الماتىدا قازاق ءتىلىن ۇيرەنۋگە ارنالعان جاڭا كىتاپتىڭ تۇساۋى كەسىلدى
تۇسۋكەسەر راسىمىنە ورىس ءتىلدى قازاقتار، قازاقستان حالقى الماتى اسسامبلەياسىنىڭ وكىلدەرى جانە قاراپايىم قالا تۇرعىندارى قاتىستى.
ءبىر ايتا كەتەتىن ءجايت، كىتاپتىڭ اۆتورى قانات تاسىبەكوۆ ءتىل سالاسىنىڭ مامانى ەمەس. الايدا ونىڭ قازاق ءتىلىن وقىپ ۇيرەنۋگە ارنالعان العاشقى كىتابى كەزىندە 15000 دانامەن شىعىپ، لەزدە تارالىپ كەتىپتى.
«بۇگىنگى كىتاپ سول العاشقى باسىلىمنىڭ جالعاسى»، - دەيدى اۆتور.
«مەن اقمولا ءوڭىرىنىڭ تۋماسىمىن. كەزىندە ورىس تىلىندە ءبىلىم الدىم. ءوزىم مال شارۋاشىلىعىنىڭ مامانىمىن. 2000 - جىلى الماتىعا كوشىپ كەلدىم. سودان، 50 جاسقا كەلگەندە انا ءتىلىم - قازاق ءتىلىن تەرەڭ زەرتتەپ ۇيرەنە باستادىم. وسىلايشا، قازاق الەمىنە بويلادىم. ءتىل ۇيرەنە وتىرىپ، تاجىريبە جيناقتادىم.
ءسويتىپ، سول تاجىريبەلەرىمدى قازاق ءتىلىن ۇيرەنگىسى كەلەتىن باسقا دا ازاماتتارمەن ءبولىسۋ ماقساتىندا كىتاپ جازدىم. ول ۇلكەن سۇرانىسقا يە بولعان سوڭ، ەندى مىنە سول تاقىرىپتا جازىلعان ەكىنشى كىتابىمدى دا قالىڭ كوپشىلىككە ۇسىنىپ وتىرمىن» - ق. تاسىبەكوۆ.
كىتاپ باستان-اياق ءۇش ەر ازامات پەن ەكى ايەل ازاماتشالاردىڭ اراسىندا وربەيتىن قىزىقتى ديالوگتاردان تۇرادى. اۆتوردىڭ ايتۋىنشا ديالوگ - ءتىل ۇيرەنۋدىڭ باستى قۇرالى.
«وكىنىشكە قاراي، بۇگىندە قازاق ءتىلىن وقىپ ۇيرەنۋگە ارنالعان وقۋ قۇرالدارىنداعى ديالوگتار سىن كوتەرمەيدى. كوبىنەسە ۇشاققا بيلەت ساتىپ الۋ، مەيرامحاناعا تاپسىرىس بەرۋ، دۇكەنگە بارۋ، جول ءجۇرۋ سەكىلدى تاقىرىپتارمەن شەكتەلەدى. ال قازاق ءتىلى ءبىر جاققا ساپار شەگۋ ءۇشىن ەمەس، قازاقستاندا تولىققاندى ءومىر ءسۇرۋ ءۇشىن كەرەك قوي. قازاق ءتىلىنىڭ شۇرايلىعىن، تەرەڭدىگىن ديالوگتار ارقىلى بەرۋگە بولادى. قازىرگى تاڭدا شىنايى قازاقي ورتادا، قاراپايىم اۋىزەكى تىلدە بۇگىنگى كۇننىڭ قانداي وزەكتى تاقىرىپتارىندا اڭگىمەلەر ءوربيدى؟ ولار قازىرگى وقۋلىقتاردا جەتكىلىكتى ايتىلمايدى. سوندىقتان مەن وسى ولقىلىقتاردىڭ ورنىن تولتىرعىم كەلدى»، دەيدى اۆتور.
ەكىنشى كىتاپ تا تەك ديالوگتاردان تۇرادى.
«وندا ۇلتتىق ماسەلەلەر، ۇلتارالىق نەكە جانە باسقا دا تاقىرىپتاردا ءوزارا اڭگىمە ءوربيدى. جانە ولاردىڭ ورىس تىلىندەگى اۋدارماسى قاتار ءجۇرىپ وتىرادى. مىنە، وسى ارقىلى، ءتىل ۇيرەنۋشىلەر قازاقتىڭ سالتىن، ءداستۇرىن، مادەنيەتىن ۇعىنا، سەزىنە تۇسەدى دەگەن ۇمىتتەمىن» - دەدى ق. تاسىبەكوۆ.
ايتا كەتەلىك، اۆتوردىڭ ايتۋىنشا «سيتۋاتيۆنىي كازاحسكيي. 2 توم» . ديالوگي» دەپ اتالاتىن كىتاپتىڭ بولاشاقتا جالعاسى جازىلادى.
اۆتور: جاپپاربەرگەن ايبوتا
