اقتوبەدە جارتى جىل بۇرىن جوعالعان سەرجانت تابىلدى
اقتوبە قالالىق قورعانىس ىستەرى جونىندەگى باسقارمادا تۇنگى كەزەكشەلىك كەزىندە قىزمەت ورنىنان جوق بولعان ارمان سۇراعانوۆ تۇنگى ەكىلەردىڭ شاماسىنا ۇيىنە ورالىپتى. تۋىستارىنىڭ ايتۋىنشا، ونى حرومتاۋ تاس جولىنىڭ بويىنان شوپان تاۋىپ العان.
«ۇستىندە تەك دامبالى مەن مايكىسىنەن باسقا ەشتەڭە جوق. قولىنان كىسەن سالىپ ۇستاعانى كورىنىپ تۇر. شاشى يىعىنان اسادى، تىرناعى دا سوياۋداي بولىپ ءوسىپ كەتكەن. دالادا بايلاۋلى جاتقان جەرىنەن قوي باعىپ جۇرگەن مالشى تاۋىپ، حرومتاۋ اۋدانىنىڭ پوليتسيا قىزمەتكەرلەرىنە حابار بەرگەن.
ءتارتىپ ساقشىلارى تۇنگى ەكىدە ۇيگە اكەلدى. تاڭعى سەگىزدەردەن قايتا ىشكى ىستەر دەپارتامەنتىنە تەرگەۋگە الىپ كەتتى. قاسىنا كەلىنشەگى ەرە كەتتى»، - دەيدى اعاسى ەركىن تالاسبايەۆ.
ارماننىڭ تۋىستارىنىڭ قۋانىشىندا شەك جوق. ۇيىندە مال سويىپ، ۇلدارىنىڭ امان ورالعانىنا توي جاساماقشى.
«ارمانىمنىڭ ورالعانىنا قۋانىشتىمىن. وسى التى اي ون كۇن بويى ونى ىزدەۋگە كومەك بەرگەن بارلىق ادامدارعا العىسىم شەكسىز. ەڭ باستىسى، قول-اياعى ساۋ، ەسىن بىلەدى. قۋانىشتان ءالى وزىمە كەلە الماي وتىرمىن»، - دەيدى سەرجانتتىڭ اناسى حاليما سۇراعانوۆا.
قازىر ءتارتىپ ساقشىلارى ارمان سۇراعانوۆتان وسى ۋاقىت بويىنا نەلىكتەن جوق بولعانىنا قاتىستى جاۋاپ الىپ جاتىر.
بۇعان دەيىن حابارلاعانىمىزداي، اعىمداعى جىلدىڭ 15 - مامىرىندا 1981 - جىلى تۋعان ارمان تالعات ۇلى سۇراعانوۆ قىزمەت ورنىندا جوعالىپ كەتكەن بولاتىن. ول حابارسىز كەتكەندە وبلىستىق ىشكى ىستەر دەپارتامەنتى ادام ولىمىنە قاتىستى ءىس قوزعاعان ەدى.
اقسۇڭقار ازات
