جات اعىمدارعا اربالعان، اداسقان جاستار تۋرالى قويىلىم ءوتتى - فوتو

 ۇلتىن ۇمىتىپ، وتانىن تارىك ەتكەن سول بەيباقتار تۋرالى «شىرماۋىق» قويىلىمىنىڭ تۇساۋىن كەسكەن شىعىس قازاقستان وبلىستىق جامبىل اتىنداعى دراما تەاتردىڭ قازاق ترۋپپاسى «تەاتر قوعامنىڭ - ايناسى» ەكەنىن تاعى ءبىر مارتە دالەلدەپ بەردى.

وبلىس اكىمدىگى مەن مادەنيەت، مۇراعاتتار جانە قۇجاتتاما باسقارماسىنىڭ تاپسىرماسى بويىنشا، سونداي- اق، وبلىستىق ءدىن ىستەرى باسقارماسىنىڭ باسشىلىعىنىڭ قولداۋىمەن ساحنالانعان بۇل قويىلىمىنىڭ رەجيسسەرى - ساحان اكەلەيەۆ. دراما اۆتورى - بەك رامازان.

قويىلىمدا يتالياعا مۋزىكالىق ءبىلىم الۋعا كەتكەن ۇلىن زارىعا كۇتكەن اتا- انا بالالارى كەلە جاتىر دەگەن حاباردى ەستىسىمەن دوس- جاراندارىن جيىپ، داستارقان جايىپ، باياعىداعى ساۋىقشىل ۇلدارىن توسىپ وتىرادى. ءبىراق شولاق شالبار كيىپ، قابا ساقال وسىرگەن ۇلدارى ءوزى ىسپەتتەس بىرنەشە جولداستارىمەن كەلىپ ولاردىڭ قۋانىشىن سۋ سەپكەندەي باسادى.

اڭگىمە ساقال مەن شالباردا عانا ەمەس ەكەن، كەلە سالا داستارقانداعى شولمەكتەردىڭ كوزىن قۇرتقان ۇلدارى قازاقتىڭ قاسيەتتى قارا دومبىراسىنا دا تاپ بەرەدى. ۇلكەندەردىڭ سالت- ءداستۇر، ادەت- عۇرىپ جايىندا ايتقان كەڭەستەرىنە قۇلاق سالماعان ۇلدارىنىڭ جات اعىمعا بوي ۇرعانىنا كوز جەتكىزگەن اكە ونى پوليتسيانىڭ قولىنا تاپسىرادى. ال ىشكى ىستەر سالاسىنىڭ قىزمەتكەرلەرى وعان ءتيىستى جازاسىن بەرە وتىرىپ، ارنايى ءدىن وكىلىن شاقىرىپ، جۇرگەن جولىنىڭ اق- قاراسىن اجىراتىپ بەرەدى. جاستاردى شىرماۋىقتاي شىرماعان وسى كورىنىستى تەاتر اكتەرلەرى نانىمدى جەتكىزدى.

باستى رولدەردەگى اداسقان بالانىڭ بەينەسىن سومداعان جاسۇلان سەركەتايەۆ تا، اتا- انانىڭ رولىندەگى قانات نيازبەكوۆ پەن مايرا ارعىنبەكوۆا دا ءساتتى ونەر كورسەتتى. وسى ورايدا رەجيسسەرگە ءدىن جونىنەن كەڭەس بەرگەن يسلامتانۋشى ق. قابدولدانىڭ ەڭبەگىن اتاي كەتكەن ءجون. ويتكەنى، قويىلىمدا ءداستۇرلى ءدىن مەن جات اعىمنىڭ اراجىگىن تايعا تاڭبا باسقانداي ەتىپ اجىراتىپ بەرگەن.

تۇساۋكەسەرگە شىعارما اۆتورى ب. رامازان مەن يسلام تانۋشى ق. قابدولدا قاتىسىپ، قويىلىمدى جوعارى باعالاپ، وزدەرىنىڭ ريزا بولعاندارىن ايتتى.

didar-gazeti.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى