ا. ابدۋللا: قازاقستاننىڭ دامۋى - اۋعانستان ءۇشىن جارقىن ۇلگى
كەزدەسۋ بارىسىندا ق ر پرەزيدەنتى ن. نازاربايەۆتىڭ قازاقستان حالقىنا «نۇرلى جول - بولاشاققا باستار جول» اتتى جولداۋى، سونداي-اق ءتۇرلى سالالارداعى قازاق-اۋعان ەكىجاقتى قارىم-قاتىناستارىنىڭ بولاشاعى مەن قازىرگى احۋالى تالقىلاندى.
كەزدەسۋدە قازاقستاننىڭ اۋعانستاندا جۋىق ارادا بەيبىتشىلىك پەن تۇراقتىلىقتىڭ ورناتىلۋىن قولدايتىنى، ىزگىلىك كومەك كورسەتەتىنى، مەملەكەتتىك ءبىلىم بەرۋ باعدارلاماسىن جۇزەگە اسىراتىنى، وڭىردەگى ينتەگراتسيالىق ۇدەرىستەرگە اۋعانستاندى تارتۋ بويىنشا ءىس-شارالاردى پىسىقتايتىنى تۋرالى اتاپ ءوتىلدى.
«وسى باعىتتا شىنايى قادامداردىڭ ءبىرى - 2013-جىلعى ساۋىردە الماتىدا ەلباسى ن. نازاربايەۆتىڭ باسشىلىعىمەن وتكەن «ازيا جۇرەگى» كونفەرەنتسياسىن اتاۋعا بولادى»، دەلىنگەن حابارلامادا.
ا. ابدۋللا بيىل جەلتوقساندا استانادا وتەتىن شانحاي ىنتىماقتاستىق ۇيىمىنا مۇشە مەملەكەتتەردىڭ ۇكىمەت باسشىلارى كەڭەسىنىڭ 13- وتىرىسىنا قاتىساتىنىن راستادى.
اۋعان ماماندارىنىڭ ەلىمىزدە ءبىلىم الىپ وتىرعانى ءۇشىن العىسىن ايتا وتىرىپ، بۇل باعدارلامانى ەلىندە جوعارى باعالاناتىنىن مالىمدەدى.
ا. ابدۋللا ب ۇ ۇ قاۋىپسىزدىك كەڭەسىنىڭ 2017-2018 جقلدارعى تۇراقتى ەمەس مۇشەلىگىنە قازاقستان كانديداتۋراسىن اۋعانستان رەسمي قولدايتىنىن راستادى.
اۋعانستاننىڭ اتقارۋشى بيلىك باسشىسى ەلىمىزگە وڭ كوزقاراسىن ءبىلدىرىپ، قازاقستاننىڭ الەۋمەتتىك-ەكونوميكالىق دامۋىنداعى جانە ول بۇدان بۇرىن كوپ ساپار شەككەن زاماناۋي استانانىڭ سالىنۋىنداعى جەتىستىكتەرىن ايرىقشا بەلگىلەدى. ەلباسى ن. نازاربايەۆقا ءوزىنىڭ ەرەكشە ءىلتيپاتىن تانىتىپ، قازاقستاننىڭ دامۋى ءوڭىر مەملەكەتتەرى، ونىڭ ىشىندە اۋعانستان ءۇشىن جارقىن ۇلگى ەكەنىن ايتتى.
