ەلباسى ۇرپاعى ەرتەڭىنە سەنىممەن قارايتىن ماڭگىلىك ەلگە جەتۋدىڭ «نۇرلى جولىن» ايقىنداپ بەردى
ونىڭ ايتۋىنشا، جاھاندىق داعدارىستىڭ الدىن الىپ، ۇلتىمىزدى ۇيىستىرا وتىرا ۇلى ماقساتتارعا جەتەلەيتىن «نۇرلى جول» باعدارلاماسى - بۇل ءبىزدىڭ ۇلتتىق يدەيامىزدىڭ ءتۇپ قازىعى «ماڭگىلىك ەلگە» اپاراتىن داڭعىل جول.
«مەملەكەت باسشىسى ايتپاقشى، ءبىزدىڭ تاۋەلسىزدىگىمىز، زايىرلىعىمىز بەن ەلىمىزدىڭ ەكونوميكالىق ءوسىمى «نۇرلى جول» سياقتى قۇندىلىقتاردى بىرىكتىرەدى. بۇل جولعى جولداۋدىڭ ەل بولاشاعى ءۇشىن ماڭىزى وتە زور. ويتكەنى، جولداۋ كوپ ۇلتتى حالقىمىزعا كۇش-قۋات بەرەر قاينار كوز دەپ بىلەمىن. جولداۋدا ەلباسى الداعى ۋاقىتتا كوپتەگەن جۇمىستاردىڭ كۇتىپ تۇرعانىن ايتىپ ءوتتى. بۇل تاريحي قۇجاتتا قوعامنىڭ ءاربىر مۇشەسىنە زور جاۋاپكەرشىلىك جۇكتەلگەن. سان سالالى ءومىرىمىزدىڭ بارلىق تىنىس-تىرشىلىگىن تۇگەل قامتىعان جولداۋدا اسىرەسە، جاستارعا كوپ ءۇمىت ارتىلىپ وتىر.
قازىرگى كۇنى جاستاردىڭ كوبى پاتەر جالداپ، كۇن كورەتىنى جاسىرىن ەمەس. قانشاما جاس وتباسىلار دا باسپانانىڭ جوقتىعىنان قينالىپ ءجۇر. وسى رەتتە، جالعا بەرىلەتىن تۇرعىن ءۇي قۇرىلىسىنىڭ جانداندىرىلاتىندىعى جاس قازاقستاندىقتاردى ءبىر سەرپىلتىپ تاستادى.
مەملەكەت الەۋمەتتىك باسپانالار سالىپ، ونى تۇرعىندارعا ساتىپ الۋ قۇقىعىن بەرە وتىرىپ، ۇزاق مەرزىمدى جالعا ۇسىنۋ تەتىگىن بۇرىنعىدان بەتەر ىسكە قوسا تۇسپەكشى. دەمەك، باسپانانى تىكەلەي، دەلدالدارسىز جانە نەسيەگە بارىنشا تومەن پايىزبەن الاتىن كۇننىڭ اۋىلى الىس ەمەس دەپ ويلايمىن. باستاپقى جارنانىڭ بولماۋى جانە يپوتەكا ءۇشىن تومەن پايىزدار جاستاردىڭ ءار جىكتەرى ءۇشىن پاتەرگە قولجەتىمدىلىكتى جەڭىلدەتە تۇسپەك. پرەزيدەنت 2015-2016-جىلدار ىشىندە جالعا بەرىلەتىن تۇرعىن ءۇي قۇرىلىسىن قارجىلاندىرۋ ءۇشىن قوسىمشا 180 ميلليارد تەڭگە بولىنەتىنىن ايتىپ، ءبىزدىڭ كوكەيىمىزدەگى ويدى ءدوپ باستى. ويتكەنى، مەملەكەتىمىزدى «ماڭگىلىك ەل» ەتۋ جولىندا ەڭبەك ەتەتىن دە، ەرتەڭ سونىڭ جەمىسىن كورەتىن دە بۇگىنگى جاستار. وسىنى جاقسى تۇسىنگەن پرەزيدەنتىمىز ەلىمىزدىڭ كەلەشەگى جاستاردىڭ جاعدايىنا نەمقۇرايلى قاراماي، 2050-جىلعا دەيىنگى ستراتەگيانى جۇزەگە اسىرۋدىڭ، ياعني تۇرمىسى باقۋاتتى، ءتۇتىنى ءتۇزۋ ۇشقان، ۇرپاعى ەرتەڭىنە سەنىممەن قارايتىن ماڭگىلىك ەلگە جەتۋدىڭ «نۇرلى جولىن» ايقىنداپ بەردى»، - دەيدى گەريحان يانديەۆ.
اۆتور: اسلان وسپانوۆ
