ۇرپاققا ۇلگى بولار قامقورلىق
وسى ماقساتتا اتقارىلاتىن شارالاردىڭ جوسپارىن دايىنداپ، ناقتى ىستەردى ورىنداۋ كەرەكتىگىن بارلىق دەنگەيدەگى باسشىلارعا تاپسىردى.
قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى نازاربايەۆتىڭ ۇلى وتان سوعىسى ارداگەرلەرىن قولداۋ بويىنشا جاريالاعان اكتسياسى ءبىزدىڭ وبلىسىمىزدىڭ ارداگەرلەرىن قاتتى قۋانتتى، دەدى تاراز قالاسىندا تۇراتىن 92 جاستاعى ارداگەر مەكتەپ دۇيسەمبيەۆ.
بۇل ءبىزدى ەرەكشە قۋانىشقا بولەدى دەسەك ارتىق ايتقاندىق ەمەس. ماسەلە، ءبىز الاتىن سىيلىقتار، ماتەريالدىق يگىلىكتەردە بولىپ تۇرعان جوق. «جاقسى ءسوز جان سەمىرتەدى » دەگەندەي، ەڭ باستى قۇندىلىق - بىزگە ءبولىنىپ جاتقان كوڭىلدە.
بۇل شارانىڭ زور قايتارىمى بولاتىنى انىق. ءبىزدىڭ ەلىمىزدى ءارى قاراي وركەندەتىن دە، گۇلدەندىرەتىن دە جاستار. ولاردى پاتريوتيزم رۋحىندا تاربيەلەۋدىڭ ماڭىزى ەرەكشە. وسى بەيبىت كۇندى، جەرىمىزدىڭ تۇتاستىعىن، حالقىمىزدىڭ اماندىعىن قامتاماسىز ەتۋدە قانشاما ازاماتتارىمىز قۇربان بولدى. ولاردىڭ ارتارىندا ايەلدەرى جەسىر، بالالارى جەتىم قالىپ، كوپتەگەن اۋىلدارىمىز قۇلازىپ قالعان ەدى. بۇنداي قىيىندىقتى حالقىمىز ەندى كورمەسە ەكەن دەپ تىلەيمىز. سوندىقتان، قازىرگى جەتكەن جەتىستىكتەرىمىزدىڭ ءبارى حالىقتاردىڭ تاتۋلىعى مەن دوستىعىنىڭ ارقاسىندا، توگىلگەن قان مەن كوز جاسى ارقىلى كەلگەنىن جاس ۇرپاق ءبىلىپ، ءتۇسىنىپ ءوسۋى كەرەك.
ەلىمىزگە قاۋىپ تونگەن كەزدە « سەن ورىسسىڭ» ، « مەن قازاقپىن » ، « اناۋ وزبەك » ، «مىناۋ تاتار » دەمەي، جۇمىلعان جۇدىرىقتاي بولىپ جاۋعا قارسى تۇردىق. تاريحىمىزدان بەلگىلى - ر. قوشقاربايەۆ پەن گ. بۋلاتوۆتىڭ بىرلىگى ولاردىڭ رەيحستاگقا تۋ تىگۋىنە سەبەپشى بولدى. گەنەرال پانفيلوۆ پەن باۋىرجان مومىش ۇلىنىڭ سىيلاستىعى ماسكەۋدى جاۋ قولىنان الىپ قالۋعا مۇمكىندىك بەردى. قاسىم قايسەنوۆ پەن ۋكرايندىق پارتيزانداردىڭ ىنتىماقتى ارەكەتىنىڭ ارقاسىندا تالاي ەرلىك ىستەر جۇزەگە اسىرىلدى. بۇنىڭ ءبارى ەلدىڭ دامۋىنا نەگىز بولاتىن دوستىقتىڭ، سىيلاستىقتىڭ تاماشا مىسالدارى.
قازاقستان بۇگىندە تاۋەلسىز ەل رەتىندە دامىپ كەلەدى. ەلىمىزدىڭ بارلىق ازاماتتارى كونستيتۋتسيالىق نەگىزدە تەڭدىككە يە. بۇل مەملەكەت دامۋىنىڭ ەڭ باستى قاعيداسى - بىرلىك پەن كەلىسىمدى ساقتاۋدىڭ قۇرالى بولىپ تابىلادى. كەلەسى جىلى سول اتا زاڭىمىزدىڭ قابىلدانعانىنا جانە قازاقستان حالقى اسسامبلەياسىنا 20 جىل تولادى. وسىعان وراي قىرۋار ىستەر قولعا الىناتىن بولادى.
مەن وتان سوعىسىنىڭ ارداگەر رەتىندە ەلباسىنىڭ بارلىق باستامالارىن، ونىڭ ىشىندە جاقىندا عانا جاريالانعان « نۇرلى جول - بولاشاققا باستار جول» جولداۋىن ەرەكشە قولدايمىن. جولداۋلاردى جۇزەگە اسىرۋ ماقساتىندا جاستارىمىزدى ايانباي ەڭبەكتەنۋگە شاقىرامىن. ولار ءبىزدىڭ ەرلىك جىگەرىمىزدى بەيبىت كۇندە قولدانسا، ولاردىن ەرلىكتەرى سوعىستا ەمەس، ەڭبەكتە، عىلىم مەن مادەنيەت سالاسىندا، سپورتتا بولسا، ەلىمىزدىڭ الەمنىڭ دامىعان 30 ەلىنىڭ قاتارىنا كوپ ۇزاماي قوسىلاتىنىنا سەنىمىمىز كامىل.
