بالا كەزدەگى ارمانىم تويىپ تاماق ءىشۋ بولاتىن - امانگەلدى ايتالى، پروفەسسور، قوعام قايراتكەرى

ال بالالىق شاعىم رەسەيدە ءوتتى. سودان دا كەيدە ازىلدەپ «ورالمانمىن» دەپ ايتىپ ءجۇرمىن. نەگىزىندە ءبىز تۇرعان اۋىل قازىر رەسەيگە قاراعانمەن، بۇرىن قازاقتىڭ جەرى بولعان.

شەكارانى بولگەندە ءبىزدىڭ اتالارىمىز ارعى بەتتە قالىپ قويعان.

قازىر ءبىزدىڭ اۋىل استراحان وبلىسى ۆولودار اۋدانىنا قارايدى. بالالىق شاعىم ەدىلدىڭ جاعاسىندا ءوتتى. اينالامىزدىڭ ءبارى وزەن-كول بولاتىن. ال تىرشىلىگىمىز - قامىس پەن قوعانىڭ اراسىنان بالىق اۋلاۋ.

بالا كەزدە بالىقتى جاقسى اۋلادىم. سۋعا ءجيى تۇسەتىنبىز، بالالارمەن جارىسىپ جۇزەتىنبىز. سودان شىعار، دەنە ءبىتىمىم ءىرى بولدى. قاتارلاستارىمنىڭ ىشىندەگى ۇزىنى دا مەن ەدىم.

اۋىلىمىزدا جىڭعىل مەن ميا كوپ بولاتىن. قىستىڭ قامىن جاساپ، سونى وراتىنبىز.

وسىلاي كەڭ تابيعاتپەن تىنىستاپ ءوستىم. بۇل كەيبىر بالالارعا بۇيىرماعان باقىت دەپ بىلەمىن! بۇگىنگى بالالارعا ەڭ بولماسا جازعى دەمالىس كەزىندە تابيعاتتىڭ ورتاسىندا بولۋعا كەڭەس بەرەر ەدىم.

سەبەبى، تابيعات بالانىڭ قيالشىل، ەركىن بولىپ ەرجەتۋىنە كومەكتەسەدى ەكەن.

مەكتەپتى 4 شاقىرىمداي الىستاعى اۋىلدان وقىدىم. ويتكەنى، ءبىزدىڭ اۋىلدا مەكتەپ بولعان جوق. جول الىس بولعاسىن، ساباقتان كەش قالىپ جۇرەتىن كەزدەرىم دە بولدى.

ءبىراق، ساباعىمدى تومەندەتىپ العان كەزىم بولعان ەمەس. نەگىزىندە ول كەزدە ساباقتان كورى، ەڭبەككە كوپ ارالاستىق.

زامان سولاي، بالالىعىمىز سوعىس ۋاقىتىنا تۋرا كەلدى. اكەم سوعىسقا كەتتى، شەشەم كولحوزدا جۇمىس جاسادى. سوندىقتان، بالالىعىمىز وتە قيىن جاعدايدا ءوتتى.

ەركەلىك، مولشىلىق دەگەندى مۇلدە بىلمەي وستىك. سول كەزدەگى ءبىزدىڭ ارمانىمىز تويىپ تاماق ءىشۋ، نان جەۋ بولاتىن. توڭبايتىن كيىم كيۋدى ارمانداۋشى ەدىك.

ون جاسىمنان باستاپ، ەڭبەككە ارالاستىم. 14 جاسىمدا ۋچيليشەگە وقۋعا ءتۇستىم. ونى بىتىرگەن سوڭ مەكتەپتە كەلىپ، باستاۋىش سىنىپتارعا ساباق بەردىم. مىنە، سودان بەرى تالماي ەڭبەك ەتىپ كەلە جاتىرمىن.

***

امانگەلدى ءابدىراحمان ۇلى ايتالى - 1939 - جىلى استراحان وبلىسى، ۆولودار اۋدانى، بولدىريەۆو اۋىلىندا تۋعان. عالىم، مەملەكەت جانە قوعام قايراتكەرى. فيلوسوفيا عىلىمىنىڭ دوكتورى، پروفەسسور. ق ر الەۋمەتتىك عىلىم اكادەمياسىنىڭ اكادەميگى. ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ پروفەسسورى.

1999 - 2007 - جىلدارى قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولعان. امانگەلدى ءابدىراحمان ۇلى 100 دەن استام عىلىم ماقالالاردىڭ، 5 موناگرافيانىڭ اۆتورى.

1986 -جىلى ك س ر و - نىڭ «قۇرمەت بەلگىسى» وردەنىمەن ماراپاتتالعان.

1996 -جىلى فيلوسوفيا عىلىمىنىڭ دوكتورى (قۇرمەتتى عىلىمي اتاعى)؛

1996 -جىلى پروفەسسور؛

1996 -جىلدان ق ر الەۋمەتتىك عىلىم اكادەمياسىنىڭ اكادەميگى؛

2001 -جىلى ەلباسىنىڭ جارلىعىمەن «پاراسات وردەنى» مەن ماراپاتتالدى.

2009 -جىلى «قازاقستان عىلىمىنىڭ دامۋىنا سىڭىرگەن ەڭبەگى ءۇشىن» قۇرمەتتى توسبەلگىسىنىڭ يەگەرى.

2015 -جىلى پرەزيدەنت جارلىعىمەن جوعارعى مەملەكەتتىك ماراپات Ⅲ دارەجەدەگى «بارىس وردەنى» مەن ماراپاتتالدى.

جازىپ العان سەرىكبول حاسان

zhasorken.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى