ەلدى مەكەندەردە ۇلتتىق ۇلاننىڭ ورتالىق ءان- بي ءانسامبلى كونسەرتتەر قويدى - فوتو
بۇل تۋرالى ق ر ۇلتتىق ۇلانى «وڭتۇستىك» وڭىرلىك قولباسشىلىعىنىڭ قوعاممەن بايلانىس جونىندەگى وفيسەرى دارحان مۇقانوۆ حابارلادى.
2014 - جىلى 21-24 - قاراشا ارالىعىندا اقپاراتتىق- ناسيحات توبى الماتى وبلىسىنداعى ساپارى بارىسىندا تالدىقورعان، تەكەلى، ەسىك قالالارىندا، قىزىلاعاش، ءۇشقوڭىر، بەكبولات، زارەچنىي ەلدى مەكەندەرىندە بولىپ، جەرگىلىكتى حالىقپەن، ارداگەرلەرمەن، اسكەري قىزمەتشىلەر جانە ولاردىڭ وتباسى مۇشەلەرىمەن، مەملەكەتتىك بيلىك ورگاندارى، قوعامدىق ۇيىمدار وكىلدەرىمەن، ستۋدەنتتەرمەن كەزدەسۋلەر، دوڭگەلەك ۇستەلدەر وتكىزدى.
ەلدى مەكەندەردە ۇلتتىق ۇلاننىڭ ورتالىق ءان- بي ءانسامبلى تۇڭعىش پرەزيدەنت كۇنىنە ارنالعان كونسەرتتەر قويادى.
دەلەگاتسيا جۇمىس ساپارىن تالدىقورعان قالاسىنداعى تاجىك- اۋعان شەكاراسىندا ەرلىكپەن قازا تاپقان جاۋىنگەرلەرگە ورناتىلعان ەسكەرتكىشكە گۇل شوقتارىن قويۋدان باستادى. ودان ءارى تالدىقورعان قالاسىندا وبلىستىق مەملەكەتتىك باسقارۋ ورگاندارى، قوعامدىق ۇيىمدار مەن ساياسي پارتيالار، ارداگەرلەر مەن جاستار ۇيىمدارى وكىلدەرىنىڭ قاتىسۋىمەن «قازاقستان رەسپۋبليكاسىنىڭ پرەزيدەنتى ن. نازاربايەۆ جانە «نۇرلى جول - بولاشاققا باستار جول» جاڭا ەكونوميكالىق ساياساتى» تاقىرىبىندا دوڭگەلەك ۇستەل ۇيىمداستىرىلدى.
«اقپاراتتىق- ناسيحات توبى جۇمىسىنىڭ نەگىزگى ماقساتى ەلباسىمىزدىڭ «نۇرلى جول - بولاشاققا باستار جول!» حالىققا جولداۋىن ەل اراسىندا كەڭىنەن ناسيحاتتاۋ، جەرگىلىكتى جۇرتشىلىقتى قازاقستان رەسپۋبليكاسى ۇلتتىق ۇلانىنىڭ قىزمەتىمەن تانىستىرۋ، ءوڭىر جاستارىن قازاقستاندىق پاتريوتيزم رۋحىندا تاربيەلەۋگە ۇلەس قوسۋ»، - دەدى توپ جەتەكشىسى، قازاقستان رەسپۋبليكاسى ۇلتتىق ۇلانى باس قولباسشىسىنىڭ تاربيە جانە الەۋمەتتىك- قۇقىقتىق جۇمىس جونىندەگى ورىنباسارى، پولكوۆنيك مۇحامەتقالي ساتوۆ.
ۇلتتىق ۇلاننىڭ اقپاراتتىق- ناسيحات توبى 25- قاراشادان باستاپ، ءوز جۇمىسىن الماتى قالاسىندا جالعاستىرماق.
