ميكروفون جۇقپالى اۋرۋ تاراتۋى مۇمكىن - ماماندار
بۇل تۋرالى Tengrinews.kz ءتىلشىسىنىڭ رەسمي ساۋالىنا بەرگەن جاۋابىندا الماتى قالاسى تۇتىنۋشىلاردىڭ قۇقىقتارىن قورعاۋ دەپارتامەنتىنىڭ ماماندارى ايتتى.
مامانداردىڭ مالىمەتىنشە، ميكروفوندار، تەلەفون تۇتقاسى مەن كومپيۋتەر كلاۆياتۋراسى سياقتى كوپشىلىك تۇتىناتىن قۇرال-جابدىقتار جۇقپالى اۋرۋلاردى تاراتا الادى.
«وقۋلىقتاعى مالىمەتتەرگە سايكەس، پاتوگەندى ميكروبتار تەلەفون تۇتقالارىنان، كومپيۋتەر كلاۆياتۋراسىنان جانە ميكروفونداردان تابىلادى. وسىعان بايلانىستى ميكروفونداردا اۋا-تامشى جولىمەن (تۇماۋ، پاراگريپپ، ادەنوۆيرۋستى ينفەكسيا، قىزىلشا، ەپيدەميالىق پاروتيت، تۋبەركۋلەز جانە تاعى باسقا) نەمەسە تەرى اۋرۋلارى ارقىلى تارالاتىن قوزدىرۋشى ينفەكتسيالار (دەرماتوميكوز، قىشىما، سترەپتودەرميا) تابىلسا، وندا جۇقپالى اۋرۋلار شىعۋى مۇمكىن»، - دەلىنگەن مامانداردىڭ جاۋابىندا.
ايتا كەتەيىك، ميكروفوندى ونەر ادامدارى مەن بۇقارالىق اقپارات قۇرالدارىنىڭ وكىلدەرى كوپ پايدالانادى. اسىرەسە، ول - تەلەجۋرناليستەردىڭ كاسىبي قۇرالى. تەلەارنا قىزمەتكەرلەرىنىڭ ميكروفوندارى حالىقتىڭ كەز كەلگەن الەۋمەتتىك توبىنىڭ وكىلدەرىنە ۇسىنىلادى، ميكروفوندار ءتۇرلى ناۋقاس ادامداردىڭ سۇحباتىن جازىپ الۋعا دا قولدانىلاتىنىن ايتا كەتۋ كەرەك.
ميكروفوندى قىزمەتىندە كوپ پايدالاناتىن تەلەجۋرناليستەردىڭ ءبىرى مەيىرجان الىبەك ۇلى Tengrinews.kz تىلشىسىنە ەگەر سانيتار-ەپيدەميولوگ دارىگەرلەر ميكروفوننىڭ ادام دەنساۋلىعىنا قاۋىپتى ەكەنىن انىقتاسا، تەلەارنا مەن راديو باسشىلارى تاراپىنان قاۋىپسىزدىك شارالارى قولعا الىنۋى قاجەت ەكەنىن ايتتى.
«شىنىندا دا، مەن جاقىندا شەتەلدىك ءبىر باسىلىمنان ميكروفوننىڭ سابىن اركىمنىڭ ءبىر ۇستاۋىنان جۇقپالى اۋرۋلار تارايدى دەگەندى كوزىم شالىپ قالدى. ەگەر بۇل انىق بولسا، وندا جۋرناليستەر مەن تاسپاگەرلەردىڭ دەنساۋلىعى ءۇشىن قاۋىپسىزدىك شارالارى ەسكەرىلۋى كەرەك. جەكە باسىم كادىمگى ميكروفون ۇستاعاننان گورى كەۋدەگە ىلىنەتىن ىلمەك-ميكروفوندى تاققاندى ءجون سانايمىن.
ءبىراق وسى جەردە تازالىقتان بولەك، تاعى ءبىر ماسەلەنىڭ باسى قىلتيادى. وسى كۇندەرى سىمى شۇباتىلعان ميكروفوندار قولدانىستان شىعىپ، راديو-ميكروفون، راديو-پەتليچكا دەگەن شىعىپ جاتىر. ولاردىڭ دا ادام اعزاسىنا رادياتسيالىق زياندى ساۋلە شاشاتىن قاۋپى بار ەكەنى ايتىلا باستادى»، - دەيدى جۋرناليست. تەلەجۇرگىزۋشى وسى ايتىلعان ماسەلەلەر ب ا ق باسشىلارىن، اسىرەسە تەحنيكاعا جاۋاپتى باسشىلاردى ويلاندىرۋى ءتيىس ەكەنىن ايتتى.
تانىمال ءانشى، ق ر ەڭبەك سىڭىرگەن قايراتكەرى مەرۋەرت تۇسىپبايەۆا قاۋىپسىزدىك پەن ساقتىقتى ەسكەرۋمەن بىرگە، كوپشىلىك پايدالاناتىن ميكروفوندارعا قاتىستى بايبالام سالۋدىڭ دا قاجەتى جوق دەپ ەسەپتەيدى.
ونىڭ پىكىرىنشە، مۇنداي تۇجىرىمدار ادامدى جيىركەنشەكتىككە يتەرمەلەيدى.
«ميكروفون ۇستايتىن انشىلەر ءوز دەنساۋلىعىن قاداعالايدى جانە مەن وندا اسا قاۋىپتى جۇقپالى اۋرۋلار بولادى دەپ كۇدىكتەنبەيمىن. ءبىز انشىلەر اۋىلدىق جەرلەرگە دە، توي-تومالاققا دا بارامىز، ءارتۇرلى ادامدارمەن، تۇرمىسى تومەن دە، جوعارى دا ادامدارمەن ارالاسامىز، داستارقانداس بولامىز، كەسە-قاسىق اۋىسادى. ول جاقتاعى ىدىستىڭ ءبارى زارارسىزداندىرىلعان دەپ ويلامايمىن. ادام تازالىقتى ساقتاپ جۇرسە بولعانى. سوندىقتان ەشقاشان جيىركەنشەك بولماۋ كەرەك»، - دەدى تۇسىپبايەۆا.
