پاۆلودار وبلىسىنىڭ سوتى ايماقتىڭ بۇرىنعى اكىمنىڭ قىلمىستىق ىسىنە قاتىستى تۇسىنىكتەمە بەردى
ە. ارىن قىلمىستىق قۋدالاۋ ورگانىمەن ءوز قىزمەت بابىن اسىرا پايدالانىپ، كومەكشىسى ب. ساپاروۆ ارقىلى جەكە كاسىپكەر ي. تەرەنچەنكونىڭ 1,6 ميلليون تەڭگە كولەمىندەگى مۇلكىن الداۋ جولىمەن يەلەندى، سونداي-اق «گرادسترويكومپاني» ج ش س-نىڭ ديرەكتورى ۋ. ماتيەۆتەن 5,6 ميلليون تەڭگە پارا الدى دەگەن كۇدىكتەرمەن ايىپتالدى.
بۇل قىلمىستىق ارەكەتتەر ق ر ق ك-نىڭ 177-بابى 3-بولىگى «ب، گ» تاراۋلارىمەن (ءىرى كولەمدە جاسالعان الاياقتىق)، 311-بابى 5-بولىگى (ءىرى كولەمدە پارا الۋ) جانە 193 - بابى 3 - بولىگى «ا» تارماعىمەن (زاڭسىز جولمەن الىنعان اقشا قاراجاتتارىن زاڭداستىرۋ) كوزدەلگەن.
سوت وتىرىسى بارىسىندا سوت قىلمىستىق قۋدالاۋ ورگاندارىمەن باستاپقىدا ايىپتالۋشىنىڭ «گازەل» اۆتوكولىگىن الۋى - پارا الۋ (ق ر ق ك 311 - بابى 4-بولىگى) جانە «نيۆا» اۆتوكولىگىن الۋى - الاياقتىق (ق ر ق ك 177-بابى 3-بولىگى جانە ق ر قك 19-بابى 3-بولىگى) دەپ دۇرىس دارەجەلەنبەگەندىگىن انىقتادى، سەبەبى ەكى فاكتى دە بىردەي، ءبىراق قىلمىستىق كودەكستىڭ ءار ءتۇرلى قۇرامىمەن دارەجەلەندى.
سوت ايىپتالۋشىدان، جابىرلەنۋشىدەن، كۋالاردان جاۋاپ الىپ جانە ءىس-قۇجاتتاردى زەرتتەپ، ە. م. ارىننىڭ ارەكەتتىنەن تەك ق ر ق ك- نىڭ 307-بابى 3-بولىگىمەن كوزدەلگەن قىلمىستىڭ قۇرامى بار دەگەن قورتىندىعا كەلدى، ياعني، جاۋاپتى مەملەكەتتىك قىزمەتتەگى تۇلعانىڭ ءوز قىزمەت بابىن اسىرا پايدالانۋى ورىن العان.
ق ر ق ك-نىڭ 307-بابى 3-بولىگىنىڭ سانكتسياسىندا بالاما جازا تۇرلەرى - ەكى مىڭنان ءتورت مىڭ ايلىق ەسەپتىك كورسەتكىش مولشەرىندە ايىپپۇل نەمەسە بەلگىلى ءبىر لاۋازىمدى يەلەنۋدەن شەكتەي وتىرىپ التى جىلعا دەيىن باس بوستاندىعىنان ايىرۋ نەمەسە بەلگىلى ءبىر قىزمەتپەن اينالىسۋعا بەس جىلعا دەيىن شەكتەۋ قاراستىرىلعان.
ق ر ق ك-نىڭ 307-بابى 3-بولىگىنىڭ سانكتسياسىندا قوسىمشا مۇلىكتى تاركىلەۋ تۇرىندەگى جازا قاراستىرىلماعان. سوت ايىپتالۋشىنىڭ جەكە باسىن، جاساعان ارەكەتىنىڭ جاعدايىن، وتباسى جانە دەنساۋلىق جاعدايىن، جابىرلەنۋشىنىڭ پىكىرىن ەسكەرە وتىرا، ە. م. ارىنعا ق ر ق ك 63-بابىنا سايكەس 3 جىلعا دەيىن شارتتى باس بوستاندىعىنان ايىرۋ جازاسىن تاعايىندادى. بۇل باپ نەگىزىندە تاعايىندالعان جازا شارتتى دەپ سانالىپ، 3 جىلعا سىناق مەرزىمى بەلگىلەنىپ، مەملەكەتتىك جانە جەرگىلىكتى باسقارۋ ورگاندارىندا 5 جىلعا دەيىن لاۋازىمدى قىزمەتتەردە جۇمىس ىستەۋ قۇقىعىنان ايىرىلدى.
سوت ە. م. ارىنعا جازانى وتەۋ مەرزىمىندە ءۇي جانە جۇمىس ورنىن مامانداندىرىلعان مەملەكەتتىك ورگاندارىن ەسكەرتۋسىز اۋىستىرۋ، سپيرتتىك ىشىمدىكتەر قولدانىلاتىن ورىندارعا بارماۋ سياقتى مىندەتتەر جۇكتەپ، پروباتسيالىق باقىلاۋ ورناتتى. ودان باسقا، سوت ق ر پرەزيدەنتىنە ە. م. ارىندى مەملەكەتتىك ماراپاتتاردان، ياعني «قۇرمەت» جانە «پاراسات» وردەندەرىنەن ايىرۋ تۋرالى ۇسىنىس شىعاردى.
قىلمىستىق ءىستىڭ بارىسى اۋديو-بەينە جۇيەسىن قولدانۋ ارقىلى اشىق تۇردە ءوتىپ، بۇقارالىق اقپارات قۇرالدارىندا جارىق كورىپ وتىرعان. 10 جۋرناليست جۇيەلى تۇردە جۇمىس جاساعان. جۋرناليستەر ءۇشىن سوت زالىنان تىكەلەي ەفير جۇرگىزۋ مۇمكىندىگى بار ارنايى بولمە قامتىلعان.
ءار كۇنگى سوت وتىرىستىڭ قورىتىندىلارى، پروكۋروردىڭ، جابىرلەنۋشىنىڭ، كۋاگەرلەردىڭ، ادۆوكاتتار مەن ايىپتالۋشىنىڭ ءسوز سويلەۋلەرى ينتەرنەت جەلىسىندە، رەسپۋبليكالىق جانە جەرگىلىكتى تەلەارنالار مەن باسپا ءسوز بەتتەرىندە جاريالانعان.
