جوعالىپ كەتىپ، التى ايدان كەيىن ۇيىنە ورالعان سەرجانتقا قاتىستى جاڭا دەرەكتەر شىقتى
اقتوبە قالالىق قورعانىس ىستەرى جونىندەگى باسقارمادا جۇمىس ىستەيتىن ارمان سۇراعانوۆتى مامىر ايىندا تۇنگى كەزەكشىلىك كەزىندە بەلگىسىز ءۇش ادام كەلىپ ۇرىپ-سوعىپ، كولىككە وتىرعىزىپ الىپ كەتكەن.
سەرجانتتىڭ ايەلى قاراگوز ارعىنبايەۆانىڭ ايتۋىنشا، كۇيەۋى قازىر ءتارتىپ ساقشىلارىنا سول كەزدەگى وقيعالاردى، باسىنان كەشكەن جايلاردى ايتىپ بەرىپ جاتىر ەكەن. جارتى جىل بويى كىسى قولىندا قاماۋدا وتىرعان ول قاتتى قورقىپ قالعان. سونىمەن قاتار ونىڭ قاۋىپسىزدىگى ءۇشىن ءتارتىپ ساقشىلارى ءۇيىن كۇنى-ءتۇنى كۇزەتكە الىپتى.
«ارمان جوعالاتىن تۇندە اسكەري كوميسسيارياتقا قورشاۋدان ءۇش ادام سەكىرىپ ءتۇسىپ، تەمەكى شەگىپ تۇرعان ونى ۇرىپ-سوققان. ءبىر ەسىن جيعاندا ول كولىكتىڭ ارتقى جاعىندا بولىپتى. ونى ۇرلاۋعا بىرەۋ تاپسىرىس بەرگەن ەكەن.
ءبىراق نە ءۇشىن ەكەنىن ءوزى دە تۇسىنبەي وتىر. ۇرلاعان ۇشەۋدىڭ بىرەۋى «جولدا كەلە جاتقانىمىزعا سەگىز ساعات بولدى» دەگەنىن ەستىگەن. كەيىن ونى قاراڭعى گاراجعا قاماپ، شىنجىرمەن ۇستاپتى. ەگور دەگەن ادامنىڭ اتىن ەستىگەن. ءبىراق ونى ۇستاعانداردىڭ بارلىعى قازاق ەكەنىن ايتتى. سوسىن بىرەۋدىڭ «مى ۆ كوستاناە» دەگەن ءسوزىن ەستىگەن. سوعان قاراعاندا ونى قوستانايدا ۇستاپ وتىرعان.
جازدا رامازان ايىنىڭ سوڭىنا تامان ارماندى ۇرلاۋعا تاپسىرىس بەرگەن ادام جول اپاتىنان قايتىس بولادى. ونىڭ ۇلى كەلىپ «مەنىڭ اكەم سەنىڭ كەسىرىڭنەن ءولدى» دەپ ۇرىپ-سوعىپ كەتكەن. كەيىن ءبىر اياعى مەن قولىن شىنجىردان بوساتىپ، گاراجدا ەركىن جۇرۋگە رۇقسات بەرىپتى. قىلمىسكەرلەر ونى ءولتىرۋدى ويلاماعان كورىنەدى.
تەك ءيا ءولى ەمەس، ءيا ءتىرى ەمەس جىندى قىلىپ، اقىلىنان الجاستىرۋدى ويلاستىرعان. اقىرى قاراشادا ونى كولىككە تيەپ، حرومتاۋ تاسجولىنىڭ بويىنا الىپ كەلىپ تاستايدى. «ءبىز ەلۋگە دەيىن ساناعانشا باسىڭدى كوتەرمە» دەگەن بۇيرىق بەرەدى. 15 مينۋتتان سوڭ ول ورنىنان سۇيرەتىلىپ تۇرىپ، كولىك توقتاتادى. ابىروي بولعاندا ءتارتىپ ساقشىسى مىنگەن كولىككە جولىعىپ، ول حرومتاۋ اۋداندىق ىشكى ىستەر بولىمىنە جەتكىزگەن»، - دەيدى قاراگوز ارعىنبايەۆا.
ارماندى ءتارتىپ ساقشىلارى كۇن سايىن تاڭنان قارا كەشكە دەيىن تەرگەپ جاتىر. جانىندا جۇبايى قاراگوز ءجۇر. قازىر بىلىكتى ادۆوكات جالداپ جاتقاندارىن ايتادى. دەمالىس كۇندەرى ۇلى تابىلعان اتا-انا بارلىق جاقىندارىن جيناپ، توي جاساماقشى ەكەن.
اقسۇڭقار ازات،
