شۋلى جەكپە- جەك جايىندا قانات يسلام تۇسىنىك بەردى - كەسكىن

 اڭگىمە گەنادي گولوۆكين مەن قانات يسلام جايىندا. جۋىردا قاناتتىڭ پروموۋتەرى نەلسون لوپەس «قانات يسلام گەناعا ۇلكەن كەدەرگى جانە الداعى ۋاقىتتا ونىمەن جەكپە- جەككە شىعۋى مۇمكىن» دەگەندى جەتكىزدى. قوعامدا قىزۋ تالقىلانعان جەكپە- جەك قاشان بولۋى مۇمكىن؟

بۇگىنگە دەيىن كاسىپقوي بوكستا 18 كەزدەسۋ وتكىزىپ، بارلىعىندا جەڭىسكە جەتكەن قانات يسلام قوعام تالقىسىنا تۇسكەن ماسەلەدەن حاباردار ەكەن. سوڭعى كەزدەسۋىن كولۋمبيالىق مونتەرروسامەن وتكىزگەن قانات ونى شارشى الاڭدا سۇلاتىپ سالعان. كاريب ايماعى مەن لاتىن امەريكانىڭ چەمپيوندىعىن يەلەنگەن جەرلەسىمىز ەندى ءبىر كەزدەسۋ وتكىزىپ، جەڭىسكە جەتكەن جاعدايدا الەم چەمپيوندىعىنا تالاساتىنىن ايتتى. ال گەنامەن قولعاپ ءتۇيىستىرۋ جوسپارىندا جوق ەكەن.

قانات يسلام:

 بىزدە ەكەۋمىزدە دە قارسىلاس جەتەدى، شىنىن ايتقاندا. ەكەۋمىز دە شەتەلدە ءجۇرىپ، كوك تۋىمىزدى كوتەرىپ، ەلدىڭ نامىسىن قورعاعانىمىز بۇل مەن ءۇشىن دە، گەنا ءۇشىن دە ۇلكەن اتاق- ابىروي دەپ ويلايمىن.

 ويتكەنى ەكەۋمىز دە قازاقتىڭ بالاسىمىز، ەكەۋمىز دە ءوز ەلىمىزدىڭ ابىرويىن قورعاپ ءجۇرمىز.

 قانات بۇل ءسوزدى گەنادان قايمىققاننان ايتقان جوق. بوكسشى ەكى جاقتاپ ەل نامىسىن قورعاۋدى كوزدەيدى. ال كۇنى كەشە گولوۆكين استاناعا كەلىپ، جانكۇيەرلەرمەن جولىقتى. الداعى جوسپارىمەن ءبولىستى. جۋرناليستەردىڭ قانات يسلاممەن قولعاپ ءتۇيىستىرۋ جايلى سۇراعىنا گولوۆكين ءوز جاۋابىن بەردى.

گەنناديي گولوۆكين:

قانات ەكەۋمىزدى سالىستىرۋ اقىلعا سىيمايدى. بىرىنشىدەن، سالماقتارىمىز ءار ءتۇرلى، ەكىنشىدەن، ونىڭ رەيتينگىسى مەنەن تومەن. ايتپەسە، شارشى الاڭدا كەزدەسسە بولار ەدى. ءوزى تىكەلەي جەكپە- جەككە شاقىرماۋى مۇمكىن.

قالاي بولعاندا دا، قازاقستاننىڭ قوس ماقتانىشى ءبىر شارشى الاڭدا جۇدىرىقتاسۋى ەكىتالاي. وسى كۇنگە دەيىن كاسىپقوي بوكستا 31 مارتە شارشى الاڭعا شىعىپ، بارىندە جەڭىسكە جەتكەن، ونىڭ 28 كەزدەسۋىن نوكاۋتپەن اياقتاعان گەنادي كەلەر جىلدىڭ 21 - اقپانىندا مونتە كارلو قالاسىندا بريتاندىق مارتين ميۋررەيمەن قولعاپ تۇيىستىرەدى. ال ءبىز جەرلەستەرىمىزگە تەك ساتتىلىك تىلەيمىز.

جاراس نيازبەك، دۋمان سۇلەيمەنوۆ.

31- ارنا 

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى