بيىل ەلىمىزدە تۇسىرىلگەن ۇزدىك فيلمدەردىڭ ءتىزىمى جاسالدى
ولاردىڭ اراسىندا كومەديا جانرىندا تۇسىرىلگەن فيلمدەر كورەرمەن قىزىعۋشىلىعىن تۋدىردى.
بيىل ەلىمىزدە تۇسىرىلگەن ۇزدىك فيلمدەردىڭ ءتىزىمى جاسالدى
«ابايلاڭىز، سيىر!» («وستوروجنو، كوروۆا!») فيلمى بيىل ەڭ كوپ تالقىعا سالىنعان تۋىندىلاردىڭ ءبىرى. بيۋدجەتى 500 مىڭ دوللاردى قۇرايتىن كارتينانىڭ رەجيسسەرى اسقار ۇزابايەۆ، پروديۋسەرى بايان ەسەنتايەۆا.
كوپشىلىك اسىعا كۇتكەن وتاندىق رومانتيكالىق كومەديا پروكاتقا ناۋرىز ايىندا شىقتى. باستى رولدەردى بايان ەسەنتايەۆا، ازامات ساتىبالدى، ايگۇل يمانبايەۆا، ازات سەيىتمەتوۆ، ءابۋناسىر سەرىكوۆ سومداعان كومەديا كينوتەاترلاردا ءبىر اي بويى كورسەتىلدى.
فيلمنىڭ جەلىسىنە قىسقاشا توقتالساق، قاتارلاستارى ۇنەمى «سيىر» دەپ كەلەمەجدەپ، مازاق ەتەتىن ايگۇل ەسىمدى سەمىز قىز اراعا كوپ جىلدار سالىپ ارتىق سالماقتان ارىلعان كەربەز سۇلۋ، جەكە مۇناي كومپانياسى بار داۋلەتتى ايەلگە اينالىپ شىعا كەلەدى.
كورەرمەننىڭ دۋ كۇلكىسىن تۋدىرعان ۇتىمدى تۇستارى، ەستە قالار قىزىقتى ساتتەرى جەتەرلىك. ءتىپتى، "پاتامۋشتا، پاتامۋشتا" دەگەن «تانىمال تىركەس» تە كومەديادا ورنىمەن ايتىلىپ، ەرىكسىز ەزۋ تارتقىزدى. بۇدان بولەك، فيلمنىڭ اكتەرلەر قۇرامى وتە جاقسى ىرىكتەلگەن.
بايان حانىمنىڭ ءونىمىن قاتتى سىناعاندار دا تابىلىپ، «ابايلاڭىز، سيىردى» تاربيەسىزدىكتىڭ وزىق ۇلگىسى، قازاق مەنتاليتەتىنە جات، «سوڭىندا الار وي مەن بەرەر ماعىناسى جوق ساپاسىز كينولاردىڭ قاتارىنان ورىن الاتىنى ءسوزسىز» دەستى.
بيىل قازاقستان كينوپروكاتىندا رەكورد جاساعان فيلم - بۇل «ءسابينا كەلىن» ("كەلينكا سابينا"). نۇرتاس ادامبايەۆتىڭ العاشقى كومەدياسى 5 كۇننىڭ ىشىندە 112 ميلليون تەڭگە جيناعان. وسىلايشا، فيلم ءوز بيۋدجەتىنەن ەكى ەسە ارتىق تابىس تاپتى. فيلم رەجيسسەرىنىڭ ءوزى مۇندايدى كۇتپەگەنىن مويىندادى.
"مەن ءدال وسىنداي تابىستى كۇتپەپ ەدىم، فيلم كورەرمەندەرگە ۇنايدى دەپ قانا بولجاعانىم بار. الايدا، بيلەتتەرگە كەزەك بولادى دەگەن ءۇش ۇيىقتاسام تۇسىمە دە كىرمەپتى. كەي ادامدار سەانسقا بىرنەشە كۇن بويى كىرە الماي جۇرگەندەرىن جازادى"، - دەپ اعىنان جارىلدى نۇرتاس ادامبايەۆ سۇحباتتارىنىڭ بىرىندە.
رەتسەنزەنتتەر وتە قىزىقتى كينو، "بىردە شىنايى ومىرمەن ۇيلەسەتىن، بىردە تىپتەن اقىلعا سىيمايتىن ازىلدەرى بار جەڭىل كومەديا، دەسەك تە ونىڭ دا ءوز ايتار ءمورالى بار" دەگەن باعا بەردى. ءبىراق، ازىلدەرى مەن وقيعالارى "KZلانديا"- دان سول كۇيىندە دەرلىك كوشىرىلىپ الىنعانى وكىنىش تۋدىرادى.
قاراشا ايىندا پروكاتقا قايىرجان ورىنبەكوۆتىڭ "قازاقشا توناۋى" ("وگرابلەنيە پو- كازاحسكي") تۋىندىسى شىقتى. ءفيلمنىڭ بيۋدجەتى - 2 ميلليون دوللار.
قىلمىستىق كومەديادا باستى رولدەردە بايكەنجە بەلبايەۆ، ەرىك جولجاقسىنوۆ، تولەپبەرگەن بايساقالوۆ، ەربولات توعىزاقوۆ، جاندوس ايباسوۆ، ارۋجان جازىلبەكوۆا سىندى اكتەرلەر وينايدى. فيلم پروكاتتان 13 ميلليون تەڭگەدان استام تابىس ءتۇسىرىپتى.
كارتينادا بانك توناپ، باستارى بالەگە قالعان ءتورت دوس جىگىتتىڭ تاعدىرى باياندالادى. جاقسى ستسەناريي، اكتەرلەردىڭ ويىنى، كينوداعى ەففەكتىلەر، ەڭ باستىسى، قازاقي ءازىل- قالجىڭدى كورەرمەندەر جوعارى باعالادى. ساپالى شىققان تۋىندى، وتاندىق كينەماتوگرافيانىڭ جاڭا بەتبۇرىسى انىق بايقالادى.
"قازاق فيلم" كينوستۋدياسى بيىلعى جىلى "زاگوۆور وبەرونا" ءفيلمىن جارىققا شىعاردى. بۇل بويەۆيك - جاس رەجيسسەر ايدار باتتالوۆتىڭ العاشقى جۇمىسى.
باستى رولدەردە جاس اكتەرلەر وينايدى، سونداي- اق رەجيسسەر ءبىرقاتار بەلگىلى قازاقستاندىق اكتەرلەردى دە جيناعان. ءفيلمدى دايىنداۋ بارىسىندا مونتاج رەجيسسەرى كريستوفەر بەلل ("ۋلتيماتۋم بورنا"، "جاۋجۇرەك مىڭ بالا") ارنايى شاقىرىلىپتى. كارتينا سيۋجەتى بويىنشا، قازاقستاندا "وبەرون" دەپ اتالاتىن وتە سيرەك كەزدەسەتىن مەتالل تابىلادى.
جەمقور شەنەۋنىكتەر مەن حالىقارالىق قىلمىسكەرلەر ەلەمەنتتى شەتەلگە شىعارىپ، ءىرى اقشاعا ساتىپ جىبەرۋدى كوزدەيدى. ولاردى شىڭعىس ارلانوۆ باستاعان بارلاۋشىلار توقتاتپاق بولادى.
"زاگوۆور وبەرونا" ءفيلمنىڭ سپەتسەففەكتىلەرى شامامەن 15 پايىزعا كومپيۋتەرلىك گرافيكا ارقىلى جاسالعان، ءبىراق كەيبىر جارىلىستاردى شىنايى ورىنداۋعا تۋرا كەلگەن. مۇنداي كورىنىستەردى تۇسىرۋگە ەلىمىزدىڭ قورعانىس مينيسترلىگى كومەك كورسەتىپتى. كەيبىر كادرلارعا اسكەريلەر قاتىسقان.
ايتا كەتەيىك، فيلمنىڭ ستسەناريىن قورعانىس ەكس-ءمينيسترى، قازىرگى استانا قالاسىنىڭ اكىمى ادىلبەك جاقسىبەكوۆ جازدى.
"قازاق فيلم" ستۋدياسى بيىل ۇسىنعان تاعى ءبىر فيلم - "ەلەس قۋعان سايىپقىران" ("وحوتا زا پريزراكوم") فانتاستيكالىق بويەۆيگى 30 - قاڭتاردا جارىق كوردى. وعان سانجار ماديەۆ، اسەل ساعاتوۆا سەكىلدى وتاندىق اكتەرلەرمەن قاتار، نيكيتا پرەسنياكوۆ، ارماند اسسانتە، كريستاننا لوكەن سەكىلدى شەتەلدىك مايتالماندار دا قاتىستى.
بۇل فيلمدى تۇسىرۋگە قوماقتى بيۋدجەت - 4 ميلليون دوللاردان استام قاراجات جۇمسالدى. ءبىراق، مارينا كۋناروۆانىڭ كارتيناسىنىڭ وتاندىق كينوپروكاتتا جولى بولمادى.
بيىلعى جىلى شىققان سونى فيلمدەردىڭ ءبىرى - "فۋگا. دوروگا ۆ نيكۋدا". بۇل تاۋەلسىز رەجيسسەرلەر سامات بازىحانوۆ پەن ەركەبۇلان جولداسوۆ تۇسىرگەن ميستيكالىق تريللەر. فيلم فۋگا، ياعني ەستەن ايىراتىن پسيحولوگيالىق دەرتكە شالدىققان مايا ەسىمدى بويجەتكەن تۋرالى.
رەجيسسەر ەركىن راقىشيەۆ بيىل كورەرمەندەر نازارىنا "م- اگەنت" قورقىنىشتى ءفيلمىن ۇسىندى. فيلمنىڭ باستى كەيىپكەرلەرى - جاقسى وتباسىنان شىققان الاڭسىز ستۋدەنتتەر.
بىردە ولار تۇندە ابايسىزدا كولىكتەرىمەن ءبىر جاس قىزدى قاعىپ كەتەدى. پوليتسياعا حابار بەرۋدەن قورىققان ولار قىزدىڭ دەنەسىن قالانىڭ شەتىنە اپارىپ، سول جەردە تاستاپ كەتەدى.
جاس بالالار وسىلايشا قىلمىستىڭ ءىزىن جاسىردىق دەپ ۇمىتتەنەدى. الايدا ولار قۇپيا جاعدايدا بىرىنەن سوڭ ءبىرى ولە باستايدى. قالادا الەۋمەتتىك جەلىدەگى "اگەنت" ارقىلى ادامدارمەن تانىسىپ، ولاردى ءولتىرىپ جۇرگەن مانياك جايىندا سىبىس تارايدى. فيلم ءبىز ءۇشىن تىڭ جانردا تۇسىرىلگەندىكتەن، سىنعا كوپ ىلىكتى.
20 ناۋرىزدا شىققان ەرمەك تۇرسىنوۆتىڭ "كەمپىر" كومەدياسى دا كوپشىلىكتىڭ كوڭىلىنەن شىعا قويمادى.
جىل سوڭىندا "ەلباسى جولى" كينوەپوپەياسىنىڭ ءتورتىنشى ءبولىمى - "تىعىرىقتان جول تاپقان" ءفيلمى كورەرمەنگە جول تارتتى.
مىنەكي، 2014 - جىلى تۇسىرىلگەن وتاندىق فيلمدەردىڭ ءبىرشاماسىنا شولۋ جاسادىق. اراسىندا ءساتتىسى دە، سىنعا ۇشىراعانى دا كەزدەسەدى. نەگىزى، قانداي وتاندىق كينوتۋىندى جارىق كورمەسىن، قۋانۋعا سەبەپ بار. ول قازاق كينەماتوگرافياسى تۇرالاپ قالماي، دامىپ جاتقانىن كورسەتەدى.
