ماقپال ءجۇنىسوۆا: ەكى جىل ماعان ۇلكەن سىناق بولدى
ءانشى سوڭعى ەكى جىلدا وتاندىق تەلەارنالاردا شاقىرىلماعان قوناققا اينالعانىنا قاپالى. ءىرى ارنالاردىڭ اندەرىن قويمايتىنا رەنجيدى. ءتىپتى قازاق راديوسىنا دا اندەرى قابىلدانبايدى ەكەن.
«وتكەندە فاريزا اپامىزدى ەسكە الۋ كەشىندەگى كونسەرت «حابار» ارناسىنان كورسەتىلدى. مەنەن باسقا انشىلەردىڭ ءبارى بار، ارالارىندا تەك مەن جوقپىن.
ەلباسىنىڭ اتىنا حات جولدادىم. ول كىسىدەن «ەشقانداي كەدەرگى جوق» دەگەن جاۋاپ الدىم. قولدان جاسالعان كەدەرگى كىمنىڭ تاراپىنان بولعانىن بىلمەدىم. روزا رىمبايەۆا، ناعيما ەسقاليەۆا قاتىساتىن جاڭا جىلدىق كونسەرتكە دە سوڭعى ەكى جىلدان بەرى قاتىستىرىلعان ەمەسپىن. بارلىق انشىلەرگە ورىن بار، تەك ماعان ورىن جوق. قازاقستاندا، تۋعان ەلىمدە تۇرىپ جاتىرمىن. شەتتەتىلەتىندەي جاتجۇرتتىق ەمەسپىن. قايسى ءبىرىنىڭ ەسىگىن قاعايىن؟»، - دەيدى حالىقتىڭ ەركەسى.
ءانشى جەكەمەنشىك تەلەارنالاردىڭ اندا-ساندا كورسەتەتىنىن ايتادى.
مەن ءار اۋىلعا بارىپ، تۇسىندىرۋگە شامام جوق. ءارى تەلەارنا باسشىلارىنىڭ قايسى ءبىرىنىڭ ەسىگىن قاعايىن؟ قۇدايعا شۇكىر، ەلىمىزدەگى ءىرى قالالارعا بارىپ، جەكە كونسەرتىمدى ۇزبەي قويىپ ءجۇرمىن.
«ەلۋگە تولعان كەزدە «31 ارنا» كونسەرتىمدى بەردى. ولارعا العىسىمدى ايتامىن. «الماتى» تەلەارناسىنان كورسەتىپ ءجۇر قازىر. ءبىراق الماتىدان الشاق جاتقان ايماقتاردا ول ارنا حابار تاراتپايدى عوي. كوزدەن كەتكەسىن، كورەرمەندەر مەن تىڭدارماندار: «بۇل ماقپالعا نە بولدى؟ ونەردەن قول ءۇزدى مە؟ جالقاۋلانىپ كەتتى مە؟ حالىقتىڭ اراسىنان نەگە كورىنبەيدى؟»، - دەپ ويلايدى عوي.
مەن ءار اۋىلعا بارىپ، تۇسىندىرۋگە شامام جوق. ءارى تەلەارنا باسشىلارىنىڭ قايسىبىرىنىڭ ەسىگىن قاعايىن؟ قۇدايعا شۇكىر، ەلىمىزدەگى ءىرى قالالارعا بارىپ، جەكە كونتسەرتىمدى ۇزبەي قويىپ ءجۇرمىن. الايدا زاكەڭ بار كەزدەگىدەي مەنى شەنەۋنىكتەر قۇرمەتپەن كۇتىپ الىپ، شىعارىپ سالمايدى. كەرىسىنشە، اكىمدىكتىڭ قىزمەتكەرلەرى مەنى كورسە، اينالا قاشاتىن بولعان. كونسەرت قويۋعا ءوزىم بارىپ، ءوزىم كەلەتىن ءانشىمىن قازىر. باسقا قايدا بارايىن؟ ءدام-تۇز تارتقان جەرگە بارامىن، قۋانىشتارىنا ورتاقتاسسىن دەپ تويلارعا شاقىرادى حالىق»، - دەيدى ماقپال ءجۇنىسوۆا.
بيىلعى جىلدىڭ ءانشى جامان بولماعانىن ايتادى.
«كوڭىلىم تولادى. جاقسى ءارى جاڭا اندەر جازىلدى. استانا، الماتى، قاراعاندى، كوكشەتاۋ، شىمكەنت، تاراز سياقتى كوپتەگەن قالالاردا جەكە كونسەرتىمدى ۇيىمداستىرىپ، حالىقتىڭ الدىندا ەسەپ بەردىم. ءان جيناقتارىم جارىق كوردى»، - دەپ ءبولىستى ءانشى ونەرىندەگى سوڭعى جاڭالىقتارىمەن.
حالىق ءارتىسى سونداي-اق رەپەرتۋارىنا جاڭا 15 ءان قوسىلعانىن دا ايتا ءوتتى.
ماقپال ءجۇنىسوۆا توي ارقىلى كۇن كورەتىنىن، «قازاق كونسەرتتەن» ايلىق رەتىندە 62 مىڭ تەڭگە جالاقى الاتىنىن جاسىرمادى.
ءانشى تويلارعا اپتا سايىن بارمايتىنىن، كوبىنە گاسترولدىك ساپارلارمەن جۇرەتىنىن، سوندىقتان ءارى كەتسە ايىنا 3-4 تويعا شىعاتىنىن ايتتى.
«اسا تويشىل دا ەمەسپىن قازىر. دەنساۋلىعىم سىر بەرگەن. ومىرتقاعا سۋىق تيگەن، بيىك وكشەمەن كوپ ءجۇرىپ، ومىرتقاعا قاتتى سالماق تۇسكەن. ەندى جايتابان اياق كيىممەن ءجۇرىڭىز دەيدى. ساحناعا قالاي شىعام باكەنە بويىممەن؟ اۋىر كوتەرمەڭىز دەپ ەسكەرتكەن دارىگەرلەر. ءۇيدىڭ تازالىق جۇمىستارى، تاماق ءپىسىرۋ ت. ب. جۇمىستار مەنىڭ موينىمدا. ءبارىن ءوزىم ىستەيتىن قازاقپىن. ءجيى اۋىر كوتەرۋگە دە تۋرا كەلەدى. ءبىر كۇنى ۇشىپ ءتۇسىپ، قاتتى اۋىردىم. ەندى كۇتىممەن ءجۇرمىن»، - دەيدى ءانشى.
