شۆەيساريا پرەزيدەنتى قازاقستانعا العاشقى رەسمي ساپارمەن كەلدى
كەزدەسۋ بارىسىندا ەكى مەملەكەتتىڭ باسشىلارى ساۋدا- ەكونوميكالىق، ينۆەستيتسيالىق جانە مادەني- گۋمانيتارلىق سالالارداعى ءوزارا ءىس- قيمىلدى نىعايتۋدىڭ نەگىزگى ماسەلەلەرىن تالقىلادى.
سونداي- اق حالىقارالىق كۇن تارتىبىندەگى وزەكتى جايتتار جونىندە پىكىر الماسىلدى.
نۇرسۇلتان نازاربايەۆ پەن ە ق ى ۇ ءىس باسىنداعى ءتوراعاسى بولىپ وتىرعان ديدە بۋركحالتەر ۇيىم قىزمەتىنىڭ ماڭىزدى تۇستارى تۋرالى دا ءسوز قوزعادى.
مەملەكەت باسشىسى شۆەيساريا قازاقستاننىڭ ەۋروپاداعى ماڭىزدى ەكونوميكالىق سەرىكتەسى ەكەندىگىن اتاپ ءوتتى.
- ءسىزدىڭ ەل قازاقستانعا 2005 - جىلدان بەرى 12 ميلليارد دوللارعا جۋىق ينۆەستيتسيا سالدى. مۇندا ەلۋ شاقتى شۆەيساريالىق كومپانيا مەن بىرلەسكەن كاسىپورىندار جۇمىس ىستەيدى. قازاقستان حالىقارالىق ۆاليۋتا قورىنىڭ شۆەيساريالىق كىشى توبىنا قاتىسادى. ءبىزدىڭ ەلدەرىمىز سىرتقى ساياساتپەن قاتار ىشكى ساياسي ماسەلەلەر بويىنشا دا تىعىز ىنتىماقتاسىپ كەلەدى، - دەدى نۇرسۇلتان نازاربايەۆ.
شۆەيساريا پرەزيدەنتى ءوز كەزەگىندە جىلى شىرايلى قابىلداۋ ءۇشىن ريزاشىلىعىن ءبىلدىرىپ، بۇل ونىڭ قازاقستانعا العاشقى ساپارى ەكەنىن ايتتى. سونداي- اق د. بۋركحالتەر ەكى ەلدىڭ ءوزارا قارىم- قاتىناستارى جوعارى دەڭگەيدە ەكەنىنە نازار اۋدارا وتىرىپ، ءبىرقاتار پەرسپەكتيۆالى باعىتتاردىڭ دا بار ەكەنىن اتاپ ءوتتى.
