گەنەرال جولامانوۆتىڭ ايەلى ونى ءۇي قاماۋىنا الۋدى سۇرايدى
گەنەرالدىڭ زايىبى ونىڭ بۇلتارتپاۋ شاراسىن ءۇي قاماۋىنا الۋمەن اۋىستىرۋدى سۇرايدى.
باسىلىمنىڭ مالىمەتىنشە، بالماعامبەتوۆ تامىز ايىندا الماتىدا پارامەن ۇستالعان كەزدە گەنەرالدى «وزىمەن بىرگە كەتىرۋگە تىرىسقان». كۇش ۆەدومستۆوسىنداعى مالىمەتكە قانىق اقپارات كوزىنە سىلتەمە جاساي وتىرىپ، گازەت پودپولكوۆنيك جاۋاپ بەرۋ كەزىندە جانە بەتپە-بەت كەزدەسۋدە «گەنەرال جولامانوۆقا اقشا بەرىپ جىبەرگەن ساتتەرىن» ەسكە الادى.
«ەپيزودتاردىڭ بىرىندە اقشانىڭ قانداي كۋپيۋرالارمەن بەرىلگەنى جانە ونى گەنەرالدىڭ قانداي سومكەگە سالعانى ايتىلادى. سودان كەيىن ونىڭ الماتىدا «جەمقورلىق ىزدەرىن» جاسىرىپ، اۋەجايعا قاراي كەتكەنى دە ءسوز بولادى»، - دەپ جازادى «مەگاپوليس».
باسىلىم جولامانوۆتىڭ ايەلىنەن دە سۇحبات العان. ول گەنەرالدىڭ استانا تۇبىندە ءزاۋلىم ءۇيى بار دەگەن اقپاراتتى جانە كۇيەۋى ءوزىنىڭ تۋعان كۇنىنە قىمبات جيپ سىيلاعانىن جوققا شىعاردى.
ونىڭ ايتۋىنشا، گەنەرالدىڭ ينتەرناتسيونالنىي ەلدى مەكەنىندە ءبىرقاباتتى شاعىن عانا ءۇيى بار. «ونى كۇيەۋىم ەمەس، ءبىزدىڭ كۇيەۋ بالامىز قۋانىش وماربەكوۆ ساتىپ الدى»، - دەيدى ايەلى. مىنا فوتوسۋرەتتەگى ءۇي سول:
ال جول تالعامايتىن قىمبات كولىك تۋرالى گۇلنار جولامانوۆا بىلاي دەيدى: «ىشكى ىستەر دەپارتامەنتىنەن الىنعان انىقتامانى دا كورسەتە الامىن. Land Cruiser 200 ماركالى اۆتوكولىكتى قىزىم مەن كۇيەۋ بالام مەنىڭ تۋعان كۇنىمنەن جارتى جىل بۇرىن ساتىپ الدى. سول ءۇشىن ولار بۇرىنعى ەكى كولىگىن ساتتى».
گەنەرالدىڭ ايەلى قىزىنىڭ استانا مەن الماتى قالالارىندا پاتەرلەرى بار ەكەنىن مويىندادى. ونىڭ ايتۋىنشا، جىلجىمايتىن مۇلىك كۇيەۋى شەكارا قىزمەتى ديرەكتورى بولماي تۇرعاندا ساتىپ الىنعان.
سونىمەن بىرگە، گۇلنار جولامانوۆا كۇيەۋى تۇتقىندالعالى بەرى گەنەرالدىڭ وتباسى قىسىم كورە باستاعانىن ايتتى: «پاتەر كۇنى-ءتۇنى بويى باقىلانادى، تەلەفوندار تىڭدالادى. ءتىنتۋ كەزىندە مەنىڭ زەينەتاقى كارتوچكام تاركىلەندى. مەن ءومىر ءسۇرۋ قاراجاتىنان ايىرىلدىم. ۇلكەن قىزىمنىڭ دا كارتوچكاسى تاركىلەندى».
«كۇيەۋىم ادام ولتىرگەن جوق، تەرروريست ەمەس. ول قوعامعا قاۋىپ توندىرمەيدى. ول اۋىرادى، شۇعىل ەمدەۋگە مۇقتاج. ءبىز ونىڭ بۇلتارتپاۋ شاراسىن سەرىك احمەتوۆتىكى سياقتى «ءۇي قاماۋىنا الۋمەن» اۋىستىرۋدى جالىنىپ سۇرايمىز. الدە ونىڭ قابىرعاسىن قايىستىرىپ، سوتتا اشىق سويلەۋگە مۇرشا بەرمەۋ ءۇشىن ادەيى وقشاۋلاپ وتىر ما ەكەن؟ ول سەنىممەن، ادىلدىكپەن 40 جىل قىزمەت ەتتى، مەملەكەتىمىزدىڭ قورعانىس قابىلەتىنە ايتارلىقتاي ۇلەس قوستى»، - دەدى گەنەرالدىڭ زايىبى.
ەسكە سالا كەتەيىك، ق ر شەكارا قىزمەتى نۇرلان جولامانوۆ 2014-جىلدىڭ 27- قازانىندا قىزمەت بابىن تەرىس پايدالاندى دەگەن كۇدىكپەن ۇستالعان بولاتىن. كەيىن سوت ونى 27- جەلتوقسانعا دەيىن تۇتقىنداۋعا سانكسيا بەردى. جولامانوۆقا «پارا الۋ» جانە «ءبىر نەمەسە بىرنەشە قىلمىس جاساۋ ماقساتىمەن ۇيىمداسقان قىلمىستىق توپ قۇرۋ نەمەسە ونى باسقارۋ» باپتارى بويىنشا ايىپ تاعىلدى. تەرگەۋدىڭ مالىمەتىنشە، نۇرلان جولامانوۆ 300 مىڭ دوللاردان ارتىق سومادا پارا العان. ايتا كەتەيىك، جۋىردا «ك ت ك» تەلەارناسىنا بەرگەن سۇحباتىندا گۇلنار جولامانوۆا كۇيەۋىن الدەكىمدەردىڭ اياقتان شالعانىن ايتقان ەدى. ول گەنەرالعا كەيبىر قىزمەتكەرلەرى ور قازدى دەپ مالىمدەدى.
tengrinews.kz
