ستاندارتتى وقىتۋ جۇيەسىنە كوشەدى.

اۆتورلارى: ك. ءابىلقاس ۇلى، جانىبەك داۋلەتبەك

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى