قازاقستان جۇلدىزدارىنىڭ جاڭا جىلدىق قۇتتىقتاۋلارى
ءاربىر شاڭىراققا شاتتىق پەن باقىت، ءاربىر جانعا مىقتى دەنساۋلىق، ەلىمىزگە بەيبىتشىلىك تىلەيمىن. اق نيەتپەن تىلەگەن اپپاق ارماندارىڭىز ورىندالسىن. ونەرىمىز ورلەپ، مارتەبەمىز اسقاقتاپ، كەلەر جىلى تابىستان تابىسقا جەتە بەرەيىك.
ساكەن مايعازيەۆ، ءانشى: - قابىرعالى قازاق ەلىن جاڭا جىل مەرەكەسىمەن قۇتتىقتايمىن. جاڭا 2015 -جىلدا جاعىمدى جاڭالىقتار مەن تەلەگەي تابىس مول بولسىن! ءاربىر يگى ىستەر مەن جاڭا باستامالارىڭىزعا ساتتىلىك سەرىك بولسىن، ءار شاڭىراققا باياندى باقىت پەن باق- بەرەكە اكەلسىن! قوي جىلى مەرەكەلى، بەرەكەلى بولىپ، مەرەيىمىز ۇستەم، بەدەلىمىز بيىكتەي بەرۋىن تىلەيمىن.
قاجىمۇرات شەشەنقۇل، ءانشى: - قوي جىلى قوي ۇستىنە بوزتورعاي جۇمىرتقالاعان قۇتتى، بەرەكەلى، مامىراجاي جىل بولسىن. بارشا قازاق حالقىن، وتانداستارىمدى جاڭا جىلمەن شىن جۇرەكتەن قۇتتىقتايمىن. ەلىمىزدە تىنىشتىق، بەيبىتشىلىك بولسىن. ونەر جولىندا جۇرگەن ارىپتەستەرىمە حالقىمىزدى ادەمى اندەرىڭىزبەن قۋانتا بەرىڭىزدەر دەگىم كەلەدى. قازاق حالقىنىڭ كول- گوسىر كوڭىلى جاڭا جىلدا كوتەرىڭكى بولسىن. توي- دۋماندا جولىعايىق.
جەڭىس ىسقاقوۆا، ءانشى: - بارشامىزدان جاڭا جىلدان جاقسىلىق كۇتەمىز عوي. مەن شىن جۇرەگىممەن جاڭا جىلدا بارشالارىڭىزدىڭ ارماندارىڭىزدىڭ ورىندالۋىن تىلەيمىن. ءوزىمىزدىڭ بويىمىزدا بار جاقسىلىقتى، قۋانىشىمىزدى، باقىتىمىزدى جاڭا جىلعا الا كەتەيىك، جاماندىق اتاۋلىنى ەسكى جىلعا قالدىرايىق. ەلىمىز امان، جۇرتىمىز تىنىش بولعاي! قوي جىلى بەرەكە مەن بايلىقتىڭ، تاتۋلىق پەن بىرلىكتىڭ جىلى بولسىن!
گۇلناز نۇربالينا: - قازاق ءۇشىن قوي جىلى قۇتتى جىل عوي. ەگەمەندىگىمىزدى دە قوي جىلى الدىق. جاڭا جىلدا باق- بەرەكە، شالقار شابىت، كوتەرىڭكى كوڭىل- كۇي تىلەيمىز. ەلىمىزدىڭ ازاماتتارىنا زور دەنساۋلىق، وتباسىلارىنا تاتۋلىق تىلەيمىن. جەتىستىكتەن جەتىستىكتەرگە جەتىپ، ەلىمىزدىڭ بەدەلى ارتا بەرسىن. جاڭا جىلدا جاس وتباسىلار، جاڭا تۋعان نارسەتەلەر كوبەيسىن، ۇرپاقتارىمىز ءوسىپ- ءونسىن. ءاربىر جانعا ەڭبەكتەرىنە تابىس، داستارحاندارىنا بەرەكە تىلەيمىن.
سابينا التىنبەكوۆا، سپورتشى: - قىمباتتى جەرلەستەرىم، سىزدەردى جاڭا جىل مەرەكەسىمەن قۇتتىقتايمىن. بارلىق ارماندارىڭىز جاڭا جىلدا ورىندالسىن. ءوزىمنىڭ تۋعان- تۋىستارىمدى، دوس- جاراندارىمدى، وزىمە تىلەۋلەس جانداردى، بارشا حالقىمىزدى سيقىرلى مەرەكەمەن قۇتتىقتاي وتىرىپ، اشىق اسپان، شات- شادىمان كوڭىل- كۇي تىلەيمىن. جاڭا جىلدا تەك جاقسىلىقتار مول بولسىن، ماقساتتارىڭىزعا جەتىڭىزدەر!
دايىنداعان اينۇر نۇرسابەت
«الاش ايناسى»
