بەسىنشى ماۋسىمدا «استانا ارلاندارى» نامىستى قولدان بەرمەيدى

الماتىنىڭ ىرگەسىندە، ياعني تالعار قالاسىنداعى اق-بۇلاق سپورتتىق-ساۋىقتىرۋ كەشەنىنىڭ جانىنا سالىنعان AIBA- نىڭ بۇكىل الەمدىك بوكس اكادەمياسىندا «ارلانداردىڭ» ماۋسىم اشار باسپا ءسوز جيىنى ءوتتى. وزدەرىڭىز بىلەسىزدەر، «Astana Arlans» كلۋبى بيىل بۇكىل الەمدىك بوكس سەرياسىنىڭ (WSB) بەسىنشى ماۋسىمىنا قاتىسادى.

باسپا ءسوز جيىنىنا «استانا» پ  ك س ك باسشىسىنىڭ ورىنباسارى يۋري مەلنيچەنكو، بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ، سونداي-اق «Astana Arlans» كلۋبىنىڭ سۋ جاڭا باسشىلارى، ياعني باس ديرەكتورى سەرىك ساپيەۆ پەن باس باپكەرى مارات جاقيەۆ قاتىستى.

ەڭ ءبىرىنشى بولىپ ءسوز سويلەگەن يۋري مەلنيچەنكو بيىل كلۋب باسشىلارىنىڭ اۋىسقاندىعىن، باس ديرەكتور قىزمەتىنە ايگىلى بوكسشىمىز سەرىك ساپيەۆ بەكىتىلگەندىگىن تىلگە تيەك ەتتى. سودان سوڭ وسى جيىنعا قاتىسىپ وتىرعان، «Astana Arlans» كلۋبىنىڭ بۇرىنعى باس ديرەكتورى بولات مانكەنوۆتىڭ ەڭبەگىن جوعارى باعالاپ، العىس ءبىلدىردى.

ءارى ۇلتتىق قۇراما مەن «Astana Arlans» كلۋبى تىعىز بايلانىستا بولۋ ءۇشىن كوماندانىڭ باس باپكەرى دە اۋىستىرىلعاندىعىنا دا، بۇل قىزمەتكە وتاندىق بەدەلدى مامان مارات جاقيەۆتىڭ تاعايىندالعاندىعىنا دا توقتالىپ ءوتتى. ءبىراق بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆتىڭ «Astana Arlans» كلۋبىنا دا كەڭەسشى رەتىندە باس-كوز بولاتىندىعىن ايرىقشا اتاپ ءوتتى.

سەرىك ساپيەۆ ءوز سوزىندە «Astana Arlans» كلۋبىنىڭ بۇرىنعى باس ديرەكتورى بولات مانكەنوۆتىڭ ەرەن ەڭبەگىن ەرەكشە اتاپ ءوتىپ، جاسى ۇلكەن اعاسىنا كوپشىلىك الدىندا سىيلىق تابىستادى. ءارى بۇل كوماندانى وسىنداي دەڭگەيگە دەيىن كوتەرىپ كەتكەندىگىنە شەكسىز العىس ءبىلدىردى.

مىرزاعالي ايتجانوۆ «Astana Arlans» كلۋبىنىڭ ابىرويىن كوتەرە بەرۋگە تىرىساتىندىقتارىن، ءارى بيىل كوماندا قۇرامىنىڭ جارتىلاي وزگەرگەندىگىنە كوڭىل اۋداردى. كوماندا قۇرامىنىڭ نەگىزىن ءوز بوكسشىلارىمىزدىڭ قالايتىندىعىن، ال ۇلتتىق قۇراما مۇشەلەرىنىڭ وسى كلۋب ساپىندا جارتىلاي كاسىپقوي بوكس تاجىريبەسىنەن ءوتىپ تۇراتىندىعىن باسا ايتتى.

مارات جاقيەۆ تا وسى كلۋبتى جوعارى دەڭگەيگە كوتەرىپ كەتكەن، ءوزىنىڭ الدىندا وسى كلۋبتى جاتتىقتىرعان باپكەرلەرگە جۇرەكجاردى العىسىن ءبىلدىردى. ەندىگى ماقسات، «Astana Arlans» كلۋبىن وسى دەڭگەيىنەن ءتۇسىرىپ الماۋ كەرەك ەكەندىگىن دە جاسىرعان جوق. «مەجە - كلۋبتىڭ بۇعان دەيىنگى كورسەتكىشتەرىنەن تيتەي دە تومەن تۇسپەۋ»، - دەدى ول ءوز سوزىندە.

سودان سوڭ «Astana Arlans» كلۋبىنىڭ جاڭا باس ديرەكتورى سەرىك ساپيەۆ پەن جاڭا باس باپكەرى مارات جاقيەۆ كوماندا قۇرامىنا الىنعان بوكسشىلارعا رەسمي تۇردە كەلىسىم-شارتتارىن تابىس ەتتى.

اۆتور: نۇرعازى ساسايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى