اكتريسا، ءانشى، ايگۇل يمانبايەۆا: مەنى التىنايمەن سالىستىرا بەرمەڭىزدەرشى
ويتكەنى جۇرەگى ونەر دەپ سوققان ايگۇل باسقالاردان ءوزىنىڭ سان قىرلىلىعىمەن ەرەكشەلەنەدى. ول - تەاتر جانە كينو اكتريساسى، ءانشى، پروديۋسەر، تەلەجۇرگىزۋشى. ەشقانداي جارنامانى قاجەتسىنبەيتىن دەڭگەيگە جەتكەن ونەرپاز اركەز كورەرمەنىنىڭ، تىڭدارمانىنىڭ نازارىندا.
ونەردىڭ سان سالاسىندا جۇرسە دە، ءانشى رەتىندە حالىق الدىندا ەسەپ بەرۋدى وزىنە پارىز ساناعان ايگۇل يمانبايەۆا جاقىندا استانا قالاسىندا ءوزىنىڭ «سەن عانا...» دەپ اتالاتىن جەكە كونسەرتىن وتكىزبەك. ونەرسۇيەر قاۋىمدى ءوزىنىڭ ءان الەمىن بىرگە ارالاۋعا شاقىرىپ وتىرعان انشىمەن «الاش ايناسىنىڭ» ءتىلشىسى تىلدەسكەن ەدى.
ايگۇل يمانبايەۆانىڭ قازاق ەستراداسىندا ءان سالعانىنا دا 15 جىلدان استام ۋاقىت بولىپتى. ول ءوزىنىڭ ەڭ العاشقى ەسەپ بەرۋ كونسەرتىن 2007 - جىلى الماتىداعى رەسپۋبليكا سارايىندا وتكىزگەن بولاتىن.
مىنە، ەندى اراعا 7 جىل سالىپ، ءانشى حالىققا ءوزىنىڭ ەكىنشى ەسەپ بەرۋ كونسەرتىن ۇسىنىپ وتىر. الايدا ءانشى وسى جىلدار ىشىندە ەلىمىزدىڭ بىرنەشە قالاسىندا، وبلىس ورتالىقتارىندا، شالعاي اۋدانداردا شاعىن كونسەرتتەرىن بەرىپ ءجۇردى.
ايگۇل يمانبايەۆا، ءانشى-اكتريسا:
- جالپى كەز كەلگەن كاسىبي ءانشى ءوزىنىڭ جەكە ەسەپ بەرۋ كونسەرتىن ءاربىر 5 جىل سايىن وتكىزىپ تۇرعانى دۇرىس دەپ ەسەپتەيمىن. مەن ەكىنشى رەت ۇلكەن ەسەپ بەرۋ كونسەرتىمدى جوسپارلاعانىما ءبىراز ۋاقىت بولدى، دەگەنمەن اللا ءساتىن سالىپ، كونسەرتىمدى بيىل 29 - قاراشادا وتكىزۋ بۇيىرعان ەكەن.
ونەردىڭ بىرنەشە سالاسىن قاتار الىپ جۇرگەن سوڭ، كەيدە ۋاقىت جەتكىزە الماي جاتامىز، كەيدە قارجى جاعىنان قينالىپ قالامىز، دەگەندەي. سونداي-اق رەپەرتۋاردى تولىقتىرۋعا كەلگەندە دە ءبىر ءان ۇناسا، ەندى ءبىر ءان وڭ جاڭباسىڭا كەلىڭكىرەمەيدى. بۇل جولى اللا ابىروي بەرسە، ءوزىمنىڭ سۇيىكتى كورەرمەنىممەن تاعى ءبىر قاۋىشۋدىڭ ءساتى ءتۇسىپ وتىر. مەنىڭ جەكە ەسەپ بەرۋ كونسەرتىم ەڭ الدىمەن استانا قالاسى اكىمدىگىنىڭ قولداۋىمەن وتەدى.
بۇل ماعان قاراجات جاعىنان ۇلكەن كومەك بولدى. وسىدان ءبىراز ۋاقىت بۇرىن مەن استانا قالاسىنداعى مادەنيەت دەپارتامەنتىنىڭ باستىعى بولات ماجاعۇلوۆ مىرزاعا قازاقستان ورتالىق كونسەرت زالىن جالعا بەرۋ باعاسىن جەڭىلدەتىپ بەرۋىنە ءوتىنىش جاساپ بارعان ەدىم.
سوندا ول كىسى ماعان: «ايگۇل، ءسىزدىڭ قازاق ونەرىندە ءوز ورنىڭىز بار ونەرپازسىز. ءسىزدىڭ كونسەرتىڭىزدى ءبىز ءوزىمىز قولعا الىپ، وتكىزىپ بەرەيىك دەپ قولقا سالدى. ارينە، مەنىڭ قۋانىشىمدا شەك بولعان جوق. ەل اعالارى مەنىڭ ونەرىمە قولداۋ ءبىلدىرىپ، كومەك قولدارىن سوزىپ جاتقاندا نەگە قۋانباسقا؟
ءان ايتسا دا، باعدارلاما جۇرگىزسە دە ايگۇل ءوزىنىڭ اكتەرلىق شەبەرلىگىمەن كورەرمەنىن باۋراپ الادى. بۇل جولى دا ايگۇلدىڭ كونسەرتى ەرەكشە بولاتىنىنا ەشكىمنىڭ كۇمانى جوق. ءانشىنىڭ ايتۋىنشا ونىڭ كونسەرتىندە جۇرگىزۋشى بولمايدى جانە وپەرا ءانشىسى سۇندەت بايعوجيننەن باسقا قوناق تا شاقىرىلماعان. ايگۇل مەن سۇندەت دۋەت ورىندايدى. كونسەرتتەگى جاڭالىقتىڭ ءبىرى، ايگۇل يمانبايەۆا بالاسى اسىلجانمەن بىرگە ارمان دۇيسەنوۆتىڭ «تاڭعاجايىپ» ءانىن بىرگە ورىندايدى.
«نەگىزىنەن اسىلجان ءان سالمايدى. مەن باسقا انشىلەر سەكىلدى بالامدى ساحناعا باۋلىپ، ودان ءانشى جاساۋعا تىرىسقان ەمەسپىن. دەگەنمەن وسى جولى مەنىڭ كونسەرتىمدە ەكەۋمىز دۋەت ايتۋدى ۇيعاردىق. ال ەندى كونسەرتتىڭ باسقا دا ەرەكشەلىكتەرىنە كەلەر بولساق، كونسەرت مىندەتتى تۇردە تابيعي داۋىستا وتەدى.
كونسەرتتى ۇيىمداستىرار الدىندا ەسترادالىق سيمفونيالىق وركەسترمەن نەمەسە ۆوكالدىق-اسپاپتىق انسامبلمەن قويامىز با دەگەن دە وي بولعان. مۇنداي جاعدايدا رەپەرتۋارىمداعى كوپتەگەن جاستارعا ارنالعان جىلدام اندەر ءتۇسىپ قالاتىن بولدى. سونداي-اق مەن ءوزىم اكتريسا بولعاننان كەيىن كونسەرتىمدە شوۋ-جاساۋدى ۇيعاردىم.
سوندىقتان مۋزىكالىق پروديۋسەرىممەن اقىلداسا كەلىپ، اندەرىمدى مينۋس ارقىلى تابيعي داۋىستا ورىنداعانىم دۇرىس دەپ شەشتىك. كونسەرت 5 بولىمنەن تۇرادى، ياعني مەنىڭ بالالىق شاعىمنان بۇگىنگە دەيىنگى ومىرىمدەگى، ونەردەگى جولىم جەكە كونسەرتىمدە تولىق قامتىلماق. ءبۇلدىرشىن ايگۇل، ەس كىرىپ ەتەك جيعان ايگۇلدىڭ جاستىق شاعى، انا اتانعان ايگۇل، اكتريسا ايگۇل، حانشايىم ايگۇل سەكىلدى بولىمدەر ارقىلى كونسەرتىمە كەلگەن حالىق 2 ساعات بويى مەنىڭ الەمىمە سۇڭگىپ، مەنىمەن بىرگە ءومىر سۇرەدى. ساحناعا قويىلعان Led ەكران ارقىلى مەن وزىممەن ءوزىم تىلدەسەمىن»، - دەيدى ايگۇل يمانبايەۆا.
ءبىر مۇڭايىپ، ءبىر كۇلىپ،
ءبىر ءسۇرىنىپ، ءبىر تۇرىپ، كۇرسىنىپ،
بەۋ، ءبىر سىنىق.
كەۋدەمدە تۋلايدى تىرشىلىك،
جالعان، تاعدىر وسى، تاعدىر وسى...
بۇل - ايگۇلدىڭ كونسەرتىنە ورىندالاتىن جاڭا اندەردىڭ ءبىرى. ەلەنا ءابدىحالىقوۆانىڭ سوزىنە جازىلعان لۇقپان جولداسوۆتىڭ ءانى «ارمان ءومىر» سەكىلدى ايگۇلدىڭ رەپەرتۋارى بىرنەشە كۇردەلى، ماعىنالى اندەرمەن تولىققان. بۇعان دەيىن كىلەڭ جاستارعا ارنالعان، ماحاببات جايلى اندەر ورىنداپ جۇرگەن ءانشى وسى جولعى ءوزىنىڭ ەسەپ بەرۋ كونسەرتىندە اقان سەرىنىڭ، كەنەن اتامىزدىڭ اندەرىن، باتىستىڭ حالىق اندەرىن ورىندايدى.
دەگەنمەن جاستاردىڭ كوڭىلىنەن شىعاتىن اندەر دە جوق ەمەس. سونداي-اق ءانشىنىڭ حيتقا اينالعان «تاڭعى ەلەس»، «ادەمى قىز»، «اق گۇلدەر» ءانى دە شىرقالادى. ءانشى ايگۇل يمانبايەۆا ءوزىنىڭ ورىنداۋىنداعى ايگۇل باجانوۆانىڭ «جاقسى كورەم» اتتى جاڭا ءانىن حيتقا اينالاتىنىنا سەنىمدى.
بازبىرەۋلەر ايگۇلدى التىنايمەن سالىستىرىپ، ونىڭ انشىلىك قىرىن سىناپ جاتادى. الايدا ايگۇل ءوزىنىڭ انشىلىگىنەن اكتريسالىعى باسىم ەكەنىن ۇنەمى ايتىپ كەلەدى. ال ءانشى ايگۇل ءاردايىم ءوزىنىڭ بابىنداعى سپورتشى ءتارىزدى جاتتىعۋدان، ىزدەنۋدەن تانعان ەمەس.
رەپەرتۋارىندا 40 شاقتى ءانى، 15 بەينەبايانى بار ءانشى ءوز دەڭگەيىندە وزىنە ءتان ورىنداۋشىلىق ستيلىمەن كورەرمەنىنە بارىن ۇسىنىپ ءجۇر. «ونەردە كەيدە اداسپاۋ ءۇشىن دە اداسۋ كەرەك، مەن دە اداستىم، رەپەرتۋار جاعىنان اداستىم. ءبىراق مەن ءوزىمدى كوپ ءانشىنىڭ اراسىندا شاڭ قاۋىپ قالعان ءانشىمىن دەپ ەسەپتەمەيمىن. بايقاۋلاردا باق سىناپ، وزگەلەردىڭ الدىن ورايتىن ءانشى بولماسام دا، وزىندىك ەرەكشەلىگىم بار ورىنداۋشىمىن» دەيدى ءانشى.
ءيا، ايگۇل جاي عانا كوپتىڭ ءبىرى ەمەس. ول ءوزىنىڭ ونەر ادامىنا ءتان قايسار مىنەزىمەن، ەڭبەكقورلىعىمەن تالاي اسۋدى باعىندىرعان ونەرپاز. «ءوزىن ونەردەن تاپقان، ونەردەن ءومىر تاپقان» قازاقتىڭ قاراكوز قىزى ونەر ءۇشىن تاعدىرىنا قارسى جۇرۋدەن دە تايسالمادى. ونىڭ بويىندا ونەرگە دەگەن ماحاببات قانا ەمەس، كەۋدەسىندە قۋاتىن تاسىتىپ تۇراتىن جانارتاۋ بارداي اسەر ەتەدى. ەندەشە، قۇرمەتتى قاۋىم، ايگۇلدىڭ ونەردەن تاپقان جاعالاۋىن بىرگە ارالايىق، ءانشىنىڭ تەلەگەي تەڭىز ءان الەمىنە بىرگە سۇڭگيىك!!!
اۆتور: اينۇر سەنبايەۆا
Alashainasy.kz
