قازاق كۇيى مەن كيىز ءۇيى ادامزاتتىڭ ماتەريالدىق ەمەس مادەني مۇراسى تىزىمىنە ەنگىزىلمەك
كوميتەت جۇمىسىنىڭ بارىسىندا جاڭا ەلەمەنتتەردى ەكى تىزىمگە - شۇعىل قورعاۋدى قاجەت ەتەتىن ماتەريالدىق ەمەس مۇرالار تىزىمىنە جانە ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنگىزۋ تۋرالى ۇسىنىستاردى قارايدى، دەپ حابارلادى يۋنەسكو وكىلدىگى.
ماتەريالدىق ەمەس مادەني مۇرالاردىڭ رەپرەزەنتاتيۆتىك تىزىمىندە قازىردە 281 ەلەمەنت بار. بۇل ءتىزىم ءارتۇرلى قاۋىمداستىقتاردىڭ ءداستۇرلى بىلىمدەرى مەن سالتتارىنا نازار اۋدارۋى ءتيىس. الايدا ءتىزىم ماتەريالدىق ەمەس مۇرانىڭ كەيبىر ەلەمەنتتەرىنىڭ ارتىقشىلىعى مەن ەرەكشەلىگىن تانۋدى ماقسات ەتپەيدى.
بيىلعى جىلى ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنگىزۋگە 46 كانديداتۋرا قارالادى، سونڭ ىشىندە قازاقستان ەكى ەلەمەنتتى - قازاقتىڭ ءداستۇرلى دومبىرامەن ورىندالاتىن كۇيلەرىن ورىنداۋ ونەرىن، سونداي-اق قىرعىزستان رەسپۋبليكاسىمەن بىرگە - قىرعىز جانە قازاق كيىز ۇيلەرىن (تۇركى كوشپەلى حالىقتارىنىڭ) دايارلاۋ داعدىلارى مەن ءداستۇرلى بىلىمدەرىن ۇسىنىپ وتىر.
شۇعىل قورعاۋدى قاجەت ەتەتىن ماتەريالدىق ەمەس مادەني مۇرالار تىزىمىنە جويىلىپ كەتۋ قاۋپى بار ماتەريالدىق ەمەس مۇرالار ەلەمەنتتەرى ەنگىزىلەدى جانە ولاردى قورعاۋ قىسقا مەرزىمدە قامتاماسىز ەتىلۋى ءتيىس. قازىر 35 ەلەمەنت ەنگىزىلگەن رەپرەزەنتاتيۆتىك ءتىزىم كونۆەنتسياعا قاتىسۋشى- مەملەكەتتەرگە بۇل مۇرالاردى مۇددەلى قاۋىمداستىقتاردىڭ قاتىسۋىمەن بەرۋدى قامتاماسىز ەتۋ جونىندەگى كومەككە حالىقارالىق ىنتىماقتاستىقتى جۇمىلدىرۋعا مۇمكىندىك بەرەدى.
ەسكە سالا كەتەيىك، ماتەريالدىق ەمەس مادەني مۇرالاردى قورعاۋ جونىندەگى ۇكىمەتارالىق كوميتەتتىڭ قۇرامىنا يۋنەسكو-نىڭ 24 مۇشە-ەلدەرىنىڭ وكىلدەرى كىرەدى، ولار بۇگىندە 161 ەل راتيفيكاتسيالاپ وتىرعان ماتەريالدىق ەمەس مادەني مۇرالاردى قورعاۋ جونىندەگى 2003-جىلعى كونۆەنتسيانى جۇزەگە اسىرۋعا جاۋاپ بەرەدى.
كوميتەت ءوزىنىڭ توعىزىنشى سەسسياسىنىڭ بارىسىندا كونۆەنتسيانى ورىنداۋ تۋرالى 27 كەزەڭدىك باياندامانى جانە شۇعىل قورعاۋدى قاجەت ەتەتىن ماتەريالدىق ەمەس مادەني مۇرا تىزىمىندەگى ەلەمەنتتەردىڭ اعىمداعى جاعدايى تۋرالى 8 باياندامانى تىڭدايدى.
