جاڭاجىلدىق سىيلىق: اكەسىنىڭ قىزىنا جازعان حاتى
ءبىراق بيىل مەن ساعان توزبايتىن جانە ماڭگىلىككە جانىڭدا بولاتىن سىي جاساعىم كەلىپ وتىر. ءار جىل سايىن مەنى ەسىڭە سالاتىن ەرەكشە سىيلىق بولسىن دەپ ەدىم.
نە سىيلاسام ەكەن... كوپ ويلانىپ، ماعان وڭاي شەشىلمەگەن جۇمباقتىڭ جاۋابى، بولاشاعىڭا ازىق بولاتىن ومىرلىك شىندىقپەن بولىسكەندى ءجون كوردىم. بۇل سىي - شىن جۇرەگىممەن تابىستالاتىن سىيلىقتاردىڭ ءبىرى.
ەگەر وسى سىيلىعىمدى ىقىلاسپەن قابىل الىپ، ونى كەرەگىڭە جاراتساڭ، ومىردەگى بارلىق جەتىستىكتىڭ ەسىگى ايقارا اشىلادى. تاعدىر دايىنداپ قويعان قيىندىقتى جەڭىپ، قۋانىش پەن جەڭىستىڭ ءتاتتى ءدامىن سوندا شىن سەزىنەسىڭ.
ساعان ەشكىم ەشنارسە قارىز ەمەس.
قالايشا؟ بۇل قاعيدا مەنىڭ ءومىرىمدى قالاي جەڭىلدەتەدى دەيسىڭ عوي؟
ءيا، سەن بۇل نارسەنى ازىرشە تۇسىنبەۋىڭ مۇمكىن. بالاپانىم، بۇل دۇنيەدە سەن ءۇشىن ەشكىم ءومىر سۇرمەيدى. اركىم ءوزى ءۇشىن، ءوز باقىتى ءۇشىن ءومىر سۇرەدى. سەن وسى نارسەنى نەعۇرلىم ەرتە تۇسىنسەڭ، سوعۇرلىم ءومىرىڭ جەڭىل ءارى باقىتتى عۇمىر كەشەسىڭ. مەنى بىرەۋ باقىتتى قىلادى دەگەن ويدان ەرتە ارىلاسىڭ. راسىمەن، ەشكىم دە سەنى ءدال وزىڭدەي باقىتتى قىلا المايدى.
سەنى جاقسى كورىپ، ۇناتۋعا ەشكىم مىندەتتى ەمەس. ەگەر سەنى اينالاڭداعىلار باعالاپ جاتسا، ءوزىڭنىڭ جەتكەن جەتىستىگىڭ دەپ ءبىل. جانە قاي قىرىڭدى ۇناتاتىنىن باقىلاپ، سونى ءارى قاراي دامىتۋعا تىرىس. ساعان كوڭىل ءبولىپ، سەنى باعالاعان ادامعا ءدايىم ريزا بول. دەمەك، سەن ول قادىرلەيتىن قىمبات جانداردىڭ قاتارىنداسىڭ. سەنىڭ تاراپىڭا جاسالعان يگى ىستەردىڭ بارلىعى ساعان بىرەۋ مىندەتتى بولعاننان ەمەس، جۇرەك قالاۋىمەن جاسالعان دۇنيەلەر دەپ ءتۇسىن. سونداي-اق سەنى ەشكىم سىيلاۋعا، قۇرمەتتەۋگە مىندەتتى ەمەس. كەي ادامدار ساعان جىلى شىراي تانىتپاۋى دا مۇمكىن. بۇل دا ەسىڭدە بولسىن. سەنى اسا جاقتىرمايتىن ادامداردان الىس جۇرۋگە تىرىس. الايدا سەن دە ولارعا ءدال سولاي جاۋاپ قايتارۋدان اۋلاق بول.
قىزىم، تاعى دا ايتايىن، ساعان ەشكىم ەشنارسە قارىز ەمەس.
سەن ءوزىڭ ءۇشىن جاقسى ادام بولۋعا تىرىسۋىڭ كەرەك. سول كەزدە عانا جانىڭداعى ادامداردىڭ ساعان دەگەن كوزقاراسى ءتۇزۋ بولادى. بارلىعى سەنىمەن تىلدەسۋگە، جان دۇنيەسىمەن بولىسۋگە اسىعادى. ءبىراق بىرەۋدىڭ باسىنداعى قيىنشىلىقتى وزىڭە مەنشىكتەپ الۋعا اسىقپا. ءار ادام ءوزى ءۇشىن ءومىر سۇرەتىنىن ۇمىتپا!
سەنى قورشاعان ادامداردىڭ قۇرمەتىن، ماحابباتىن، سەنىمىن اقتاۋىڭ قاجەت. سونى تۇسىنگەننەن سوڭ، ومىردەن تاڭعاجايىپ نارسەنى كۇتىپ جۇرە بەرمەي، ءوزىڭ ارەكەت ەتەسىڭ. ەشكىم ساعان ومىرىندەگى وقيعانى، ويىن، سەزىمىن ايتىپ، بولىسۋگە مىندەتتى ەمەس. ال ەگەر ساعان ايتىپ، اشىلىپ جاتسا، سەن ادامنىڭ سەنىمىنە كىرىپ، ونى تىڭداۋعا لايىقسىڭ دەگەن ءسوز. ءجاي عانا، سول ءۇشىن دە سەن ءوزىڭدى باعالاۋىڭا، ءوزىڭدى-ءوزىڭ ماقتان تۇتۋىڭا بولادى. بۇلاردىڭ بارلىعىن قالىپتى جاعداي دەپ قابىلداۋدان اۋلاق بول. بارلىعىنىڭ قۇنىن بىلۋگە تىرىس.
مەن ساعان ايتقان دۇنيەلەرىمدى ارينە، كەش ءتۇسىندىم. ماعان ەشكىم ەشنارسە قارىز ەمەس ەكەنىن ۇققان كەزدە، ارقامنان اۋىر جۇك تۇسكەندەي بولدى. مەنىڭ ومىردەگى كەزىككەن ساتسىزدىكتەرىم «ماعان بارلىعى مىندەتتى» دەگەن قاعيدانىڭ كەسىرىنەن ەدى. راسىمەن، جايدان-جاي مەنى ەشكىم قۇرمەتتەۋگە، سۇيۋگە، ماعان ۇيرەتۋگە مىندەتتى ەمەس. وسىنى تولىق تۇسىنگەن سوڭ، ناعىز دوستى، شىنايى ماحابباتتى، ىسكەر كاسىپكەرلەر مەن كوپ كليەنت تاپتىم. بارلىعى العا جىلجىپ، ءوزىمدى ناعىز باقىتتى ادام سەزىندىم. ءومىرىمنىڭ جارتىسىنا دەيىن تۇسىنبەي، قينالعانىم ءۇشىن مەن تەك ءوزىمدى عانا كىنالاي الامىن. وسى قاتەلىگىمدى سەن قايتالاماسا ەكەن دەپ جاراتقاننان تىلەپ، مىنا حاتتى سەنىڭ قولىڭا تابىستاعىم كەلىپ وتىر. ءار مەرەكە سايىن مەنى ەسىڭە الىپ، وزىڭە جاڭا نارسە اشارىڭا سەنىمدىمىن.
زور ماحابباتپەن اكەڭ!»
1966 جىلى 25- جەلتوقسان.
حات يەسى: گارري براۋن
massaget.kz
