جىل سايىن ەلىمىزدىڭ وڭتۇستىك وڭىرلەرىندە مەكتەپ تۇلەكتەرىنىڭ جارتىسىنان كوبى جۇمىسسىز قالادى - ب. ساپاربايەۆ
بۇل تۋرالى بۇگىن «كاسىپتىك ءبىلىم جانە بيزنەس: ارىپتەستەر سۇحباتتاستىعى» اتتى 6- حالىقارالىق فورۋمدا ق ر پرەمەر-ءمينيسترىنىڭ ورىنباسارى بەردىبەك ساپاربايەۆ ءمالىم ەتتى.
«ءبىزدىڭ مالىمەتتەرىمىزگە سايكەس جىل سايىن وڭتۇستىك وڭىرلەردەگى مەكتەپ تۇلەكتەرىنىڭ شامامەن جارتىسىنان كوبى جۇمىسسىز قالادى. ال سولتۇستىك جانە شىعىس وڭىرلەردە جۇمىس كۇشى جەتىسپەيدى»، - دەدى ب. ساپاربايەۆ.
ۇكىمەت باسشىسى ورىنباسارىنىڭ ايتۋىنا قاراعاندا، قازىرگى ۋاقىتتا ۇكىمەت ەلىمىزدىڭ وڭتۇستىگىنەن جۇمىسشىلار مەن مامانداردى سولتۇستىك جانە شىعىس وبلىستارعا جىبەرۋ ماسەلەسىن قاراستىرۋدا.
«بۇگىنگى كۇننىڭ ەڭ ماڭىزدى ماسەلەلەرىنىڭ ءبىرى قاجەتتىلىك بولجامىن ايقىنداۋ بولىپ تۇر. ءبىز بۇل باعىتتا ۇلتتىق كاسىپكەرلەر پالاتاسىمەن بىرلەسىپ جۇمىس ىستەۋدەمىز»، - دەدى ول.
سونىمەن قاتار ۆيتسە-پرەمەر بۇگىنگى كۇننىڭ تالاپتارىنا سايكەس مامانداردى دايىنداۋ ءىسى ەلىمىزدىڭ 6 وڭىرىندەگى 10 كوللەدجدە جۇرگىزىلەتىندىگىن باسا ايتتى.
اۆتور: مارلان جيەمباي
