ۇلتتىق پالاتا قازاقستاندىقتاردى قورعاۋ شارالارىن ازىرلەۋى كەرەك - ت. قۇلىبايەۆ
ۇ ك پ باسپا ءسوز قىزمەتىنەن حابارلاعانداي، ەلدەگى تۋريزمنىڭ ينفراقۇرىلىمدىق دامۋ كەلەشەگى، سونىڭ ىشىندە يندۋستريالىق پارك پرينتسيپى بويىنشا دامىتۋ ۇسىنىلعان تۋريستىك كلاستەرلەر تالقىعا سالىندى.
بۇل سالا جوعارى دەڭگەيدە دامىعان ەلدەر تاجىريبەسى بويىنشا تۋريستىك كلاستەرلەر مەملەكەتتىك ىنتالاندىرۋ مەن قولداۋ جاسالعان جاعدايدا جىلدام جانە ناتيجەلى دامي الادى؛ الايدا جەكە مەنشىك سەكتوردى تارتۋ شوعىرلانعان جۇمىستى قامتاماسىز ەتەدى جانە ونىڭ تيىمدىلىگىن ارتتىرا تۇسەدى. سونىمەن قاتار الەۋمەتتىك ماسەلەلەر دە شەشىمىن تاباتىن بولادى.
ق ر ۇ ك پ ءتورالقا ءتوراعاسى تيمۋر قۇلىبايەۆتىڭ پايىمىنشا، تۋريستىك كلاستەرلەر تۋريستەر اراسىنداعى تانىمالدىق، اۋماقتى كەشەندى دامىتۋ جانە وزگە دە فاكتورلار ەسەبىمەن قۇرىلۋى ءتيىس. وسى تۇرعىدا الماتى جانە ونىڭ ماڭايى، ش ق و جانە ق ر پرەزيدەنتى نۇرسۇلتان نازاربايەۆتىڭ ايتۋىنشا، «جاڭا جۇمىس ورىندارى مەن قوسىمشا وندىرىستەر قۇرا وتىرىپ، قازاقستان ءۇشىن ءومىر جولىنا» اينالاتىن، قالپىنا كەلتىرىلگەن ۇلى جىبەك جولى مۇمكىندىگى مول جەرلەر بولىپ قالا بەرەدى.
كۇن تارتىبىندە بيىلعى جازدا «گۇلنار تۋر» كومپانياسى اينالاسىنداعى داۋ-دامايدان كەيىن انىقتالعان جۇيەلىك ماسەلەلەر دە قوزعالدى. تۋروپەراتورلىق قىزمەت شارتتارى، تۋروپەراتورلار مەن تۋراگەنتتەر جاۋاپكەرشىلىگىن ءبولۋ، قارجىلاي كەپىلدىكتى ەنگىزۋ، ازاماتتىق-قۇقىقتىق جاۋاپكەرشىلىكتى ساقتاندىرۋ جانە ت. ب. جونىندە زاڭناماعا وزگەرتۋلەر بويىنشا ازىرلەنگەن ۇسىنىستار توپتاماسىمەن بىرگە، ۇلتتىق پالاتا ءتورالقا باسشىسى ۇ ق پ باسقارماسىنا وزەكتى ماسەلەلەردى كوتەرىپ، بەيىندى مينيسترلىكپەن بىرلەسە وتىرىپ ولاردىڭ ءتۇيىنىن تارقاتۋدى تاپسىردى.
«ۇلتتىق پالاتا تۋريزمگە جاۋاپتى ينۆەستيتسيالار جانە دامۋ مينيسترلىگىمەن بىرگە قازاقستان تۋريستەرى ءۇشىن الدىن الۋ جانە قورعاۋ شارالارىن ازىرلەۋى قاجەت»، - دەدى تيمۋر قۇلىبايەۆ.
