مەن مىڭ ءولىپ، مىڭ تىرىلگەن قازاقتىڭ ءبىرىمىن - ۇلى وتان سوعىسىنىڭ ارداگەرى ب. امانگەلديەۆ

«بۇگىنگى شاراعا ريزاشىلىعىم شەكسىز. ەلباسىنىڭ ءبىزدى قۇتتىقتاپ، قۇرمەت كورسەتكەنى ءبىز ءۇشىن ۇلكەن توي! سوندىقتان، ەلباسىنا شەكسىز راحمەتىمدى ايتامىن. سونىمەن قاتار، بۇگىن وزدىگىمەن جۇرە الاتىن ارداگەرلەردىڭ باسىن قوسىپ، سىي-سىياپات كورسەتكەن اكىمدىككە دە ريزامىن»، - ب. امانگەلديەۆ.

بيسۇلتان اعا، قان مايداندا ءبىر ەمەس، ءۇش اسكەر قاتارىندا سوعىسقان جاۋىنگەر.

«مەن سوعىسقا 1942-جىلى 17 جاستان ەندى اسقان شاعىمدا اتتاندىم. ءبىرىنشى ۋكراينا مايدانىندا جاياۋ اسكەر قاتارىندا، اۆتوماتشى بولىپ سوعىستىم. كەيىن، تانك ۋچيليشەسىنە وقۋعا جىبەرىلدىم. ءۇشىنشى تانك ارمياسىنىڭ ساپىندا ۋكراينا جەرىندە سوعىستىم. تەرنوپول قالاسىن جاۋدان ازت ەتۋ بارىسىندا اۋىر جاراقات الدىم. التى اي گوسپيتالدا جاتتىم. دارىگەرلەر مەن ءولىم اۋزىنان اراشالاپ قالدى. كەيىن، ەكىنشى اسكەري- اۋە كۇشتەرى ارمياسىنىڭ ساپىندا راديست بولىپ قىزمەت ارتقاردىم. پولشانى، رۋمىنيا، چەحوسلوۆاكيانى جانە ۆەنگريانى جاۋدان ازات ەتتىك. جەڭىس كۇنىن ۆەنگريادا قارسى الدىم. ءبىراق، مەن ءۇشىن سوعىس ءالى اياقتالعان جوق ەدى. 1945-جىلدىڭ قازان ايىنا دەيىن ۆەنگريا جەرىندە جاۋدىڭ قالعان-قۇتقان اسكەرلەرىمەن سوعىستىق. تەك قاراشا ايىندا عانا ەلگە ورالدىم»، - دەيدى ب. امانگەلديەۆ.

بيسۇلتان اعا، قىزىل جۇلدىز وردەنىنىڭ جانە باسقا كوپتەگەن مەدالداردىڭ يەگەرى.

ەلگە ورالعان سوڭ، ول تىڭ كوتەرۋ ىسىنە ارالاستى. كەيىن، قولىنا قالام الىپ، «سوتسياليستىك قازاقستان»، «قازاقستان پيونەرى» گازەتتەرىندە ەڭبەك ەتتى. بۇدان سوڭ، 38 جىل ءومىرىن قازتاگ اگەنتتىگىنە ارنادى. مۇندا ول اۋدارما ءبولىمىنىڭ رەداكتورى، وداقتىق جانە شەتەلدىك اقپارات باس رەداكسياسىنىڭ مەڭگەرۋشىسى بولىپ قىزمەت اتقاردى. بيىل 89 جاسقا تولعان بيسۇلتان اعا، ءالى تىڭ.

«الداعى جىلى، 90 جاسىمدا ۇلى جەڭىستىڭ 70 جىلدىق مەرەيتويىن كورسەم»، - دەپ ارماندايدى.

اۆتور: جاپپاربەرگەن ايبوتا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى