قازاقستانداعى ەڭ ۇلكەن جىلىجاي كەشەنى ىسكە قوسىلدى
بۇل تۋرالى و ق و اكىمى اپپاراتىنىڭ باسپا ءسوز قىزمەتى حابارلادى.
جوبا ۇدەمەلى يندۋستريالىق- يننوۆاتسيالىق دامۋ مەملەكەتتىك باعدارلاماسى اياسىنداعى يندۋستريالاندىرۋ كارتاسى شەڭبەرىندە جۇزەگە استى. ەلىمىزدەگى ەڭ ءىرى جىلىجاي كەشەنى بولىپ تابىلاتىن بۇل جوبانىڭ قۇنى 2 574 ميلليون تەڭگە.
200 جاڭا جۇمىس ورنى قۇرىلعان جىلىجايدا جىلىنا 8400 توننا قيار جانە قىزاناق الۋ جوسپارلانعان.
جىلىجايدا فرانسيالىق RISHEL كومپانياسىنىڭ زاماناۋي جابدىقتارى ورناتىلعان. ءوندىرىس جەلىلەرى تولىق كومپيۋتەرلەنگەن، جىلىتۋ، تامشىلاتىپ سۋارۋ، پەردەلەۋ سىندى بارلىق ۇدەرىستەر تولىعىمەن اۆتوماتتاندىرىلعان.
جىلىجاي كەشەنى قىس مەزگىلىندە كوكونىستەر قۇنىنىڭ تومەندەۋىنە، ءوڭىردىڭ ازىق-تۇلىك قاۋىپسىزدىگىن ساقتاۋعا جانە دە كورشىلەس ەلدەردەن يمپورت كولەمىنىڭ تومەندەۋىنە مۇمكىندىك بەرەدى. سونداي-اق، كومپانيا كوكونىستەردى رەسەيگە ەكسپورتتاۋدا.
اگرارلىق كەشەننىڭ ىسكە قوسىلۋى ارقىلى ەلىمىزدىڭ ەكسپورتتىق الەۋەتى ارتىپ وتىرعانىن جەتكىزگەن اسىلجان مامىتبەكوۆ مەملەكەت تاراپىنان كورسەتىلىپ جاتقان قولداۋلاردىڭ ارقاسىندا اگروونەركاسىپ كەشەنى زاماناۋي تەحنولوگيالارمەن قامتىلىپ جاتقانىن اتاپ ءوتتى.
ال وبلىس اكىمىنىڭ ورىنباسارى ساپاربەك تۇياقبايەۆ كاسىپورىنعا «بيزنەستىڭ جول كارتاسى-2020» باعدارلاماسى اياسىندا گاز قۇبىرى تارتىلعانىن، كومپانياعا «اگروبيزنەس - 2020» باعدارلاماسى بويىنشا 516 ميلليون تەڭگە ينۆەستيسيالىق سۋبسيديا بەرىلگەنىن مالىمدەدى. وسى باعىتتاعى جۇمىستاردى ىسكە اسىرۋ ماقساتىندا وبلىس اكىمدىگى تاراپىنان ءار اۋدان، قالادا اگرويندۋستريالىق ايماقتار قۇرۋ قولعا الىنعانىن ايتىپ ءوتتى.
جالپى وبلىس بويىنشا جىلىجايلاردىڭ جالپى كولەمى 907 گەكتاردى قۇرايدى، ونىڭ ىشىندە بيىلعى جىلدىڭ وزىندە 187 گەكتار جاڭا جىلىجاي قۇرىلعان. بيىلعى جىلى وبلىس جىلىجايلارىنان 105 مىڭ توننا كوكونىس جينالدى.
اۋىل شارۋاشىلىعى سالاسىندا ءونىم كولەمىن ارتتىرۋدا وزىق ينتەنسيۆتى - يننوۆاتسيالىق ىلعال ۇنەمدەۋ تەحنولوگيالاردى وندىرىسكە ەندىرۋدە ۇلكەن جۇمىستار اتقارىلۋدا.
اعىمداعى جىلى تەرەڭ قوپسىتۋ تەحنولوگياسىمەن ماقتا داقىلى 37,0 مىڭ گەكتارعا ەگىلىپ، وتكەن جىلمەن سالىستىرعاندا 3 ەسەگە ۇلعايدى. ماقتا داقىلىنان ورتاشا ونىمدىلىك وبلىستا گەكتارىنا 26 - 27 سەنتنەردەن اينالدى، ال تەرەڭ قوپسىتۋ تەحنولوگياسىن قولدانعان شارۋاشىلىقتاردا 35 - 40 سەنتنەردەن ءونىم الىنۋدا.
تامشىلاتىپ سۋعارۋ ءادىسى 7 مىڭ گەكتارعا ارتىپ، بۇگىنگى كۇنگە 34 مىڭ گەكتارعا جەتىپ، رەسپۋبليكاداعى كورسەتكىشتىڭ %84 قۇرادى.
