روزا رىمبايەۆا راديودان «اسپانعا قارايمىن» حيتىن تىڭداعىسى كەلمەيدى
بۇل تۋرالى ول الاش ايناسى پورتالىنا بەرگەن سۇحباتىندا كەڭىنەن توقتالعان.
سۇحباتتا جاقىندا اشىلعان، تەك قازاق تىلىندەگى اندەردى تاراتاتىن "جۇلدىز FM" راديوسى ءسوز بولدى. اتالعان راديو روزا رىمبايەۆانىڭ ورىنداۋىنداعى "سالەم ساعان، تۋعان ەل" ءانىن ۇران ەتىپ العان.
ءاننىڭ جازىلۋ تاريحىنا توقتالعان روزا قۋانىش قىزى قازىرگى جاس انشىلەردىڭ وسى ءاندى ورىنداۋ كەزىندە وزىنەن رۇقسات سۇراماعانىن ايتتى.
"سالەم ساعان، تۋعان ەل" ءانىن مەن 1976 - جىلى العاش رەت ورىندادىم. 1979 - جىلى وسى انمەن تۇركيادا وتكەن حالىقارالىق بايقاۋدا لاۋرەات اتانعانىم دا راس. ال وسى كۇنگى جاستاردىڭ ورىنداۋىندا بۇل ءاندى ءۇزىپ-جۇلىپ تىڭداعانىم بار. ءبىراق تولىق تىڭداماپپىن. مەنىڭشە جاس انشىلەر بۇل ءاننىڭ كوشىرمەسىن عانا جاساپ العان. ماعان ارنايى جازىلعان ءاندى ورىنداماس بۇرىن جاس انشىلەردىڭ مەنەن رۇقسات سۇراعانى ءجون بولار ەدى. ءبىراق قازىرگى جاستاردا ونداي مادەنيەت جوق"، - دەيدى حالىق ءارتىسى.
سونداي-اق، روزا رىمبايەۆا ءوزىنىڭ راديودان قانداي ءان تىڭداعىسى كەلەتىنىن دە جەتكىزگەن.
"مەن تەك ادەمى اندەر تىڭداعىم كەلەدى. مەنىڭشە، جاستاردىڭ قالاۋى وسى ەكەن دەپ جەڭىل-جەلپى اندەردى تىقپالاي بەرمەي، جوعارى دەڭگەيلى اندەردى، حالىق اندەرىن، ساپالى وڭدەلگەن اندەردى ەفيردەن بەرىپ تۇرعان ءجون دەپ ەسەپتەيمىن. ويتكەنى جاستاردىڭ كوڭىلىن كوتەرۋ ءۇشىن داڭعازا مۋزىكانى قويا بەرمەي، ولاردى مۋزىكاعا تاربيەلەۋ كەرەك. مەن شىنىمدى ايتسام، قازىرگى جاستاردى ءبىر-بىرىنەن اجىراتا بەرمەيمىن. بارلىعى ءبىر دەڭگەيدە سەكىلدى"، - دەيدى ءانشى.
حالىقتىڭ سۇيىكتى ءانشىسى بۇل كۇندەرى حيتقا اينالعان اباي بەگەيدىڭ "اسپانعا قارايمىن" اتتى ءانىن دە راديودان تىڭداعىسى كەلمەيتىنىن ايتىپتى.
"مەن "جۇلدىز FM" راديوسىنان "اسپانعا قارايمىن، جۇلدىزدى سانايمىن" ءانىن تىڭداعىم كەلمەيدى. راديودا تەك ساپالى، كاسىبي اندەر قويىلۋى ءۇشىن ەڭ الدىمەن مۋزىكا سىنشىلارى، مۋزىكالىق رەداكتورلار، كوركەمدىك كەڭەستىڭ مۇشەلەرى ەڭ الدىمەن مۋزىكانت بولۋى كەرەك، ەسترادا مۋزىكاسىن تۇسىنەتىن مامانداردىڭ جۇمىس ىستەۋى شارت. سوندا عانا ۇلكەن تالعاممەن جاقسى اندەر جيناقتالادى"، - دەيدى روزا رىمبايەۆا.
NUR. KZ
