قازاقستان قىرعىزستانعا ەلەكتر ەنەرگياسىن جەتكىزە باستادى
«1- جەلتوقساننان باستاپ قىرعىز رەسپۋبليكاسىنا قازاقستاننىڭ ەلەكتر ەنەرگياسى جەتكىزىلە باستادى. «سامۇرىق-ەنەرگو» ا ق-نىڭ ەنشىلەس كاسىپورنى «ت. باتۋروۆ اتىنداعى جامبىل م ا ە س» ا ق قىرعىز رەسپۋبليكاسى ەنەرگيا جۇيەسىنىڭ مۇقتاجدىقتارى ءۇشىن 230 مۆت ەلەكتر قۋاتىن وندىرەدى»، دەلىنگەن حابارلامادا.
قيىن- قىستاۋ قىسقى كەزەڭدە قىرعىزستانعا كورسەتىلەتىن قاجەتتى كومەك جوعارى دەڭگەيدە قول جەتكىزىلگەن ۋاعدالاستىقتاردى ىسكە اسىرۋ ناتيجەسى بولىپ تابىلادى.
قازاقستاننىڭ ەلەكتر ەنەرگياسىن جەتكىزۋ ماسەلەسى 7- قاراشادا قىرعىز رەسپۋبليكاسىنىڭ پرەزيدەنتى المازبەك اتامبايەۆتىڭ قازاقستانعا جاساعان مەملەكەتتىك ساپارى بارىسىندا تالقىلانعان بولاتىن. كەلىسسوزدەر قورىتىندىسى بويىنشا، ق ر پرەزيدەنتى نۇرسۇلتان نازاربايەۆ كومەك كورسەتۋ تۋرالى شەشىم قابىلدانعانىن ايتتى.
قازاقستان ەنەرگەتيكتەرى اتالعان شەشىمدى ورىنداۋ ءۇشىن قاجەتتى ءىس-شارالاردى قامتاماسىز ەتتى. «جامبىل م ا ە س» ا ق مەن «ەلەكتر ستانسالارى» ا ا ق (ق ر) اراسىندا جاسالعان 1,0 ميلليارد كۆت/ساع. كولەمىندە ەلەكتر ەنەرگياسىن جەتكىزۋ بويىنشا ساتىپ الۋ-ساتۋ شارتىنا قول قويىلدى. ەنەرگيا جەتكىزۋ 2015-جىلدىڭ ناۋرىز ايىن قوسا العانداعى مەرزىمگە دەيىن جوسپارلانىپ وتىر.
سونداي-اق الىنعان مىندەتتەمەلەردى ورىنداۋ ءۇشىن «سامۇرىق-ەنەرگو» ا ق جۇيەلىك وپەراتورمەن («KEGOC» ا ق) ەلەكتر ەنەرگياسىن قىرعىزستان رەسپۋبليكاسىنىڭ شەكاراسىنا دەيىن بەرۋگە جانە «قازترانسگاز» ا ق-ىمەن ەلەكتر ەنەرگياسىنىڭ شارتتا كەلىسىلگەن كولەمىن ءوندىرۋ ءۇشىن گاز جەتكىزۋگە قوسىمشا شارتتار جاساستى.
«ەكى ەلدىڭ قابىلداعان شارالارى 2014-2015-جىلى سۋ-ەنەرگەتيكالىق تەڭگەرىمدى جاقسارتپاق. قازاقستاننىڭ ەلەكتر ەنەرگياسىن جەتكىزۋ توقتاعۇل گ ە س-ىندە سۋدىڭ جينالۋىنا ىقپال ەتەتىن بولادى، سونىمەن قاتار قىرعىزستاندا ەنەرگيا جۇيەسىنىڭ قىسقى كەزەڭدە تۇراقسىز جۇمىس ىستەۋ قاۋپىن ازايتۋعا مۇمكىندىك بەرەدى»، دەلىنگەن حابارلامادا.
