شۆەيساريا پرەزيدەنتى د. بۋركحالتەر: ءبىز ءۇشىن قازاقستان ەۋروپا مەن ازيا اراسىنداعى ماڭىزدى كوپىر ءرولىن اتقارادى
بۇل تۋرالى بۇگىن اقورداداعى كەزدەسۋدەن كەيىن ەلباسى نۇرسۇلتان نازاربايەۆپەن بىرلەسىپ مالىمدەمە جاساعان شۆەيساريانىڭ فەدەرالدى پرەزيدەنتى سىرتقى ىستەر ءمينيسترى ديدە بۋركحالتەر ايتتى.
«مەن بۇل ساپارىمدى شۆەيساريا كونفەدەراتسياسىنىڭ پرەزيدەنتى رەتىندە عانا ەمەس، سونىمەن بىرگە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءتوراعاسى رەتىندە دە اياقتايمىن. ەڭ الدىمەن قازاقستاننىڭ ءبىزدىڭ كوز الدىمىزدا ەۋروپا مەن ازيا اراسىنداعى ماڭىزدى كوپىر بولىپ وتىرعاندىعىن ەرەكشە اتاپ وتكىم كەلەدى. بۇل كوپىر قازىرگى جاعدايدا بارىنشا ماڭىزدى»، - دەدى مارتەبەلى مەيمان.
د. بۋركحالتەردىڭ اتاپ وتۋىنشە، ق ر پرەزيدەنتىمەن كەلىسسوزدەر بارىسىندا ەكىجاقتى قارىم- قاتىناستى ودان ارى دامىتۋ، سونىمەن قاتار حالىقارالىق ساياساتتاعى، ونىڭ ىشىندەگى ۋكرايناداعى احۋال كەڭىنەن تالقىعا تۇسكەن.
«ساۋدا- ساتتىق سالاسىندا دا شۆەيساريا قازاقستاننىڭ ماڭىزدى سەرىكتەسى بولىپ قالا بەرەدى. ءبىز بۇل سالاعا بارىنشا كوڭىل بولۋدەمىز. قازىرگى ۋاقىتتا بىزدەر ىنتىماقتاستىقتى جانداندىرا تۇسۋگە ءتيىستى سالالاردى ىزدەستىرۋدەمىز»، دەپ تۇيىندەدى ءسوزىن شۆەيساريا پرەزيدەنتى.
